- છત્તીસગઢ વિધાનસભા ચૂંટણી પહેલા EDનો મોટો ધડાકો
- કોંગ્રેસનો ચૂંટણી ખર્ચ કાઢવા માટે એપના પ્રમોટર્સે મોકલી રોકડ: ED
- ED દ્વારા ધરપકડ કરાયેલ અસીમ દાસે લીધું સીએમ બઘેલનું નામ
મહાદેવ બેટિંગ એપ કેસને લઈને એન્ફોર્સમેન્ટ ડિરેક્ટોરેટે મોટો દાવો કર્યો છે. EDએ દાવો કર્યો છે કે છત્તીસગઢના મુખ્યમંત્રી ભૂપેશ બઘેલને મહાદેવ બેટિંગ એપ સ્કેમમાં 508 કરોડ રૂપિયા આપવામાં આવ્યા છે. આ મામલે હજુ તપાસ ચાલી રહી છે. ED દ્વારા આરોપી અસીમ દાસની ધરપકડ કરવામાં આવી છે. આસિમે પૂછપરછ દરમિયાન સીએમ ભૂપેશનું નામ લીધું છે.
અહેવાલ અનુસાર, એન્ફોર્સમેન્ટ ડિરેક્ટોરેટે જણાવ્યું છે કે 2 નવેમ્બરના રોજ EDને ગુપ્ત માહિતી મળી હતી કે 7 અને 17 નવેમ્બર 2023માં યોજાનારી વિધાનસભાની ચૂંટણીને લઈને મહાદેવ બેટિંગ એપના પ્રમોટર્સ દ્વારા મોટા પ્રમાણમાં રોકડ છત્તીસગઢ લઈ જવામાં આવી રહી છે. જેને લઈને EDએ સર્ચ ઓપરેશન હાથ ધર્યું હતું.
વધુમાં EDએ જણાવ્યું હતું કે ભિલાઈમાં હોટલ ટ્રાઈટન અને અન્ય એક સ્થળે એક કેશ કુરિયર અસીમ દાસને સફળતાપૂર્વક અટકાવવામાં આવ્યો હતો. જેને ખાસ કરીને સત્તાધારી કોંગ્રેસ પાર્ટીના ચૂંટણી ખર્ચ માટે મોટી રકમની રોકડ પહોંચાડવા માટે UAEથી મોકલવામાં આવી હતી.
EDએ અસીમ દાસ પાસેથી 5.39 કરોડ રૂપિયાની રોકડ રકમ રિકવર કરી છે. સાથે જ તેની કાર અને તેના ઘરે દરોડા પાડવામાં આવ્યા હતા. અસીમ દાસે સ્વીકાર્યું છે કે જપ્ત કરાયેલ ફંડ મહાદેવ બેટિંગ એપના પ્રમોટર્સ દ્વારા છત્તીસગઢ રાજ્યમાં આગામી ચૂંટણીના ખર્ચ માટે રાજકારણીને આપવા માટે વ્યવસ્થા કરવામાં આવી હતી.
