લોકોને ફરી એક મોંઘવારીનો ઉકળતો ડામ
રાજકોટમાં ખાનગી ડેરીઓએ દુધમાં રૂ.૪નો વધારો ઝીંકયો
ચાર ફેટથી વધુના દુધમાં રૂ.૪ અને ચાર ફેટ સુધીના દુધમાં રૂ.૨નો વધારો : ખાનગી ડેરીઓના નિર્ણયથી ચા-નાસ્તા અને મીઠાઇના ભાવમાં પણ વધારો થવાના એંધાણ : ગૃહિણીઓ અને મધ્યમ વર્ગના પરિવારોનું બજેટ ખોરવાશે
અગ્ર ગુજરાત, રાજકોટ
અમૂલ બાદ રાજકોટ ખાનગી ડેરીઓએ પણ દૂધના ભાવમાં વધારો કર્યો છે. દૂધના ભાવમાં 2થી 4 રૂપિયા સુધીનો વધારો કરાયો છે. ડેરી મર્ચેન્ટ એસોસિયેશન દ્વારા નિર્ણય લેવાયો છે. રાજકોટમાં 650 ડેરીમાં છૂટક 3 લાખ લીટર દૂધનું વેચાણ થાય છે. ચાર ફેટથી વધુના દૂધમાં 4 રૂપિયાનો વધારો કરાયો છે. 4 ફેટ સુધીના દૂધમાં 2 રૂપિયાનો વધારો કર્યો છે. 4 ફેટ સુધીનું દૂધ જે 30થી 35 રૂપિયામાં મળતું હતું તે હવે 32થી 37 રૂપિયા સુધી મળશે. 4થી 6 ફેટ સુધીના દૂધનો ભાવ વધીને 62થી 70 રૂપિયા સુધી થયો છે.
ડેરી મર્ચન્ટ એસોસિએશનનાં પ્રમુખ વી. પી. વૈષ્ણવે જણાવ્યું હતું કે અમૂલ ડેરીએ કરેલા ભાવ વધારાને ધ્યાનમાં રાખીને રાજકોટની ખાનગી ડેરીઓએ પણ દૂધના ભાવમાં વધારો કરવો પડ્યો છે. હાલમાં 4 ફેટની આસપાસના દૂધના ભાવમાં પ્રતિ લિટરે રૂ. 2નો વધારો, 4 ફેટથી ઉપરના દૂધમાં રૂ. 4 નો વધારો અને દહીંમાં રૂ. 10નો વધારો કરવામાં આવ્યો છે. હાલમાં ગામડાની પરિસ્થિતિ ખરાબ હોવાથી દૂધની આવકમાં ઘટાડાને ધ્યાનમાં રાખીને આ ભાવ વધારો કરવો પડ્યો હોવાનું સ્પષ્ટ લાગી રહ્યું છે.
ગ્રાહક કેતન સોનીએ આક્રોશ વ્યક્ત કરતાં જણાવ્યું કે, અત્યારે તો પ્રજાના ખિસ્સા કપાઈ રહ્યા છે. નાના હોય કે મોટા, દરેક વ્યક્તિને દૂધની જરૂરિયાત રહે જ છે. ભલે લોકો ઓછું લે, પરંતુ જરૂર તો પડે જ છે અને તેના વગર ચાલે તેમ નથી. સામાન્ય રીતે દૂધના ભાવમાં વધારો ઉનાળામાં આવતો હોય છે, પરંતુ હવે શિયાળામાં આવ્યો છે અને આગળ જતાં ચોમાસામાં પણ આવશે. અમૂલના ભાવ વધ્યા એટલે ડેરીવાળાઓએ પણ ભાવ વધાર્યા છે, કારણ કે દૂધ ઉત્પાદકોને ભાવવધારો આપવો પડે તેમ છે નહિતર દૂધ ન મળે. તેમણે વધુમાં કહ્યું કે, હજી આગળ પણ ભાવ વધવાના જ છે, જાણે મોટી કાતર લઈને જ બેઠા હોય તેવી સ્થિતિ છે.
હજુ વધારાની શકયતા : એસોસિએશન
વી.પી.વૈષ્ણવે જણાવ્યું કે રાજકોટમાં દૂધ વેચનાર એસોસિએશન છેલ્લા 28 વર્ષથી કાર્યરત છે અને કાયમી ધોરણે માલધારીઓ તેમજ ગ્રાહક વર્ગનું હિત ધ્યાનમાં રાખીને નિર્ણયો લેવામાં આવે છે. આજની તારીખે ખાનગી ડેરીઓ ગામડે સહકારી ડેરી કરતાં પ્રતિ કિલો ફેટ 75 પૈસા ભાવ ઊંચો આપે છે.તેમજ 21 તારીખથી 10 પૈસાનો વધારો કરીને 85 પૈસા ભાવ ઊંચો આપવામાં આવશે, જેથી માલધારીઓને રાહત મળે. જ્યારે વેચાણ ભાવમાં સહકારી ડેરી કરતાં કાયમી ધોરણે રૂ. 2 નીચો ભાવ રાખવામાં આવે છે, જેથી ગ્રાહક મિત્રોને સરળતા રહે અને માલધારી સમાજને પણ રાહત થાય. રાજકોટમાં આશરે 650 જેટલી ડેરીઓ આવેલી છે. તેમજ અંદાજે 3 લાખ લિટર દૂધનું વેચાણ થાય છે. આગામી સમયના ભાવ અંગે તેમણે જણાવ્યું હતું કે અત્યારની પરિસ્થિતિ પ્રમાણે શિયાળો જાણે આવ્યો નથી તે રીતે દૂધની અછત જોવા મળી રહી છે. જો દૂધ ઘટશે તો આવનારા દિવસોમાં કદાચ ફરીથી ભાવ વધારો થાય તેવી પૂરતી શક્યતા છે.
રાજકોટના નાગરિકો પર મોંઘવારીનો વધુ એક માર પડ્યો છે. અમૂલ દૂધમાં ભાવ વધારા બાદ હવે રાજકોટની ખાનગી ડેરીઓએ પણ દૂધના ભાવમાં વધારો ઝીંક્યો છે. ડેરી મર્ચેન્ટ એસોસિએશને દૂધના ભાવમાં પ્રતિ લીટર 2 થી 4 રૂપિયા સુધીનો વધારો કરવાનો નિર્ણય લીધો છે. આ ભાવ વધારાને કારણે ગૃહિણીઓ અને મધ્યમ વર્ગના પરિવારોનું માસિક બજેટ ખોરવાઈ જશે.
અમૂલે પણ દૂધના ભાવમાં વધાર્યો કર્યો
તાજેતરમાં અમૂલ દ્વારા દૂધના ભાવમાં વધારો ઝીંકી દેવાયો હતો. અમૂલ ગોલ્ડના ભાવમાં પ્રતિ લિટર 4 રૂપિયા અને તાજાના ભાવમાં 2 રૂપિયાનો વધારો કરાયો હતો. અમૂલ ગોલ્ડના અડધા લિટર પાઉચના 35ના બદલે 37 રૂપિયા અને અમૂલ તાજાના અડધો લિટર પાઉચના 29ના બદલે 30 રૂપિયા ભાવ થયો છે. બરોડા ડેરી દ્વારા પણ અમૂલ શક્તિ દૂધના ભાવમાં પ્રતિ 500 મિલીના પાઉચ પર રૂ. 2નો વધારો કરવામાં આવ્યો છે. શક્તિના 500 મિલીના પાઉચના હવે રૂ. 34 થયા છે.


