- ગરમીની સૌથી મોટી અસર મેરેથોન, ટેનિસ તથા બીચ વોલીબોલને થશે
- ફ્રાન્સની રાજધાનમાં ચાલુ વર્ષે વિક્રમી ડિગ્રીમાં ગરમી પડે તેવી સંભાવના
- છેલ્લા પાંચ વર્ષમાં પેરિસે ચામડી બાળી નાખે તેવી ગરમી અને લૂનો સામનો કર્યો છે
ચાલુ વર્ષે યોજાનારી પેરિસ ઓલિમ્પિક દરમિયાન કાળઝાળ ગરમી અને સનસ્ટ્રોકની સમસ્યા નડે તેવી શંકા વ્યક્ત કરવામાં આવી છે. વિશ્વભરના એથ્લેટ્સને ચેતવણી આપવામાં આવી છે કે ફ્રાન્સની રાજધાનમાં ચાલુ વર્ષે વિક્રમી ડિગ્રીમાં ગરમી પડે તેવી સંભાવના છે. છેલ્લા પાંચ વર્ષમાં પેરિસે ચામડી બાળી નાખે તેવી ગરમી અને લૂનો સામનો કર્યો છે. ઓલિમ્પિક 26મી જુલાઈથી 11મી ઓગસ્ટ સુધી યોજાશે. નોંધનીય છે કે ટોક્યો ઓલિમ્પિક દરમિયાન પણ ઘણી ગરમી પડી હતી. આયોજકોએ જણાવ્યું હતું કે તેઓ તમામ પ્રકારની પરિસ્થિતિનો સામનો કરવા માટે તૈયાર છે. સાયન્સ જર્નલની શોધમાં જણાવાયું છે કે ઓલિમ્પિક દરમિયાન બે સપ્તાહ સુધીની ભયાનક ગરમીને મોટો ખતરા સમાન જોવામાં આવી રહી છે.
ગેમ્સ દરમિયાન એથ્લેટ્સને ગરમી પરેશાન કરશે. ગરમીની સર્વાધિક અસર એથ્લેટિક્સ સ્પર્ધામાં ખાસ કરીને મેરેથોન ઉપરાંત ટેનિસ, બીચ વોલીબોલ ઉપર પડશે. ઉત્તર પેરિસમાં એથ્લેટ્સનું વિલેજ છે તેને ચોક્કસ માપદંડ સાથે એરકન્ડિશન વિના તૈયાર કરવામાં આવ્યું છે. એરકન્ડિશનના બદલે નદી કિનારે ટાવર બ્લોકમાં નૈસર્ગિક રીતે ટેમ્પરેચરને ઠંડું કરવાની પ્રણાલી સ્થાપિત કરવામાં આવી છે. તાપથી બચવા માટે સનસેટની સાથે વેન્ટિલેશન સિસ્ટમ પણ મૂકવામાં આવી છે. આયોજકોએ ઘરની અંદરના તાપમાનને બહારની તુલનામાં ઓછામાં ઓછી છ ડિગ્રી સેલ્સિયસ કરવાની ખાતરી પણ આપી રહ્યા છે. જોકે રમતોના મહાકુંભમાં ભાગ લેનાર કેટલાક દેશ આયોજકોની વ્યવસ્થાને અપૂરતી ગણાવી રહ્યા છે.
