હિમાચલ પ્રદેશમાં વર્ષની પ્રથમ હિમવર્ષા શરૂ, વરસાદ માટે ઓરેન્જ એલર્ટ જારી

• હિમાચલપ્રદેશના મંડી જિલ્લામાં હિમવર્ષા શરૂ થઈ
  
• હિમવર્ષાને કારણે રાજ્યભરના તાપમાનમાં ઘટાડો
  
• હવામાન વિભાગની આગાહી ભાર હિમવર્ષા થશે

હિમાચલ પ્રદેશમાં લાંબા સમયથી જોવાતી હિમવર્ષાની શરુઆત થઈ ગઈ છે. હિમાચલપ્રદેશના મંડી જિલ્લામાં વર્ષ 2024 ની પ્રથમ હિમવર્ષા શરૂ થઈ ગઈ છે. જેના કારણે રાજ્યભરના તાપમાનમાં પણ ઘટાડો નોંધાયો છે. હવામાન વિભાગે 31 જાન્યુઆરી અને 1 ફેબ્રુઆરીએ વિવિધ સ્થળોએ ભારે હિમવર્ષા અને વરસાદનું ઓરેન્જ એલર્ટ જાહેર કર્યું છે. વધુમાં, જિલ્લાના ઊંચાઈવાળા વિસ્તારોની વાત કરીએ તો સરજના જંજેલીમાં શિકારી મંદિર, કમરુનાગ મંદિર, નિહરી, રોહંડા, પાંડાર, દેવીદાદ, ચૌહરઘાટી અને તેની આસપાસના વિસ્તારોમાં ભારે હિમવર્ષા થઈ છે. હિમવર્ષાને કારણે બાગાયતી ખેતી ખીલી ઉઠી છે કારણ કે હિમવર્ષા વટાણા, બટાકા, સફરજન સહિતના અન્ય પાકો માટે ફાયદાકારક રહેશે.

હિમાચલમાં વર્ષની પ્રથમ હિમવર્ષા

ત્યારે હિમાચલમાં મંડીના નીચાણવાળા વિસ્તારોમાં ગઈકાલ રાતથી દ સતત વરસાદ ચાલુ છે. નીચાણવાળા વિસ્તારના ખેડૂતો વરસાદથી ખુશ છે. પરંતુ તેઓ કહે છે કે, સમયસર વરસાદ ન થવાને કારણે તેમનો ઘઉંનો પાક બગડી ગયો છે. તે જ સમયે, મંડીના વન વૈજ્ઞાનિક અને કૃષિ વિજ્ઞાન કેન્દ્રના પ્રભારી ડૉ. પંકજ સૂદે જણાવ્યું હતું કે, આ વરસાદ અને હિમવર્ષા દુષ્કાળથી પીડિત વિસ્તારોમાં જીવનરક્ષક તરીકે કામ કરશે. તેમણે કહ્યું કે, ગઈ રાત્રિથી અત્યાર સુધીમાં 5 થી 6 મિલીલીટર વરસાદ નોંધાયો છે. આગામી એક-બે દિવસમાં જિલ્લામાં સતત વરસાદની સંભાવના છે.

જિલ્લામાં વરસાદને લઈને ઓરેન્જ એલર્ટ જારી કરવામાં આવ્યું

તે સિવાય મંડીના ડિઝાસ્ટર મેનેજમેન્ટ ઓથોરિટીના અધ્યક્ષ અને ડેપ્યુટી કમિશનર અરિંદમ ચૌધરીએ તમામ નાગરિકો અને પ્રવાસીઓને ઊંચાઈવાળા વિસ્તારોમાં ન જવાની સલાહ આપી છે. પ્રશાસને હેલ્પલાઈન નંબર જાહેર કર્યા છે. ડેપ્યુટી કમિશનરે જિલ્લાના પંચાયત વડાઓ, એનજીઓ, ટ્રેકર્સ અને નાગરિકોને લોકોને માહિતી પૂરી પાડવા વિનંતી કરી છે. જેથી કરીને કોઈપણ પ્રકારની અનિચ્છનીય ઘટનાને ટાળી શકાય. આપત્તિના કિસ્સામાં સહાયતા માટે, પ્રવાસીઓ અને સામાન્ય નાગરિકો માટે ફોન નંબર 01905-226201, 202, 203, 204 અથવા ટોલ ફ્રી નંબર 1077 જારી કરવામાં આવ્યા છે.