સોમનાથમાં આવતીકાલથી કાર્તિકી પૂર્ણિમા લોકમેળાનો પ્રારંભ થશે
100 વિઘા વિશાળ સદભાવના ગ્રાઉન્ડમાં જામશે રંગત
ફાયર સેફ્ટી માટે 150થી વધુ લોકોને તાલીમ, પાંચ દિવસ ફાયર બ્રિગેડની ટીમ 24 કલાક સ્ટેન્ડબાય રહેશે
અગ્ર ગુજરાત, ગીર સોમનાથ
પ્રથમ જ્યોતિર્લિંગ સોમનાથ મહાદેવના પાવન સાનિધ્યમાં યોજાતા ઐતિહાસિક કાર્તિકી પૂર્ણિમા લોકમેળાનો આવતીકાલે તા. 20 નવેમ્બરથી ભવ્ય પ્રારંભ થશે. તા. 20થી 24 નવેમ્બર સુધી પાંચ દિવસ ચાલનારા આ લોકમેળામાં અંદાજે દસ લાખથી વધુ શ્રદ્ધાળુઓ અને મુલાકાતીઓ ઉમટી પડવાની સંભાવના છે. શ્રી સોમનાથ મંદિર ટ્રસ્ટ અને વહીવટી તંત્રના સંયુક્ત ઉપક્રમે અંદાજે 100 વિઘાના વિશાળ સદભાવના ગ્રાઉન્ડમાં મેળાનું આયોજન કરવામાં આવ્યું છે.
આવતીકાલે બપોરે 3:30 કલાકે જૂનાગઢ રેન્જના નાયબ પોલીસ મહાનિરીક્ષક રાજેન્દ્રસિંહ ચુડાસમા, જિલ્લા કલેક્ટર જીતેન્દ્રસિંહ વાઘેલા, સોમનાથ ટ્રસ્ટના ટ્રસ્ટી જે.ડી. પરમાર, જનરલ મેનેજર વિજયસિંહ ચાવડા સહિતના અધિકારીઓ અને પદાધિકારીઓની ઉપસ્થિતિમાં મેળાનો શુભારંભ થશે.
છેલ્લા ત્રણ વર્ષથી સંજોગોવશાત રાઇડ્સ બંધ રહેતાં આ વર્ષે ફરી રાઇડ્સ શરૂ થતાં મેળામાં મનોરંજનનો માહોલ જામશે. અંદાજે 16 મોટી રાઇડ્સ અને 35 જેટલી બાળકોની રાઇડ્સ ગોઠવવામાં આવી છે. મોતનો કૂવો સહિત પ્રથમવાર સુનામી, મિક્સરકાર અને જલપરી શો મુલાકાતીઓ માટે વિશેષ આકર્ષણ બનશે.
રાઇડ્સ સંચાલક યાકુબભાઈએ જણાવ્યું હતું કે, મુલાકાતીઓની સુરક્ષાને ધ્યાનમાં રાખીને રાઇડ્સ સંચાલકો દ્વારા રૂ. પાંચ કરોડનું પબ્લિક લાયબિલિટી ઇન્સ્યોરન્સ લેવામાં આવ્યું છે. દરેક રાઇડ વચ્ચે 60 ફૂટ પહોળો રસ્તો રાખવામાં આવ્યો છે અને રાઇડ્સ ગ્રાઉન્ડમાં 50થી વધુ સીસીટીવી કેમેરા તૈનાત કરવામાં આવશે.
લાખોની મેદનીને ધ્યાનમાં રાખીને ફાયર સેફ્ટી માટે વિશેષ વ્યવસ્થા કરવામાં આવી છે. ફાયર બ્રિગેડની ટીમ દ્વારા રાઇડ્સ સંચાલકો અને સ્ટોલ ધારકો સહિત 150થી વધુ લોકોને આગ જેવી આપાતકાલીન પરિસ્થિતિમાં બચાવ અને તકેદારી અંગે તાલીમ આપવામાં આવી છે. મેળાના પાંચેય દિવસ ફાયર બ્રિગેડની ટીમ જરૂરી સાધનો સાથે 24 કલાક રાઉન્ડ ધ ક્લોક સ્ટેન્ડબાય રહેશે.
મેળામાં 200થી વધુ ખાણીપીણી, હસ્તકલા અને ગ્રામ્ય ગૃહઉદ્યોગના સ્ટોલ કાર્યરત રહેશે. સૌરાષ્ટ્રની પરંપરાગત વાનગીઓ ઉપરાંત સ્થાનિક હસ્તકલાની ચીજવસ્તુઓનું વેચાણ થશે. પાંચ દિવસ દરમિયાન લોકડાયરા, ભજન, ભક્તિસંગીત અને ગુજરાતી લોકસંસ્કૃતિને ઉજાગર કરતા સાંસ્કૃતિક કાર્યક્રમો યોજાશે.
શ્રદ્ધાળુઓની સુવિધા માટે ટુ-વ્હીલર વાહનોનું નિઃશુલ્ક પાર્કિંગ, મુખ્ય માર્ગો પર વન-વે ટ્રાફિક વ્યવસ્થા, પીવાના પાણીની સુવિધા અને ચુસ્ત પોલીસ બંદોબસ્ત ગોઠવવામાં આવ્યો છે. આમ, ધાર્મિક આસ્થા સાથે મનોરંજન અને લોકસંસ્કૃતિનો સંગમ કરાવતો સોમનાથનો ઐતિહાસિક લોકમેળો આવતીકાલથી પાંચ દિવસ સુધી માનવ મહેરામણથી ગુંજી ઊઠશે.
પોલીસનો ચુસ્ત બંદોબસ્ત
વિશ્વ પ્રસિદ્ધ સોમનાથ ટ્રસ્ટ આયોજીત પાંચ દીવસીય કાર્તિક પૂર્ણિમામેળાનો તા.૨૦ નવેમ્બરથી ભવ્ય પ્રારંભ. ૭૧ વરસથી સૌરાષ્ટ્રના સૌથી પ્રસિદ્ધ આ કાર્તિક પૂર્ણિમાના મેળામાં રેન્જ આઈજી રાજેન્દ્રસિંહ ચુડાસમાના માર્ગદર્શન હેઠળ ગીર-સોમનાથમાં જીલ્લા પોલીસ વડા જયદીપસિંહ જાડેજાની આગેવાનીમાં 3 પીઆઈ, ૮ પીએસઆઈ, ૯૦ પોલીસ જવાનો, ૭૦ જીઆરડી, ૨૬ હોમગાર્ડ, ૨૨ ટીઆરબી જવાનો મેળામાં સુરક્ષા સાથે સલામતી જાળવશે. ઉપરાંત મેળામાં ૭ વોચ ટાવર ગોઠવાયેલ છે જેના ઉપરથી પોલીસ જવાનો બાજ નજર રાખશે તેમજ મેળા એરિયાને સીસીટીવી કવરેજથી નજર રખાશે.આ ઉપરાંત જીલ્લા પોલીસ તંત્ર તરફથી પોલીસ સહાયતા કેન્દ્રના બે સ્ટોલો રખાશે જેમાં મેળાના લોકોને માર્ગદર્શન અને ભુલા પડેલા લોકોને મેળાપ કરાવવા મદદરૂપ બનાશે.


