- ન્યૂઝીલેન્ડ અને સાઉથ આફ્રિકા વચ્ચે ટેસ્ટ સિરીઝ
- પ્રથમ મેચમાં રચિન રવિન્દ્રએ બેવડી સદી ફટકારી
- રચિને 366 બોલમાં 240 રનની શાનદાર ઇનિંગ રમી
બે ટેસ્ટ મેચની સિરીઝની પ્રથમ મેચ ન્યૂઝીલેન્ડ અને સાઉથ આફ્રિકા વચ્ચે માઉન્ટ મૌંગાનુઈ ખાતે રમાઈ રહી છે. જ્યારે યજમાન ટીમે પ્રથમ દાવમાં મુલાકાતી ટીમ પર પ્રભુત્વ જમાવ્યું છે. ODI વર્લ્ડકપ 2023માં પોતાની ઓળખ બનાવનાર યુવા બેટ્સમેન રચિન રવિન્દ્રએ પ્રથમ ઇનિંગમાં જ બેવડી સદી ફટકારી હતી. કારકિર્દીની ચોથી મેચ રમી રહેલા રચિને 366 બોલમાં 240 રનની શાનદાર ઇનિંગ રમી હતી. રચિન રવિન્દ્રની આ જોરદાર ઈનિંગના કારણે ન્યૂઝીલેન્ડ પ્રથમ દાવમાં 511 રન બનાવી શક્યું હતું. આ ઉપરાંત, રચિન રવિન્દ્રની આ બેવડી સદી બાદ તેણે ઘણા રેકોર્ડ પણ પોતાના નામે કર્યા.
કેન વિલિયમસને પાછળ છોડ્યો
ડાબોડી બેટ્સમેન રચિન રવિન્દ્ર ચોથા નંબર પર બેટિંગ કરવા મેદાનમાં આવ્યો હતો. તેણે કેન વિલિયમ્સન સાથે 232 રનની જોરદાર પાર્ટનરશિપ પણ કરી હતી. રચિન ટેસ્ટમાં બેવડી સદી ફટકારનાર ન્યૂઝીલેન્ડનો બીજો સૌથી યુવા બેટ્સમેન બની ગયો છે. આ પહેલા કેન વિલિયમસન બીજા સ્થાને હતો. ન્યૂઝીલેન્ડ માટે ટેસ્ટમાં બેવડી સદી ફટકારનાર સૌથી નાની ઉંમરનો રેકોર્ડ મેથ્યુ સિંકલેરના નામે છે.સિંકલેરે 1999માં વેસ્ટ ઈન્ડિઝ સામેની પોતાની ડેબ્યૂ મેચમાં બેવડી સદી ફટકારી હતી. મેથ્યુ સિંકલેરે વેસ્ટ ઈન્ડિઝ સામે 214 રન બનાવ્યા હતા. રચિન પોતાની પ્રથમ ટેસ્ટ સદીને બેવડી સદીમાં પરિવર્તિત કરનાર ન્યૂઝીલેન્ડનો ચોથો બેટ્સમેન છે. સાથે જ પ્રથમ ટેસ્ટ સદીમાં સૌથી વધુ 240 રન બનાવ્યા બાદ રચિન રવિન્દ્ર હવે ન્યૂઝીલેન્ડનો પ્રથમ બેટ્સમેન બની ગયો છે. જેણે પ્રથમ ટેસ્ટમાં સૌથી મોટી ઇનિંગ્સ રમી છે.
યશસ્વી જયસ્વાલ પણ પાછળ છોડ્યો
ભારત અને ઈંગ્લેન્ડ વચ્ચે રમાઈ રહેલી પાંચ મેચોની ટેસ્ટ સિરીઝની બીજી મેચમાં યશસ્વી જયસ્વાલે 209 રનની શાનદાર ઈનિંગ રમી હતી. જે બાદ વર્લ્ડ ટેસ્ટ ચેમ્પિયન 2023-25 યશસ્વી જયસ્વાલના નામે સૌથી વધુ સ્કોરનો રેકોર્ડ નોંધાયો હતો. પરંતુ હવે સાઉથ આફ્રિકા સામે 240 રન બનાવ્યા બાદ આ રેકોર્ડ રચિન રવિન્દ્રના નામે થઈ ગયો છે. રચિન રવિન્દ્ર 2023-25 વર્લ્ડ ટેસ્ટ ચેમ્પિયનશિપમાં સૌથી વધુ વ્યક્તિગત સ્કોર ધરાવનાર બેટ્સમેન બની ગયો છે.
સચિન-દ્રવિડ પાસેથી લીધેલું નામ
ન્યુઝીલેન્ડનો 24 વર્ષનો યુવા બેટ્સમેન રચિન દ્રવિડ ભારતીય મૂળનો છે. જોકે રચિન રવિન્દ્રનો જન્મ ન્યુઝીલેન્ડમાં થયો હતો. વાસ્તવમાં તેના પિતા સચિન તેંડુલકર અને રાહુલ દ્રવિડના ફેન હતા. જે બાદ તેણે રાહુલ દ્રવિડના નામ પરથી ‘ર’ અને સચિન તેંડુલકરના નામ પરથી ‘ચિન’ લઈને રચિન નામ બનાવ્યું. આ વર્ષે IPL 2024માં રચિન રવિન્દ્ર ધોનીની કેપ્ટન્સીમાં રમતા જોવા મળશે.
