- ફ્લોરિડા અને ડલ્લાસમાં વર્લ્ડકપની ચાર-ચાર મેચ રમાશે
- ટીમ ઈન્ડિયા ડલ્લાસમાં એક પણ ગ્રુપ મેચ નહીં રમે
- ચેન્નાઈ સુપર કિંગ્સની પેટા ફ્રેન્ચાઇઝી ડલ્લાસ સુપર કિંગ્સ મેજર લીગનો ભાગ
T20 વર્લ્ડકપ 2024 1 જૂનથી શરૂ થવાનો છે, જેની યજમાની યુએસએ અને વેસ્ટ ઈન્ડિઝ કરશે. આ ટૂર્નામેન્ટ સંયુક્ત રીતે અમેરિકા અને કેરેબિયન ટાપુઓમાં યોજાવા જઈ રહી છે. આ માટે USKના ત્રણ સ્થળોની પસંદગી કરવામાં આવી છે. અમેરિકામાં ન્યૂયોર્ક, ફ્લોરિડા અને ડલ્લાસમાં મેચ યોજાવાની છે. ન્યૂયોર્કને સૌથી વધુ આઠ મેચ મળી છે. ફ્લોરિડા અને ડલ્લાસમાં ચાર-ચાર મેચ રમાશે. જો ગ્રુપ સ્ટેજની વાત કરીએ તો તમામ ટીમો ચાર-ચાર મેચ રમશે. ન્યૂયોર્કમાં ટીમ ઈન્ડિયાની ત્રણ મેચ થઈ છે જ્યારે એક મેચ ફ્લોરિડામાં રમાશે.
ડલ્લાસમાં એક પણ ગ્રુપ મેચ નહીં રમે ભારતીય ટીમ
ટીમ ઈન્ડિયા ડલ્લાસમાં એક પણ ગ્રુપ મેચ નહીં રમે. અહીં સુપર 8ની એક પણ મેચ રમાશે નહીં. જેના કારણે હવે સવાલો ઉઠી રહ્યા છે. એવું કહેવામાં આવી રહ્યું છે કે તાજેતરમાં યુએસ ટી20 લીગ (મેજર લીગ ક્રિકેટ)ની પ્રથમ આવૃત્તિનું આયોજન કરવામાં આવ્યું હતું. આ લીગમાં ડલ્લાસ મુખ્ય સ્થળ હતું. પરંતુ હવે આ મેદાનને વર્લ્ડકપ માટે માત્ર ચાર મેચો જ મળી છે. જેમાંથી ટીમ ઈન્ડિયાની એક પણ મેચ આ મેદાન પર રમાશે નહીં. હવે ચેન્નાઈ સુપર કિંગ્સના સીઈઓ કાશી વિશ્વનાથને આ અંગે આઈસીસીને પત્ર લખ્યો છે.
શિડ્યૂલ બદલાશે?
ચેન્નાઈ સુપર કિંગ્સની પેટા ફ્રેન્ચાઇઝી ડલ્લાસ સુપર કિંગ્સ મેજર લીગનો ભાગ રહી છે. CSKના CEO કાશી વિશ્વનાથન પણ આનું સંચાલન કરે છે. તેમણે જણાવ્યું હતુ કે મે ICCને પત્ર લખ્યો છે કે ભારતની ઓછામાં ઓછી એક મેચ ડલ્લાસમાં રાખવામાં આવે. તેમણે કહ્યું, ‘જો ICC અમેરિકામાં ક્રિકેટને પ્રોત્સાહન આપવા માંગે છે, તો તેણે ઓછામાં ઓછી એક ભારતની મેચ ડલ્લાસને આપવી જોઈતી હતી.’ તેનો અર્થ એ છે કે જો ડલ્લાસને ભારતની મેચ પાછળથી મળે છે, તો વર્લ્ડકપનું શિડ્યૂલ બદલાઈ શકે છે.
ICCએ મેચ કેમ ન આપી?
એક અહેવાલ અનુસાર ICCએ વિવિધ કારણોસર ડલ્લાસને ભારતની એક પણ મેચ આપી નથી. તેની પાછળ ઘણા ઓપરેશનલ પડકારો છે. તેની પાછળનું પહેલું સૌથી મોટું કારણ ટાઈમ ઝોન તફાવત છે. બીજું કારણ અહીં સ્ટેડિયમની ક્ષમતા છે. અહીં પ્રેક્ષકોની ક્ષમતા માત્ર 7500 છે. જ્યારે ભારતીય ટીમની મેચ માટે એક મોટા સ્થળની જરૂર હતી. આયોજક અધિકારીએ આ માહિતી આપી છે. જ્યારે વર્લ્ડકપનું ઉદ્ઘાટન ડલ્લાસમાં જ થશે. અહીં ટૂર્નામેન્ટની પ્રથમ મેચ 1 જૂને યુએસએ અને કેનેડા વચ્ચે રમાશે. આ ટુર્નામેન્ટમાં કુલ 20 ટીમો ભાગ લેશે. 29 દિવસ સુધી કુલ 48 મેચો રમાશે. જેમાંથી 16 મેચ યુએસએમાં રમાશે જ્યારે બાકીની મેચ વેસ્ટ ઈન્ડિઝમાં રમાશે.
