- ICC U19 વર્લ્ડકની ફાઇનલ મેચમાં ભારત અને ઓસ્ટ્રેલિયા સામ સામે
- ભારત સેમિફાઇનલમાં દક્ષિણ આફ્રિકા સામેની જીત બાદ U19 ફાઇનલમાં પ્રવેશ્યુ
- ભારત પાસે છઠ્ઠું ટાઈટલ જીતવાની તક છે
ICC U19 વર્લ્ડકપની 15મી સિઝનની ફાઇનલ મેચ ભારત અને ઓસ્ટ્રેલિયા વચ્ચે રમાવા જઇ રહી છે. ડિફેન્ડિંગ ચેમ્પિયન ભારત સેમિફાઇનલમાં દક્ષિણ આફ્રિકા સામેની જીત બાદ U19 ફાઇનલમાં ક્વોલિફાય થનારી પ્રથમ ટીમ બની હતી, જ્યારે ઓસ્ટ્રેલિયા પાકિસ્તાનને હરાવીને બીજી ટીમ બની હતી. ઓસ્ટ્રેલિયાએ ટોસ જીતીને બેટિંગ કરવાનો નિર્ણય કર્યો છે. ઓસ્ટ્રેલિયા પ્રથમ બેટિંગ કરી મોટું ટાર્ગેટ સેટ કરવાની કોશિશ કરશે. મેચ ભારતીય સમય અનુસાર બપોરે 1:30 વાગ્યે શરૂ થશે.
ઓસ્ટ્રેલિયાની ઇનિંગ શરૂ
ઓસ્ટ્રેલિયાની ઇનિંગ શરૂ થઇ ગઇ છે. ઓપનર હેરી ડિક્સન અને સેમ કોન્સ્ટાસ બેટિંગ કરવા માટે ક્રિઝ પર આવી ગયા છે. ભારત તરફથી રાજ લિંબાણી પ્રથમ ઓવર નાખશે.
બન્ને ટીમોની પ્લેઇંગ 11
ભારત: આદર્શ સિંહ, અરશિન કુલકર્ણી, મુશીર ખાન, ઉદય સહારન (C), પ્રિયાંશુ મોલિયા, સચિન દાસ, અરાવલી અવનીશ (wk), મુરુગન અભિષેક, રાજ લિંબાણી, નમન તિવારી, સૌમી પાંડે.
ઓસ્ટ્રેલિયા: હેરી ડિક્સન, સેમ કોન્સ્ટાસ, હ્યુગ વેઇબજેન (C), હરજસ સિંહ, રાયન હિક્સ (wk), ઓલિવર પીક, રાફ મેકમિલન, ચાર્લી એન્ડરસન, ટોમ સ્ટ્રેકર, માહલી બીર્ડમેન, કેલમ વિડલર
ભારત પાસે છઠ્ઠું ટાઈટલ જીતવાની તક
ભારત અને ઓસ્ટ્રેલિયા વચ્ચેની ફાઇનલ મેચ વિલોમૂર પાર્ક, બેનોની ખાતે રમાશે. ભારત પાસે છઠ્ઠું ટાઈટલ જીતવાની તક છે જ્યારે ઓસ્ટ્રેલિયા ચોથું ટાઈટલ જીતી શકે છે. બંને ટીમો અગાઉ પણ આમને-સામને આવી ચુકી છે. આવી સ્થિતિમાં, દર્શકોને ટુર્નામેન્ટમાં રોમાંચક અને હાઇ-વોલ્ટેજ મેચ જોવા મળશે.
ઓસ્ટ્રેલિયા સામે મજબૂત સ્થિતિમાં છે ભારત
બંને ટીમો બે U19 વર્લ્ડકપની ફાઇનલમાં સામસામે આવી ચૂકી છે. ભારતે બંને ફાઈનલ જીતી છે. 2012માં ભારતે ઓસ્ટ્રેલિયાને 6 વિકેટે હરાવીને વર્લ્ડકપ જીત્યો હતો. આ સિવાય ભારતે 2018 વર્લ્ડકપ ફાઇનલમાં ઓસ્ટ્રેલિયાની ટીમને 8 વિકેટથી હરાવીને ફરીથી ટાઇટલ જીત્યું હતું.
