બ્રિટનના વડાપ્રધાન ઋષિ સુનકે પાંચ લાખ પાઉન્ડથી વધુના વ્યક્તિગત કરની ચુકવણી કરી

• સુનક વડાપ્રધાન તરીકે આવક કરવેરા સંબંધી જાણકારી આપવા બંધાયેલા નથી
• ડાઉનિંગ સ્ટ્રીટે જણાવ્યા મુજબ સુનકે 5,08,308 પાઉન્ડ જેટલા કરની ચુકવણી કરી છે
  
• આ આંકડો ગત નાણાકીય વર્ષમાં ભરેલા કરતાં 75 હજાર પાઉન્ડ વધુ છે
  

બ્રિટનના વડાપ્રધાન ઋષિ સુનકે 2022-23 માટે વ્યક્તિગત કરની ચુકવણી કરી છે. ડાઉનિંગ સ્ટ્રીટે જણાવ્યા મુજબ સુનકે 5,08,308 પાઉન્ડ જેટલા કરની ચુકવણી કરી છે. આ આંકડો ગત નાણાકીય વર્ષમાં ભરેલા કરતાં 75 હજાર પાઉન્ડ વધુ છે. દસ્તાવેજોથી સ્પષ્ટતા થાય છે કે સુનકે 2021-22માં 16 લાખ પાઉન્ડના થયેલા મૂડીકીય લાભથી 18 લાખ પાઉન્ડની આવક મેળવી હતી. તે ઉપરાંત વ્યાજ અને લાંભાશોથી તેમને 2,93,407 પાઉન્ડની આવક પણ થઈ હતી. અહેવાલમાં જણાવ્યા મુજબ એપ્રિલ 2022થી માર્ચ 2023 દરમિયાન તેમને 22 લાખ પાઉન્ડ અર્થાત રૂપિયા 23 કરોડથી વધુની આવક થઈ હતી. તેમણે ટેક્સના રૂપમાં રૂપિયા પાંચ કરોડથી વધુ ચૂકવ્યા છે. તેમના હિસાબનીશે ત્રણ પાનાના રિપોર્ટમાં આ જાણકારી આપી છે.

બીબીસીએ જણાવ્યા મુજબ સુનકને સાંસદ, નાણાપ્રધાન અને વડાપ્રધાનના રૂપમાં વર્ષ 2022-23 દરમિયાન વેતનરૂપે 1.4 કરોડ રૂપિયા મળ્યા હતા. તે ઉપરાંત રોકાણની મદદથી રૂપિયા 22 કરોડની આવક થઈ હતી. રોકાણને પગલે કેપિટલ ગેન્સના રૂપમાં 18 કરોડ રૂપિયાથી વધુ આવક થઈ હતી. સુનકે જે ટેક્સની ચુકવણી કરી છે. તે પૈકી 70 ટકા ટેક્સ કેપિટલ ગેન્સને કારણે તેમજ શેર વગેરે વેચવાથી થયેવા લાભને કારણે ભર્યો છે. વડાપ્રધાન તરીકે ઋષિ સુનક પોતાની આવક અને ટેક્સ સંબંધી માહિતી આપવા બંધાયેલા નથી. પરંતુ લોકોમાં તેમની આવક સંબંધ સ્પષ્ટતા રહે તે હેતુસર સુનક તેમની આવક અને કરવેરા સંબંધી જાણકારી જાહેર કરી રહ્યા છે. બ્રિટનમાં આ વર્ષે ચૂંટણી યોજાવાની છે. ચૂંટણી પહેલાં આવેલા મોટાભાગના સર્વે પરિણામોમાં કન્ઝરવેટિવને મુકાબલે લેબર પાર્ટીને સરસાઈ મળેલી છે. સુનક હાલમાં પક્ષમાં થઈ રહેલી રાજકીય ઊથલપાથલો, જીવન જરૂરી ચીજવસ્તુના વધી રહેલા ભાવોને કારણે સત્તા વિરોધી મોજાનો સામનો કરી રહ્યા છે.