હવે ડ્રગ્સ માફિયાઓનો ડિજિટલ ખેલ નહીં ચાલે! ગુજરાત પોલીસનું સાયબર સ્ટ્રાઈક
ડાર્ક વેબથી માંડીને વોટ્સએપ, ટેલિગ્રામ અને સોશિયલ મીડિયા પર ચાલતા નશાના કાળા કારોબાર પર ANTFની બાજ નજર
ચાર વિશેષ યુનિટ સક્રિય કરી એથિકલ હેકર્સની મદદ લેવાશે, ક્રિપ્ટોકરન્સીના વ્યવહારો પણ પોલીસની રડારમાં
અગ્ર ગુજરાત, રાજકોટ
યુવાધનને નશાના રવાડે ચડાવી અબજોનો કાળો કારોબાર ચલાવતા ડ્રગ્સ માફિયાઓએ હવે પોલીસથી બચવા માટે ટેકનોલોજીનો સહારો લેવાનું શરૂ કર્યું છે. પરંપરાગત રીતે થતી ડ્રગ્સની હેરાફેરીની સાથે હવે ડાર્ક વેબ અને સોશિયલ મીડિયાના માધ્યમથી નશીલા પદાર્થોના સોદા થઈ રહ્યા છે. જોકે, ડ્રગ્સ માફિયાઓની આ નવી મોડસ ઓપરેન્ડીનો પર્દાફાશ કરવા ગુજરાત પોલીસે પણ હવે ડિજિટલ મોરચે મોરચો માંડ્યો છે. સીઆઈડી ક્રાઈમ હેઠળ કાર્યરત એન્ટી નાર્કોટિક્સ ટાસ્ક ફોર્સ દ્વારા ઓનલાઈન ડ્રગ્સ નેટવર્કને તોડી પાડવા વિશેષ એક્શન પ્લાન તૈયાર કરવામાં આવ્યો છે.
ઓનલાઈન ડ્રગ્સના કાળા કારોબારને ડામવા માટે ચાર નવા વિશેષ યુનિટ તૈયાર કરવામાં આવ્યા છે. આ ટીમો ડિજિટલ પ્લેટફોર્મ પર થતી શંકાસ્પદ ગતિવિધિઓ પર નજર રાખવાની સાથે ડ્રગ્સના સોદા માટે વપરાતા ગુપ્ત કોડવર્ડ્સ, ચેટિંગ અને સંપર્કોની કડીઓ જોડશે. આ કામગીરીમાં એથિકલ હેકર્સ અને ડાર્ક વેબના નિષ્ણાતોની મદદ લેવામાં આવશે, જેથી પોલીસની નજરથી દૂર રહીને નશાનો વેપલો ચલાવતા મુખ્ય સૂત્રધારો સુધી પહોંચી શકાય.
ડ્રગ્સ પેડલરો હવે સીધા સંપર્ક કરવાને બદલે વોટ્સએપ, ટેલિગ્રામ, ઈન્સ્ટાગ્રામ, ફેસબુક સહિતના પ્લેટફોર્મ પર ગુપ્ત ગ્રુપ અને કોડવર્ડ્સના માધ્યમથી ગ્રાહકો શોધે છે. કેટલીક ગેરકાયદે પ્રવૃત્તિઓ ડાર્ક વેબ મારફતે પણ ચાલતી હોવાની બાબતને ધ્યાનમાં રાખીને ANTFએ ડિજિટલ સર્વેલન્સ મજબૂત બનાવ્યું છે. શંકાસ્પદ એકાઉન્ટ્સ, ઓનલાઈન ચેટ્સ અને નાણાકીય વ્યવહારોની કડીઓના આધારે ડ્રગ્સના સપ્લાયરથી લઈને સ્થાનિક પેડલર સુધી પહોંચવાનો પ્રયાસ કરાશે.
ઓનલાઈન ડ્રગ્સના વેપારમાં રોકડ કે બેંકિંગ વ્યવહારોને બદલે ક્રિપ્ટોકરન્સીનો ઉપયોગ પણ વધી રહ્યો છે. પોલીસને સીધી રીતે નાણાકીય લેવડદેવડની કડી ન મળે તે માટે ડ્રગ્સના સોદાનું પેમેન્ટ ડિજિટલ કરન્સીમાં કરવામાં આવે છે. આ પ્રકારના વ્યવહારોને શોધી કાઢવા માટે હવે ક્રિપ્ટોકરન્સી ટ્રેસિંગની આધુનિક ટેકનોલોજીનો ઉપયોગ કરવામાં આવશે. ડિજિટલ ફૂટપ્રિન્ટ્સ અને નાણાકીય વ્યવહારોની કડીઓના આધારે કોણે પેમેન્ટ કર્યું અને કોના સુધી રકમ પહોંચી તેની તપાસ કરીને નેટવર્કના અન્ય સભ્યો સુધી પહોંચવાનો માર્ગ મોકળો થશે.
ડ્રગ્સના આરોપીઓ પોલીસની પકડમાં આવવાની ભીતિથી મોબાઈલ ફોન, લેપટોપ અને અન્ય ડિજિટલ ઉપકરણોમાંથી ચેટ્સ, સંપર્કો તથા મહત્વના ડેટા ડિલીટ કરી દેતા હોય છે. હવે જપ્ત કરવામાં આવેલા ડિજિટલ ઉપકરણોમાંથી ડિલીટ થયેલા ડેટાની રિકવરી માટે પણ વિશેષ ટેકનિકલ ક્ષમતાનો ઉપયોગ કરાશે. એન્ક્રિપ્ટેડ એપ્લિકેશન્સ અને ડિજિટલ સંચારની તપાસ કરીને ઉપલબ્ધ ટેકનિકલ પુરાવાઓના આધારે આરોપીઓની ઓળખ, સંપર્કોની કડી અને નેટવર્કના મુખ્ય સંચાલકો સુધી પહોંચવાનો પ્રયાસ કરવામાં આવશે.
ડ્રગ્સ માફિયાઓ ટેકનોલોજીનો ઉપયોગ કરીને પોલીસથી બચવાનો પ્રયાસ કરી રહ્યા છે, ત્યારે ગુજરાત પોલીસે પણ ટેકનોલોજીથી જ તેમને ઘેરવાની તૈયારી કરી છે. ચાર વિશેષ યુનિટ, એથિકલ હેકર્સની મદદ, ક્રિપ્ટોકરન્સી ટ્રેસિંગ અને ડિજિટલ ફોરેન્સિક્સના સંયુક્ત ઉપયોગથી ઓનલાઈન નશાના વેપારની સાંકળ તોડવાનો લક્ષ્યાંક રાખવામાં આવ્યો છે. હવે માત્ર ડ્રગ્સનો જથ્થો પકડવા પૂરતી કાર્યવાહી નહીં, પરંતુ મોબાઈલ અને કમ્પ્યુટરની સ્ક્રીન પાછળ બેસીને આખું નેટવર્ક ચલાવતા અસલી સૂત્રધારો સુધી પહોંચવા પોલીસનો ડિજિટલ જાળ વધુ મજબૂત બનશે.


