- અમેરિકન ટ્રેઝરી માર્કેટમાં વ્યવહારો ઠપ થયાં
- 2022ના અંતે ICBCની કુલ 5.74 લાખ કરોડ ડોલરની અસ્ક્યામતો હતી
- હુમલા પાછળ રશિયન રેન્સમવેર સિન્ડિકેટ લૉકબિટનો હાથ
અસ્કયામતોની દૃષ્ટિએ વિશ્વની સૌથી મોટી બેંક ઇન્ડસ્ટ્રીયલ એન્ડ કોમર્શિયલ બેંક ઓફ ચાઇના લિમિટેડ (ICBC) પર રેન્સમવેર એટેકના પગલે આ બેંકના અમેરિકી યુનિટને અસર થઇ છે અને અમેરિકાના ટ્રેઝરી માર્કેટમાં વ્યવહારો ઠપ થયા છે. ICBCની વેબસાઇટ પર શુક્રવારે એક નિવેદન જારી કરીને જણાવાયું હતું કે બેંક પર આ અઠવાડિયે થયેલા રેન્સમવેર એટેકથી સિસ્ટમ આંશિક રીતે અવરોધાઇ હતી. જોકે હુમલાની અસર મર્યાદિત કરવા તેણે સિસ્ટમનો અમુક હિસ્સો ડિસકનેક્ટ કરી દીધો છે. નોંધનીય છે કે ગત વર્ષના અંતે ICBCની કુલ 5.74 લાખ કરોડ ડોલરની અસ્કયામતો હતી.
ICBCના ન્યૂયોર્ક સ્થિત એકમે કહ્યું કે તે હુમલાની તપાસ કરી રહી છે અને સાઇબર સિક્યોરિટી તથા સુરક્ષા એજન્સીઓને પણ જાણ કરાઇ છે. ICBCના બેન્કિંગ, ઇમેલ તથા અન્ય સેવાઓ પર હુમલાની અસર નથી થઇ. સાઇબર સિક્યોરિટી એક્સપટ્ર્સની અત્યાર સુધીની તપાસમાં સામે આવ્યા મુજબ હુમલા પાછળ રશિયન રેન્સમવેર સિન્ડિકેટ લૉકબિટનો હાથ હોવાનું કહેવાય છે.
ICBC પર રેન્સમવેર એટેક અંગે યુએસ સિક્યોરિટીઝ ઇન્ડસ્ટ્રી એન્ડ ફાયનાન્સિયલ માર્કેટ્સ એસોસિયેશને શુક્રવારે તેના સભ્યોને જાણ કરી હતી. સાથે એમ પણ કહ્યું કે આ રેન્સમવેર એટેકના કારણે અમેરિકી ટ્રેઝરી માર્કેટમાં વ્યવહારો પર અસર થઇ પરંતુ કોઇ મોટા નુકસાનના અહેવાલ નથી.
એટેક માટે જવાબદાર લૉકબિટ શું છે?
લૉકબિટ એક સાઇબર ક્રાઇમ સિન્ડિકેટ છે, જે મોટી કંપનીઓ, જૂથો અને બેંકોને ટારગેટ કરી યૂઝર્સના ડેટાના બદલામાં તગડી રકમ પડાવે છે. અમુક કિસ્સામાં જે-તે કંપની કે બેંકની કમ્પ્યૂટર સિસ્ટમ લૉક કરી દે છે. આ વસૂલી તે સામાન્ય રીતે બિટકોઇનમાં કરે છે. લૉકબિટના સભ્યો માત્ર રશિયામાં નહીં પણ યુરોપ, અમેરિકા, ઇન્ડોનેશિયા, ભારત અને ચીન સહિત દુનિયાના ખૂણે ખૂણે ફેલાયેલા છે.
એક હજાર ઓર્ગેનાઇઝેશન્સ લૉકબિટનો શિકાર બની ચૂક્યા છે
લૉકબિટે તાજેતરમાં બોઇંગના પાટ્ર્સનું ડિસ્ટ્રિબ્યૂશન સંભાળતી કંપની પર પણ રેન્સમવેર એટેક કર્યો હતો. બ્રિટનની રોયલ મેલ, ION ટ્રેડિંગ યુકે અને જાપાનના બંદર પર સાઇબર હુમલામાં પણ લૉકબિટનું જ નામ સામે આવ્યું હતું. હેકર્સનું આ ગ્રૂપ 2019થી સક્રિય છે.
લૉકબિટ કેવી રીતે કામ કરે છે?
લૉકબિટ પણ અન્ય હેકર્સની જેમ ફિશિંગ ઇમેલ મોકલે છે કે પછી નેટવર્ક હેક કરી લે છે. એકવાર નેટવર્ક સુધી પહોંચી ગયા બાદ સૌપ્રથમ ડેટા કબજે કરી લે છે કેમ કે જો સાઇબર સિક્યોરિટી ટીમ સમયસર એક્ટિવ થઇ જાય તો હુમલો નિષ્ફળ પણ બનાવી શકે છે. ડેટા હાથમાં આવી ગયા બાદ વસૂલીનો ખેલ શરૂ થાય છે.
દર વખતે અલગ પદ્ધતિથી એટેક કરે છે
લૉકબિટની સૌથી ખાસ વાત એ છે કે તે દરેક હુમલામાં નવા હેકિંગ ટૂલનો ઉપયોગ કરે છે, જેથી સાઇબર સિક્યોરિટી તેની ઓળખ ન કરી શકે. કેસ્પરસ્કીના કહેવા પ્રમાણે લૉકબિટ પોતાની સર્વિસીસ પ્રોવાઇડ પણ કરે છે. મતલબ કે કોઇ ઇચ્છે તો તેના હેકર્સના માધ્યમથી અન્ય કંપનીને નિશાન બનાવી શકે છે.
