- ઈડીએ દરોડા બાદ કેન્દ્ર સરકારને કરી હતી વિનંતી
- દરોડામાં એપની ગેરકાયદેસર કામગીરીનો ખુલાસો
- છત્તીસગઢના મુખ્યમંત્રી ભૂપેશ બઘેલ સામે તપાસ
કેન્દ્ર સરકારે EDની વિનંતી પર મહાદેવ સટ્ટાબાજીની એપ પર પ્રતિબંધ લગાવી દીધો છે. ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલયે મહાદેવ બુક અને ReddyAnnaPristoPro સહિત 22 ગેરકાયદેસર સટ્ટાબાજીની એપ્સ અને વેબસાઈટ્સને બ્લોક કરવાના આદેશો આપ્યા છે.
મહાદેવ એપ પર પ્રતિબંધ
કેન્દ્ર સરકારે મહાદેવ સટ્ટાબાજીની એપ પર પ્રતિબંધ મૂક્યો છે. આ કાર્યવાહી ED દ્વારા ગેરકાયદેસર સટ્ટાબાજી એપ સિન્ડિકેટ સામે હાથ ધરવામાં આવેલી તપાસ અને ત્યારબાદ છત્તીસગઢમાં મહાદેવ બુક પરના દરોડા બાદ કરવામાં આવી છે. આ દરોડામાં એપની ગેરકાયદેસર કામગીરીનો પણ ખુલાસો થયો છે. જેમાં છત્તીસગઢ પોલીસ ફોર્સમાં કોન્સ્ટેબલ તરીકે કામ કરતા આરોપી ભીમ સિંહ યાદવ અને અસીમ દાસને કસ્ટડીમાં લેવામાં આવ્યા હતા. મની લોન્ડરિંગના ગુના માટે પ્રિવેન્શન ઓફ મની લોન્ડરિંગ એક્ટની કલમ 19 હેઠળ તેમની ધરપકડ કરવામાં આવી છે.
છત્તીસગઢ સરકારે નથી કરી કોઈ કાર્યવાહી
કૌશલ્ય વિકાસ અને ઉદ્યોગસાહસિકતા અને ઈલેક્ટ્રોનિક્સ અને ઈન્ફોર્મેશન ટેક્નોલોજીના કેન્દ્રીય રાજ્ય મંત્રીએ કહ્યું હતું કે “છત્તીસગઢ સરકાર પાસે આઈટી એક્ટની કલમ 69A હેઠળ વેબસાઈટ/એપ બંધ કરવાની ભલામણ કરવાની સંપૂર્ણ સત્તા હતી. જો કે તેમણે તેમ કર્યું ન હતું અને કોઈ વિનંતી કરી ન હતી. સરકાર છેલ્લા દોઢ વર્ષથી આ અંગે તપાસ કરી રહી છે. ED તરફથી આ પ્રથમ અને એકમાત્ર વિનંતી છે જેના પર આ પ્રક્રિયા કરવામાં આવી છે. છત્તીસગઢ સરકારને આવી વિનંતીઓ કરતા કોઈએ રોકી ન હતી.
મુખ્યમંત્રીને રૂ. 508 કરોડ ચૂકવવાનું એપ પ્રમોટરોને કહેવામાં આવ્યું
ઉલ્લેખનીય છે કે કેન્દ્રીય તપાસ એજન્સી ED છત્તીસગઢના મુખ્યમંત્રી ભૂપેશ બઘેલ વિરુદ્ધ મહાદેવ સત્તા એપ કેસની તપાસ કરી રહી છે. EDએ એમ પણ કહ્યું હતું કે એપ પ્રમોટર્સે મુખ્યમંત્રીને રૂ. 508 કરોડથી વધુની ચૂકવણી કરી હતી. આ મામલે કોંગ્રેસે ચૂંટણી પ્રચાર દરમિયાન રાજ્યમાં સુરક્ષા સંભાળી રહેલી કેન્દ્રીય સુરક્ષા એજન્સી CRPF પર પણ સવાલો ઉઠાવ્યા હતા.
