- ગૌતમ ગંભીરની કોલકાતા નાઈટ રાઈડર્સમાં એન્ટ્રી
- ગંભીરે થિંક ટેન્ક મીટિંગનું નેતૃત્વ કર્યું
- શ્રેયસ ઐયર કરશે KKRનું નેતૃત્વ
આઈપીએલ 2024માં ગૌતમ ગંભીર તેની જૂની ટીમ કોલકાતા નાઈટ રાઈડર્સમાં જોવા મળશે. આઈપીએલ 2022 અને 2023 સુધી ગૌતમ ગંભીર લખનૌ સુપર જાયન્ટ્સ સાથે મેન્ટર તરીકે જોડાયેલા હતા. હવે ગૌતમ ગંભીર KKRનો મેન્ટર બની ગયો છે.
આઈપીએલ 2024ની હરાજી પહેલા ગૌતમ ગંભીરે કોલકાતા નાઈટ રાઈડર્સની થિંક ટેન્ક મીટિંગનું નેતૃત્વ કર્યું હતું. KKRની થિંક ટેન્ક મીટિંગમાં ગૌતમ ગંભીર ઉપરાંત મુખ્ય કોચ ચંદ્રકાંત પંડિત, સહાયક કોચ અભિષેક નાયર અને મેનેજિંગ ડિરેક્ટર વેંકી મૈસૂર પણ હાજર હતા.
શ્રેયસ IPL 2024માં KKRની કેપ્ટનશીપ કરશે
શ્રેયસ ઐયર ઈજાના કારણે IPL 2023માં રમી શક્યો ન હતો. જે બાદ KKRએ નીતિશ રાણાને ટીમનો નવો કેપ્ટન બનાવ્યો હતો. પરંતુ હવે શ્રેયસ ઐયર સંપૂર્ણ રીતે ફિટ થઈને મેદાનમાં પાછો ફર્યો છે અને ટીમ ઈન્ડિયા માટે એક પછી એક શાનદાર ઈનિંગ્સ રમી રહ્યો છે. આવી સ્થિતિમાં શ્રેયસ ઐયર ફરી એકવાર IPL 2024માં KKRની કેપ્ટનશિપ કરતો જોવા મળશે. હવે KKR પણ IPL 2024ની હરાજીમાં ખેલાડીઓ પર બોલી લગાવવા માટે તૈયાર છે.
હરાજીમાં ફાસ્ટ બોલર પર રહેશે નજર
આઈપીએલ 2024ની હરાજીમાં કોલકાતા નાઈટ રાઈડર્સની નજર ફાસ્ટ બોલર પર રહેશે. હરાજી પહેલા KKRએ તેના બે બોલર શાર્દુલ ઠાકુર અને લોકી ફર્ગ્યુસનને બહાર કર્યા હતા. જે બાદ KKRનો ફાસ્ટ બોલિંગ વિભાગ થોડો નબળો દેખાઈ રહ્યો છે.
બીજી તરફ પેટ કમિન્સ પણ આ વખતે આઈપીએલમાં ભાગ લઈ રહ્યો છે. પેટ કમિન્સે તેની છેલ્લી સિઝન કોલકાતા માટે જ રમી હતી. હવે KKR ફરી એકવાર પેટ કમિન્સને પોતાની ટીમમાં સામેલ કરવા ઈચ્છે છે. બીજી તરફ, KKRની નજર પણ દક્ષિણ આફ્રિકાના ફાસ્ટ બોલર ગેરાલ્ડ કોએત્ઝી પર હશે. ગેરાલ્ડ પહેલીવાર IPLમાં ભાગ લેવા જઈ રહ્યો છે.
