- BCCI એ પુરૂષોની સિલેક્શન કમિટી મેમ્બર માટે અરજીઓ મંગાવી
- સલિલ અંકોલા પસંદગી સમિતિમાંથી થઈ શકે છે બહાર
- અરજી કરનાર વ્યક્તિએ પાંચ વર્ષ પહેલા ક્રિકેટમાંથી નિવૃત્તિ લઈ લીધી હોવી જોઈએ
ભારતીય ક્રિકેટ કંટ્રોલ બોર્ડ (BCCI) એ પુરૂષોની સિલેક્શન કમિટી મેમ્બર માટે અરજીઓ મંગાવી છે. જોકે, પસંદગી સમિતિમાં માત્ર એક જ જગ્યા માટે અરજીપત્રક આપવામાં આવ્યું છે. BCCIએ આ અરજી ફોર્મની માહિતી પોતાની વેબસાઈટ દ્વારા આપી હતી. જો કે વર્તમાન પસંદગી સમિતિના કયા સભ્યનું પત્તુ સાફ થશે તે અંગે સ્પષ્ટતા કરવામાં આવી નથી.
સલિલ અંકોલા થશે બહાર?
વર્તમાન પસંદગી સમિતિની વાત કરીએ તો અજીત અગરકરની આગેવાની હેઠળની પસંદગી સમિતિમાં શિવ સુંદર દાસ, સુબ્રતો બેનર્જી, સલિલ અંકોલા અને શ્રીધરન શરથ હાજર છે. જો મીડિયા રિપોર્ટ્સનું માનીએ તો, સલિલ અંકોલા પસંદગી સમિતિમાંથી બહાર થઈ શકે છે, જેમના સ્થાનની ભરપાઇ કરવા માટે અરજીઓ મંગાવવામાં આવી રહી છે.
BCCIની વેબસાઇટ પર સબમિટ કરી શકશો અરજી
પસંદગી સમિતિની પોસ્ટ વિશે વાત કરીએ તો, અરજીઓ સબમિટ કરવાની છેલ્લી તારીખ 25મી જાન્યુઆરી છે, જે BCCIની વેબસાઇટ પર સબમિટ કરી શકાય છે. આ પછી પસંદગીના ઉમેદવારોને વ્યક્તિગત ઇન્ટરવ્યુ માટે બોલાવવામાં આવશે. આ પદ માટેની યોગ્યતા વિશે વાત કરીએ તો, અરજી કરનાર વ્યક્તિએ પાંચ વર્ષ પહેલા ક્રિકેટમાંથી નિવૃત્તિ લઈ લીધી હોવી જોઈએ અને છેલ્લા પાંચ વર્ષમાં કોઈપણ પસંદગી સમિતિનો સભ્ય ન હોવો જોઈએ.
આ બધા સિવાય, અરજી કરનાર વ્યક્તિએ ઓછામાં ઓછી 7 ટેસ્ટ અથવા 30 ફર્સ્ટ ક્લાસ મેચ અથવા 10 ODI અને 20 ફર્સ્ટ ક્લાસ મેચ રમી હોવી જોઈએ.
અફઘાનિસ્તાન સામે ટી-20 સિરીઝ રમી રહી છે ટીમ ઈન્ડિયા
નોંધનીય છે કે આ દિવસોમાં ભારતીય ટીમ અફઘાનિસ્તાન સામે ત્રણ મેચની T20 સિરીઝ રમી રહી છે. સિરીઝમાં બે મેચ રમાઈ છે, જે જીતીને ભારતીય ટીમે સિરીઝ જીતી લીધી છે. હવે સિરીઝની ત્રીજી અને છેલ્લી મેચ 17 જાન્યુઆરી, બુધવારે બેંગ્લોરના એમ ચિન્નાસ્વામી સ્ટેડિયમમાં રમાશે. ટી20 વર્લ્ડ કપ 2024 પહેલા ટીમ ઈન્ડિયા માટે આ છેલ્લી ટી20 સિરીઝ છે. આ પછી ભારતીય ખેલાડીઓ માત્ર IPL રમશે.
