- મંત્રીના નકલી પીએ બાદ નકલી ડીવાયએસપીની ધરપકડ
- વિનીત બંસીલાલ દવે નામના શખ્સની ધરપકડ
- અંદાજિત રૂપિયા 2.11 કરોડની આચરી છે છેતરપિંડી
જુનાગઢમાંથી નકલી ડીવાયએસપી ઝડપાયો છે. મંત્રીના નકલી પીએ બાદ નકલી ડીવાયએસપીની ધરપકડ કરવામાં આવી છે. વિનીત બંસીલાલ દવે નામના શખ્સની ધરપકડ કરવામાં આવી છે. પોલીસના નકલી આઈડી સાથે રોફ જમાવતો હતો.
પશુપાલન મંત્રીના બોગસ પી.એ. બાદ હવે નકલી DYSP ઝડપાયો
જૂનાગઢમાં પશુપાલન મંત્રીના બોગસ પી.એ. બાદ હવે નકલી DYSP ઝડપાયો છે, આ મામલે લોકલ ક્રાઈમ બ્રાંચે શહેરના વિનિત બંસીલાલ દવે ઉ.37 નામના ઇસમ સામે પોલીસ સ્ટેશનમાં ગુન્હો નોધાવ્યો છે. વિનીત દવે કોર્ટમાં ડ્રાઈવર તરીકે ફરજ બજાવતો હોવાનું સામે આવ્યું છે. અને તેણે પોલીસકર્મીના ઓળખકાર્ડમાં પોલીસકર્મીના ફોટા ઉપર પોતાનો ફોટો લગાવીને નકલી ડીવાયએસપી અને પોલીસકર્મી હોવાની ઓળખ આપીને અત્યાર સુધીમાં 17 જેટલા લોકોને પોલીસ ખાતામાં નોકરી અપાવી દેવાની લાલચ આપીને આશરે 2.11 કરોડ જેવી માતબર રકમ ખંખેરી લઈને વિશ્વાસઘાત છેતરપીંડી કરી હોવાનું સામે આવ્યું છે, હાલ તો પોલીસે નકલી ડીવાયએસપીની ધરપકડ કરીને વધુ તપાસ શરુ કરી છે.
અંદાજિત રૂપિયા 2.11 કરોડની છેતરપિંડી આચરી
ઉલ્લેખનીય છે કે અંદાજિત રૂપિયા 2.11 કરોડની છેતરપિંડી આચરી છે. પોલીસ ખાતામાં નોકરી અપાવીને લોકોને છેતર્યા છે. વિનીત બંસીલાલ દવે જ્યુડિશિયલ કોર્ટમાં ડ્રાઇવર તરીકે ફરજ બજાવે છે. ચાલુ કોન્સ્ટેબલની નોકરી કરતા બે કર્મચારીના આઈકાર્ડ મળ્યા છે. પોલીસ કર્મચારીઓના કાર્ડ ઉપર પોતાનો ફોટો લગાવી રોફ જમાવતો હતો. જેમાં પોલીસ ખાતામાં નોકરી અપાવાની લાલચ આપી લોકોને છેતર્યા છે.
જુનાગઢમાંથી રાજ્યકક્ષાના મંત્રીના નકલી પીએ પકડાયો હતો
તાજેતરમાં જુનાગઢમાંથી રાજ્યકક્ષાના મંત્રીના નકલી પીએ પકડાયો હતો. તેમાં તેની વિરુદ્ધ ત્રીજી ફરિયાદ દાખલ કરવામાં આવી છે. રૂપિયા 25 લાખની સહાય અપાવાના બહાને લાખોની ઠગાઇ કરવામાં આવી હતી. જૂનાગઢ પોલીસે નકલી MLA બની કારમાં એમએલએનું પાટિયું રાખી રોફ જમાવતા નકલી ધારસભ્ય રાજેશ જાદવ નામના શખ્સને જૂનાગઢ પોલીસે ઝડપી લીધા બાદ આ નકલી MLAની એક પછી એક કરતૂતો સામે આવી રહી છે.
મહિલાને વિશ્વાસમાં લઈ અત્યાર સુધીમાં 18 લાખ રૂપિયાની છેતરપિંડી કરી
જૂનાગઢ જિલ્લાના માણાવદરમાં એક વિધવા મહિલાને વિશ્વાસમાં લઈ અત્યાર સુધીમાં 18 લાખ રૂપિયાની છેતરપિંડી કરી છે. વિશ્વાસઘાત કરતા માણાવદર પોલીસ મથકમાં મહિલાએ ફરિયાદ નોંધાવી હતી. ફરિયાદી રેખા મેરના પતિનું 2021માં કોરોનાથી અવસાન થતાં તેમના નામની 25 લાખ રૂપિયાની આર્થિક સહાય અપાવી દેવા તેમજ મહિલાના પુત્રને સરકારી નોકરી આપવાની લાલચ આપી કુલ 18 લાખ રૂપિયા પડાવ્યા હતા. ત્યારબાદ ફરિયાદી મહિલા સાથે સંપર્ક તૂટી ગયા બાદ આ નકલી MLA ઝડપાતા મહિલાએ ફરી માણાવદર પોલીસ મથકમાં ફરિયાદ નોંધાવતા પોલીસે વધુ તપાસ હાથ ધરી હતી.
