- ચાણક્યપુરી પોલીસ સ્ટેશને કરી મહાઠગની ધરપકડ
- હરિયાણાના ઠગે અનેકને છેતરપિંડીનો ચૂનો ચોપડ્યો
- તાજ પેલેસ હોટેલ સાથે ઠગાઇ કરી થયો હતો ફરાર
નવી દિલ્હીના ચાણક્યપુરી પોલીસ સ્ટેશનની પોલીસે હરિયાણાના એક ઠગની ધરપકડ કરી છે. આ શખ્સ હરિયાણા માટે અંડર-19 ક્રિકેટ રમી ચૂક્યો છે. આરોપીની ઓળખ મૃણાક સિંહ તરીકે થઈ છે. તેણે જુલાઈ 2022માં તાજ પેલેસ હોટલ સાથે 5,53,000 રૂપિયાની છેતરપિંડી કરી હતી. ત્યારબાદ તેણે દાવો કર્યો હતો કે તે IPLની મુંબઈ ઈન્ડિયન્સ ટીમનું પ્રતિનિધિત્વ કરી રહ્યો છે.
તપાસ દરમિયાન સામે આવ્યું હતું કે આરોપી મૃણાક સિંહે કર્ણાટકના વરિષ્ઠ IPS અધિકારી હોવાનો ઢોંગ કરીને ભારતભરની ઘણી લક્ઝરી હોટલોના માલિકો અને સંચાલકો સાથે છેતરપિંડી કરી હતી. તેની છેતરપિંડીનો ભોગ બનેલા લોકોમાં ટીમ ઈન્ડિયાનો આંતરરાષ્ટ્રીય ક્રિકેટર રિષભ પંત પણ સામેલ છે, જેમની સાથે 2020-2021માં 1.63 કરોડ રૂપિયાની છેતરપિંડી કરવામાં આવી હતી.
અનેક લોકોને બનાવ્યા ઠગાઇના શિકાર
પકડાયેલ શખ્સે હોટલ, બાર, રેસ્ટોરન્ટ, યુવતીઓ, કેબ ડ્રાઈવર, નાની ખાણીપીણીની દુકાનો સહિત અનેક લોકો સાથે છેતરપિંડી કરી છે. તેના મોબાઈલની પ્રાથમિક તપાસમાં તે યુવાન મહિલા મોડલ અને યુવતીઓ સાથે પરિચયમાં હોવાનું બહાર આવ્યું છે. તેના મોબાઈલમાંથી ઘણા વીડિયો અને તસવીરો મળી આવી છે, જેમાંથી કેટલાક અત્યંત વાંધાજનક છે.
પોલીસે તેને કોર્ટમાં રજૂ કરી બે દિવસની કસ્ટડી લીધી હતી. આ કેસની વધુ તપાસ કરવામાં આવી રહી છે અને તેના મોબાઈલ ફોનનું પણ વિશ્લેષણ કરવામાં આવી રહ્યું છે. આ કેસમાં હજુ પણ ઘણા પીડિતો સામે આવે તેવી શક્યતા છે.
હોટેલ તાજે નોંધાવી હતી FIR
જણાવી દઈએ કે, 22 ઓગસ્ટ 2022ના રોજ તાજ પેલેસ હોટલ નવી દિલ્હીના સિક્યોરિટી ડિરેક્ટરે ચાણક્યપુરી પોલીસ સ્ટેશનમાં આરોપી વિરુદ્ધ ફરિયાદ નોંધાવી હતી. કહેવાય છે કે, ક્રિકેટર હોવાનો દાવો કરનાર શખ્સ મૃણાંક સિંહ 22 જુલાઈથી 29 જુલાઈ 2022 સુધી હોટેલ તાજ પેલેસમાં રોકાયો હતો. તે હોટલનું 5,53,362 રૂપિયાનું બિલ ચૂકવ્યા વિના જ હોટલમાંથી નીકળી ગયો હતો. જ્યારે તેને પેમેન્ટ માટે પૂછવામાં આવ્યું ત્યારે તેણે કહ્યું કે તેની કંપની એડિડાસ પેમેન્ટ કરશે.
ત્યારબાદ, હોટેલ બેંકની વિગતો તેમની સાથે શેર કરવામાં આવી હતી. તેણે 2 લાખ રૂપિયાના ઓનલાઈન ટ્રાન્ઝેક્શનનો UTR નંબર SBIN119226420797 શેર કર્યો. તરત જ, હોટેલ સિસ્ટમમાં તપાસ કરવામાં આવી હતી અને જાણવા મળ્યું હતું કે આરોપીએ કોઈ પેમેન્ટ નહોતું કરવામાં આવ્યું.
પેમેન્ટ માટે સતત બહાના બનાવટો રહ્યો
ત્યારબાદ, હોટેલ તાજ વતી પેમેન્ટ સંબંધિત કાર્યવાહી માટે મૃણાક સિંહ અને તેના મેનેજર ગગન સિંહનો તેમના મોબાઈલ પર સંપર્ક કરવામાં આવ્યો. તેમણે કહ્યું કે તે તેના ડ્રાઈવરને બાકી રકમની ચુકવણી માટે રોકડ સાથે મોકલી રહ્યો છે. પરંતુ, કોઈ હોટલ આવ્યું નહિ. બાકી રકમના પેમેન્ટ માટે આરોપીનો અનેકવાર સંપર્ક કરવામાં આવ્યો હતો. પરંતુ, દરેક વખતે તે ખોટા નિવેદનો અને વચનો આપીને ખોટી માહિતી આપતો રહ્યો.
પિતાએ કહ્યું: તેને મિલકતમાંથી કાઢી મૂકવામાં આવ્યો છે
તપાસ દરમિયાન આરોપી મૃણાંક સિંહના સરનામે CrPCની કલમ 41A હેઠળ નોટિસ મોકલવામાં આવી હતી. પરંતુ, તે ત્યાં હાજર નહોતો. તેના પિતાએ પોલીસને જણાવ્યું કે તેમણે મૃણાક સિંહને તેની મિલકતમાંથી કાઢી મૂક્યો હતો. પિતાનું કહેવું છે કે મૃણાંક તેમના કહ્યામાં નથી.
ચાણક્યપુરી પોલીસ સ્ટેશને આરોપી મૃણાંક સિંહને શોધવા માટે તમામ શક્ય પ્રયાસો કર્યા હતા. પરંતુ તેનો કોઈ પત્તો લાગ્યો ન હતો. તે વારંવાર પોતાનું લોકેશન બદલી રહ્યો હતો અને પોલીસ તપાસથી બચવા તમામ ઉપાય કરતો રહ્યો પરંતુ આખરે તે પોલીસના હાથે ઝડપાઇ ગયો.
