- વર્લ્ડકપ 2023ની લીગ મેચ થઈ છે પૂર્ણ
- આવતીકાલથી વર્લ્ડકપની સેમીફાઈનલ મેચ શરૂ થશે
- ભારત અને ન્યૂઝીલેન્ડ વચ્ચે આવતીકાલે પ્રથમ સેમીફાઈનલ રમાશે
ભારત અને ન્યૂઝીલેન્ડ વચ્ચેની વર્લ્ડકપ સેમીફાઇનલ મેચ હવે ખૂબ નજીક છે. આ મેચમાં ભારતીય ટીમનું પલડું ભારે છે. જો કે, ICC ટૂર્નામેન્ટમાં ન્યૂઝીલેન્ડના ખેલાડીઓએ ભારતીય ટીમ પર પ્રભુત્વ જમાવ્યું છે, પરંતુ છેલ્લી મેચમાં ટીમ ઈન્ડિયાએ આ ભ્રમ તોડી નાખ્યો હતો. આવી સ્થિતિમાં બંને ટીમો વચ્ચે બરાબરીનો મુકાબલો છે તેમ કહી શકાય છે. જે ટીમ 15મી નવેમ્બરે પોતાનું સર્વશ્રેષ્ઠ પ્રદર્શન કરશે તે જીતશે. જો કે, ટીમોના પ્રદર્શન ઉપરાંત ટોસ પણ એક પરિબળ હશે જે જીત અથવા હાર નક્કી કરવામાં નિર્ણાયક ભૂમિકા ભજવશે.
પ્રથમ બેટિંગ કરનારી ટીમને થશે ફાયદો
ભારત અને ન્યૂઝીલેન્ડ વચ્ચેની આ સેમીફાઈનલ મેચ વાનખેડેમાં રમવામાં આવશે. આ મેચ બપોરે 2 વાગ્યે શરૂ થશે. એટલે કે બીજી ઇનિંગ્સ રાત્રે રમાશે. આ વર્લ્ડકપમાં વાનખેડે સ્ટેડિયમમાં જોવા મળ્યું છે કે રાત્રે બીજી ઈનિંગ દરમિયાન બેટિંગ કરવી ઘણી મુશ્કેલ રહી છે. અહીં નવા બોલને પ્રકાશમાં સારો સ્વિંગ મળે છે અને આ સ્વિંગ પણ લાંબા સમય સુધી અકબંધ રહે છે. આ કારણે આ મેદાન પર ડે-નાઈટ મેચોમાં પ્રથમ બેટિંગ કરનારી ટીમને સારી સફળતા મળી છે.
વાનખેડેમાં વર્લ્ડકપ 2023ની 4 મેચ રમાઈ
વર્લ્ડકપ 2023માં અત્યાર સુધી અહીં ચાર મેચ રમાઈ છે. ચારેય મેચ ડે-નાઈટ રહી છે. ચારેય મેચોમાં લગભગ સમાન સ્થિતિ હતી. પ્રથમ બેટિંગ કરનારી ટીમે જોરદાર સ્કોર બનાવ્યો છે, જ્યારે રનનો પીછો કરતી ટીમે સાધારણ સ્કોર બનાવ્યો છે. ઓસ્ટ્રેલિયા-અફઘાનિસ્તાન મેચ ચોક્કસપણે આમાં અપવાદ રહી છે, પરંતુ અહીં પણ ઓસ્ટ્રેલિયાએ પીછો કરતા 100 રનની અંદર 7 વિકેટ ગુમાવી દીધી હતી. પાછળથી પિચે સપોર્ટ આપવાનું બંધ કરી દીધું અને મેક્સવેલે અફઘાન બોલરોને પછાડી દીધા હતા.
પ્રથમ બેટિંગ અને બોલિંગના સ્કોરમાં છે ઘણું અંતર
જો આપણે વર્લ્ડકપ 2023માં વાનખેડે મેદાન પર રમાયેલી ચાર મેચોના આંકડાઓ પર નજર કરીએ તો, પ્રથમ બેટિંગ કરનારી ટીમોના સ્કોરમાં ઘણો તફાવત છે. આ ટૂર્નામેન્ટમાં, પ્રથમ બેટિંગ કરનારી ટીમનો સરેરાશ સ્કોર 357/6 છે, જ્યારે પાછળથી બેટિંગ કરનારી ટીમનો સરેરાશ સ્કોર 188/9 છે. આ સ્કોર પરથી સમજી શકાય છે કે આ મેદાન પર રાત્રે રનનો પીછો કેટલી હદે ઘાતક સાબિત થઈ શકે છે.
પ્રથમ પાવરપ્લેના આંકડા ચોંકાવનારા
વાનખેડે ખાતે વર્લ્ડકપ 2023માં બેટિંગ પહેલા અને પછીના પ્રથમ પાવરપ્લે (1-10 ઓવર)ના આંકડાઓનું જ વિશ્લેષણ કરવામાં આવે તો તફાવત સ્પષ્ટપણે દેખાય છે.પ્રથમ પાવરપ્લેમાં પ્રથમ બેટિંગ કરનારી ટીમનો સરેરાશ સ્કોર 1 વિકેટના નુકસાન પર 52 રન છે, જ્યારે બીજી ઇનિંગમાં આ સ્કોર 4 વિકેટના નુકસાન પર 42 રન પર આવી ગયો છે. એટલે કે મેચની જીત કે હારનો નિર્ણય પહેલા પાવરપ્લેમાં જ થાય છે.
‘ટોસ જીતો, મેચ જીતો’ ફોર્મ્યુલા
વાનખેડેના આંકડાઓ જોતા સ્પષ્ટ છે કે ટોસ જીતનારી ટીમ અહીં પહેલા બેટિંગ કરવાનું પસંદ કરશે. અહીં પહેલા બેટિંગ કરીને મેચ જીતવી સરળ રહેશે. જો કે, જો રનનો પીછો કરતી ટીમ કોઈક રીતે પ્રથમ 20 ઓવર આરામથી રમી લે તો બાકીની ઓવરોમાં બેટિંગ કરવી સરળ બની જશે. અહીં છેલ્લી 30 ઓવરમાં બેટિંગ કરવી બપોર કરતાં વધુ સરળ રહેશે.
