અમરેલી-પીપાવાવ હાઈવે પર LPG ગેસનું ટેન્કર પલટાયું : મોટી દુર્ઘટના ટળી
ટેન્કરે પલટી મારતા અફરાતફરી સર્જાઇ : કોઈ અનિચ્છનીય ઘટના ન ઘટે તે માટે ફાયર ફાઈટરો દ્વારા સતત પાણીનો મારો ચલાવાયો,
અગ્ર ગુજરાત, રાજુલા
અમરેલી જિલ્લાના સાવરકુંડલા તાલુકાના આંબરડી ગામ નજીક અકસ્માતની ઘટના બની હતી. અમરેલી – પીપાવાવ હાઈવે પરથી પસાર થઈ રહેલું એલપીજી ગેસ ભરેલું એક વિશાળ ટેન્કર અચાનક પલટી મારી જતાં અફરાતફરીનો માહોલ સર્જાયો હતો. ગેસ ભરેલું ટેન્કર પલટી ગયું હોવાની જાણ થતાં જ સ્થાનિક પોલીસ, વહીવટી તંત્ર અને ફાયર વિભાગની ટીમો તાત્કાલિક ધટના સ્થળે પહોંચી હતી. મળતી માહિતી મુજબ, અમરેલી-પીપાવાવ હાઈવે પર સાવરકુંડલાના આંબરડી નજીક એલ.પી.જી ગેસ ભરેલા ટેન્કરના ચાલકે સ્ટીયરીંગ પરથી કાબૂ ગુમાવતા ટેન્કર રોડ પર જ પલટી ખાઈ ગયું હતું. આ અકસ્માત એટલો ગંભીર હતો કે હાઈવે પર દોડધામ મચી ગઈ હતી. ઘટનાની જાણ થતાં જ અમરેલી અને સાવરકુંડલાની ફાયર ફાઈટરની ટીમો તાબડતોબ ઘટનાસ્થળે દોડી ગઈ હતી. ટેન્કરમાંથી ગેસ લીકેજ થઈને કોઈ મોટી દુર્ઘટના ન ઘટે તે માટે ફાયર વિભાગ દ્વારા અત્યંત સતર્કતા દાખવીને ટેન્કર ઉપર સતત પાણીનો મારો ચલાવવામાં આવ્યો હતો, જેના કારણે મોટી દુર્ઘટના થતાં અટકી હતી. આ અકસ્માતમાં ટેન્કરના ચાલકને નાની-મોટી ઈજાઓ પહોંચી હતી. અકસ્માત બાદ સ્થાનિક લોકો અને તંત્રની મદદથી ઈજાગ્રસ્ત ટેન્કર ચાલકને ૧૦૮ મારફતે તાત્કાલિક હોસ્પિટલ ખાતે સારવાર અર્થે ખસેડવામાં આવ્યો હતો. આ ઘટનાની જાણ થતાં પોલીસ અને વહીવટી તંત્રની ટીમ પણ સ્થળે દોડી ગઇ હતી. તંત્રની સમયસૂચકતાને કારણે સ્થાનિક લોકોએ રાહતનો શ્વાસ લીધો છે.
