- ટીમ ઈન્ડિયાએ 106 રનથી મેચ જીતી લીધી
- પાંચ મેચની સિરીઝ 1-1થી બરાબર છે
- ત્રીજી ટેસ્ટ 15 ફેબ્રુઆરીએ રાજકોટમાં રમાશે
હૈદરાબાદની હાર બાદ ટીમ ઈન્ડિયાએ વિશાખાપટ્ટનમમાં ઈંગ્લેન્ડ પર જોરદાર વળતો પ્રહાર કર્યો છે. રોહિત શર્માની ટીમે બીજી ટેસ્ટમાં ઈંગ્લેન્ડને ઘૂંટણિયે પડવા મજબૂર કરી દીધું. ઇંગ્લેન્ડને જીતવા માટે 399 રનની જરૂર હતી પરંતુ બેન સ્ટોક્સની ટીમ ચોથી ઇનિંગમાં નિષ્ફળ રહી હતી. આર અશ્વિન, જસપ્રિત બુમરાહ અને કુલદીપ યાદવની શાનદાર બોલિંગના આધારે ટીમ ઈન્ડિયાએ 106 રનથી મેચ જીતી લીધી હતી. હવે પાંચ મેચની સિરીઝ 1-1થી બરાબર છે. ત્રીજી ટેસ્ટ 15 ફેબ્રુઆરીએ રાજકોટમાં રમાશે.
ટીમ ઈન્ડિયાની જીત
વિશાખાપટ્ટનમમાં ટીમ ઈન્ડિયાએ ટોસ જીતીને પ્રથમ બેટિંગ કરવાનું પસંદ કર્યું હતું. યશસ્વી જયસ્વાલની બેવડી સદીના આધારે ટીમ ઈન્ડિયાએ પ્રથમ દાવમાં 396 રન બનાવ્યા હતા. જયસ્વાલે 209 રનની ઇનિંગ રમી હતી. આ તેની કારકિર્દીની પ્રથમ બેવડી સદી છે. ઈંગ્લેન્ડની ટીમ પ્રથમ દાવમાં માત્ર 253 રન જ બનાવી શકી હતી. જસપ્રિત બુમરાહે 6 વિકેટ લઈને ઈંગ્લેન્ડને ઘૂંટણિયે પડવા મજબૂર કરી દીધું. આ પછી ટીમ ઈન્ડિયાએ બીજી ઈનિંગમાં 255 રન બનાવ્યા હતા. આ વખતે શુભમન ગિલે પણ સદી ફટકારી હતી.
સ્પિનરોની જાળમાં ફસાઈ ઈંગ્લેન્ડ
ઈંગ્લેન્ડનો બીજો દાવ સ્પિનર્સના કારણે બેકાર રહ્યો. અશ્વિને બેન ડકેટને આઉટ કર્યો અને ત્યાર બાદ અક્ષરે બીજા દિવસે રેહાન અહેમદને આઉટ કરીને ઈંગ્લેન્ડને બીજો ઝટકો આપ્યો હતો. ઓલી પોપની મોટી વિકેટ અશ્વિનના હાથમાં રહી, તે 23 રન બનાવી શક્યો હતો. જો રૂટ પણ 16 રન બનાવીને અશ્વિનનો શિકાર બન્યો હતો. ઈંગ્લેન્ડ તરફથી શાનદાર બેટિંગ કરી રહેલા જેક ક્રાઉલે પોતાની અડધી સદી પૂરી કરી હતી પરંતુ તે કુલદીપ યાદવનો શિકાર બન્યો હતો. કુલદીપે ક્રાઉલીને LBW આઉટ કર્યો હતો.
એકપણ રન બનાવ્યા વિના આઉટ થયા ઈંગ્લેન્ડના કેપ્ટન
ઈંગ્લેન્ડના કેપ્ટન બેન સ્ટોક્સે ટીમ ઈન્ડિયાને પોતાની વિકેટ ભેટમાં આપી. તે શ્રેયસ અય્યરના સીધા થ્રો પર રનઆઉટ થયો હતો. તે આસાનીથી એક રન પૂરો કરી શક્યો હોત પરંતુ તે ઝડપથી દોડ્યો ન હતો, પરિણામે ઈંગ્લેન્ડના કેપ્ટનને પેવેલિયન પરત ફરવું પડ્યું હતું. અંતે, બુમરાહે બેયરસ્ટો, હાર્ટલી અને શોએબ બશીરને આઉટ કરીને ઈંગ્લેન્ડનો દાવ સમેટી લીધો હતો.
