કાલકાજી મંદિર દુર્ઘટનાના બે આરોપીઓની ધરપકડ, સ્ટેજ તૂટતાં સર્જાઇ’તી દુર્ઘટના

• મંદિર પરિસરમાં જાગરણ દરમિયાન તૂટી પડ્યું હતું સ્ટેજ
• દુર્ઘટનામાં એક મહિલાના મોતની સાથે 14 લોકો થાય હતા ઘાયલ 
• આયોજકો વિરુદ્ધ બેદરકારી સહિત કલમો હેઠળ ગુનો દાખલ 

કાલકાજી મંદિર પરિસરમાં શનિવારે મધરાતે માતા જાગરણ દરમિયાન સર્જાયેલા દુર્ઘટનામાં બેદરકારીના કારણે થયેલા મોતના કેસમાં પોલીસે બે લોકોની ધરપકડ કરી છે. તેમની ઓળખ તુગલકાબાદના રહેવાસી સતીશ કુમાર અને કાલકાજીના રહેવાસી અનુજ મિત્તલ તરીકે થઈ છે. બંને માતા જાગરણના આયોજક છે.

પોલીસ અન્ય લોકોના નિવેદન નોંધી વધુ લોકોની ભૂમિકાની તપાસ કરી રહી છે. મહંત પરિસરની દેખરેખ રાખતા લોકો ઉપરાંત ટેન્ટ હાઉસ, પ્રમોટર અને કાર્યક્રમમાં હાજર રહેલા લોકોની પૂછપરછ કરીને મામલાની તપાસ કરવામાં આવી રહી છે. પોલીસ અધિકારીઓનું કહેવું છે કે આ કેસમાં વધુ ધરપકડ કરવામાં આવી શકે છે.

આ કેસની તપાસ કરી રહેલા પોલીસ અધિકારીએ જણાવ્યું હતું કે પ્રારંભિક તપાસ બાદ જાણવા મળ્યું હતું કે જાગરણ માટેની અરજી શ્રી કાલકાજી સજ્જા સેવાદાર મિત્ર મંડળ દ્વારા આપવામાં આવી હતી. આયોજકોએ પરવાનગી લીધા વિના જ જાગરણનું આયોજન કર્યું હતું. આ ઉપરાંત જરૂરિયાત કરતાં વધુ ભીડ બોલાવવામાં આવી હતી. મુખ્ય સ્ટેજની સમાંતર બનેલા ઊંચા પ્લેટફોર્મ પર વધુ લોકો બેઠા હતા. ઓવરલોડિંગને કારણે પ્લેટફોર્મ તૂટી પડ્યું અને મહિલાનું મોત થયું.

જણાવી દઈએ કે, કાલકાજી મંદિર પરિસરમાં શનિવારે મધરાતે જાગરણ દરમિયાન મુખ્ય સ્ટેજ પાસે બનેલું પ્લેટફોર્મ ઓવરલોડને કારણે તૂટી પડ્યું હતું. આ અકસ્માતમાં એક મહિલાનું મોત થયું હતું. તો સાથે સાથે, 17 લોકો ગંભીર રીતે ઘાયલ થયા છે. દિલ્હીના સીએમ અરવિંદ કેજરીવાલે આ ઘટના પર શોક વ્યક્ત કર્યો હતો. પોલીસે આ મામલાને ગંભીરતાથી લઈને બેદરકારીથી મૃત્યુ અને સરકારી આદેશના ઉલ્લંઘન સહિતની અન્ય કલમો હેઠળ ગુનો નોંધ્યો હતો. વાસ્તવમાં, પોલીસની પરવાનગી લીધા વિના જાગરણનું આયોજન કરવામાં આવ્યું હતું. ત્યાં ક્ષમતા કરતા વધુ લોકો હાજર હતા.