- આરકે શનમુખમ ચેટ્ટીએ 26 નવેમ્બર 1947ના રોજ દેશનું પ્રથમ બજેટ રજૂ કર્યું
- આરકે શનમુખમ ચેટ્ટીએ મદ્રાસ ક્રિશ્ચિયન કોલેજ અને મદ્રાસ લો કોલેજમાં શિક્ષણ મેળવ્યું
- શનમુખમ ચેટ્ટી નાણામંત્રી બનતા પહેલા બિઝનેસમેન હતા
કેન્દ્રીય નાણામંત્રી નિર્મલા સીતારમણ 1 ફેબ્રુઆરીએ દેશનું બજેટ રજૂ કરશે. તે છઠ્ઠી વખત બજેટ રજૂ કરવા જઈ રહી છે. પરંતુ શું તમે જાણો છો કે આઝાદી બાદ દેશનું પહેલું બજેટ ક્યારે રજૂ કરવામાં આવ્યું હતું અને કોણે રજૂ કર્યું હતું. શું તમે સ્વતંત્ર ભારતના પ્રથમ નાણામંત્રી વિશે જાણો છો? વર્ષ 1947માં જ્યારે દેશને આઝાદી મળી ત્યારે આરકે શનમુખમ ચેટ્ટીએ પ્રથમ બજેટ રજૂ કર્યું હતું. તેઓ સ્વતંત્ર ભારતના પ્રથમ નાણામંત્રી હતા.
RK શનમુખમ ચેટ્ટીએ દેશનું પ્રથમ બજેટ રજૂ કર્યું
RK શનમુખમ ચેટ્ટીએ 26 નવેમ્બર 1947ના રોજ દેશનું પ્રથમ બજેટ રજૂ કર્યું હતું. આ બજેટ 15 ઓગસ્ટ 1947 થી 31 માર્ચ 1948 વચ્ચે માત્ર સાડા સાત મહિના માટે હતું. 1892માં જન્મેલા શનમુખમ ચેટ્ટી નાણામંત્રી બનતા પહેલા બિઝનેસમેન હતા. તેઓ કોચીનના દિવાન રહી ચૂક્યા છે. ચેટ્ટી ચેમ્બર ઓફ પ્રિન્સેસના બંધારણીય સલાહકાર હતા.
ક્યાંથી કર્યો હતો અભ્યાસ?
આરકે શનમુખમ ચેટ્ટીએ મદ્રાસ ક્રિશ્ચિયન કોલેજ અને મદ્રાસ લો કોલેજમાં શિક્ષણ મેળવ્યું હતું. તેઓ બ્રિટિશ તરફી જસ્ટિસ પાર્ટીના સભ્ય પણ હતા. શનમુખમ ચેટ્ટી 1933 થી 1935 દરમિયાન ભારતની સેન્ટ્રલ એસેમ્બલીના સ્પીકર પણ હતા. તેઓ વકીલ અને રાજકારણી હતા અને અર્થશાસ્ત્ર પર પણ તેમની સારી કમાન્ડ હતી. તેઓ 1947 થી 1949 સુધી ભારતના નાણામંત્રી હતા. 5 મે 1953ના રોજ હાર્ટ એટેકથી તેમનું અવસાન થયું.
ખુદને નસીબદાર ગણાવ્યો
બજેટ રજૂ કરતી વખતે તેમણે પોતાને ખૂબ જ ભાગ્યશાળી ગણાવ્યા હતા અને કહ્યું હતું કે તેને એક ઐતિહાસિક અવસર તરીકે યાદ કરવામાં આવશે. તેઓ બજેટના દસ્તાવેજો એક બ્રીફકેસમાં લઈને આવ્યા હતા. આ દરમિયાન તેમણે સફેદ શર્ટ અને કાળો સૂટ પહેર્યો હતો. તેમણે ટાઈ પણ પહેરી હતી. સ્વતંત્ર ભારતના પ્રથમ બજેટમાં કુલ આવકનો અંદાજ રૂ. 171.15 કરોડ હતો.
