- વિશ્વની પ્રથમ એઆઈ-જનરેટેડ હોલોગ્રામ સાથે લગ્ન કરનારી મહિલા બનશે
- એલિસિયાના લગ્નનો સમારોહ આ વર્ષે જ રોટરડેમના એક મ્યુઝિયમમાં યોજાશે
- વર્ચ્યુઅલ લગ્ન હાઇબ્રિડ કપલ નામના નવા પ્રોજેક્ટનો હિસ્સો
આર્ટિફિશિયલ ઇન્ટેલિજન્સ (એઆઈ) લોકોના જીવનમાં એ પ્રકારે ઘૂસણખોરી કરી રહ્યું છે કે લોકો હવે માનવીને છોડીને એઆઈ સાથે જ લગ્ન કરવાનું વિચારવા લાગ્યા છે. વાંચવામાં ભલે થોડું અજીબ લાગતું હોય પણ હવે આ વિચાર હવે હકીકતમાં બદલાઇ રહ્યો છે, સ્પેનની એક મહિલા કલાકાર પોતાના એઆઈ હોલોગ્રામ સાથે લગ્ન કરવા જઇ રહી છે. વિશ્વની આ પ્રથમ ઘટના છે કે જેમાં કોઇ એઆઈ હોલોગ્રામ સાથે લગ્ન કરવા જઇ રહ્યું છે. આ મહિલા આર્ટિસ્ટનું નામ એલિસિયા ફ્રેમિસ છે જે વિશ્વની પ્રથમ એઆઈ-જનરેટેડ હોલોગ્રામ સાથે લગ્ન કરનારી મહિલા બનશે. તેણીએ પોતાના લગ્ન માટે પહેલેથી જ એક સ્થળ પણ બૂક કરાવી લીધું છે. અહેવાલો અનુસાર એલિસિયાના લગ્નનો સમારોહ આ વર્ષે જ રોટરડેમના એક મ્યુઝિયમમાં યોજાશે. એલિસિયા અનુસાર તેના પતિનું નામ AILex હશે કે જે તેણીનો જ એઆઈ હોલોગ્રામ છે. મહિલાએ પોતાના વર્ચ્યુઅલ પાર્ટનરની પ્રશંસા થોડા જટિલ લોજિસ્ટિક્સ ધરાવતાં મધ્યમ વયના પુરુષ હોલોગ્રામ તરીકે કરી છે.
વર્ચ્યુઅલ લગ્ન હાઇબ્રિડ કપલ નામના નવા પ્રોજેક્ટનો હિસ્સો
જો કે રિપોટ્ર્સ અનુસાર એલિસિયા ફ્રેમિસના લગ્ન કોઇ રોમેન્ટિક લગ્ન નથી પણ હાઇબ્રિડ કપલ નામના તેના એક નવા પ્રોજેક્ટનો હિસ્સો છે, જેમાં તેણી એઆઈના યુગમાં પ્રેમ, અંતરંગતા અને ઓળખની સીમાઓની સાથે પ્રયોગ કરવા માંગે છે. ફ્રેમિસ હાલના તબક્કે તો પોતાના શાનદાર લગ્ન માટેના ડ્રેસને ડિઝાઇન કરી રહી છે. આ ઉપરાંત તેણી પોતાના લગ્નમાં જોડાનારા મહેમાનો માટે ખાસ ડ્રેસકોડ રાખવાની છે અને તેની ડિઝાઇન પણ તૈયાર કરાવી રહી છે. અહેવાલો અનુસાર તમામ યોજના પાર પડશે તો એલિસિયા ફ્રેમિસના લગ્ન આ વર્ષના મે અથવા જૂનમાં રોટરડેમમાં ડિપો બોઇઝમેન્સ વાન બેયુનિંગન મ્યુઝિયમની અગાસીમાં કરવામાં આવશે. એલિસિયા ફ્રેમિસે પોતાના ઇન્સ્ટાગ્રામ એકાઉન્ટ પર પોતાના વર્ચ્યુઅલ પાર્ટનર AILexના ફોટોગ્રાફ્સ અને વીડિયોઝ પણ શેર કર્યા છે.
રોબોટ, હોલોગ્રામ સાથે પ્રેમ અને સેક્સ એક અનિવાર્ય વાસ્તવિકતા : એલિસિયા
એલિસિયા ફ્રેમિસ કહે છે કે હું એક કલાત્મક વૃત્તચિત્ર બનાવવા માંગું છું, જેમાં ચિત્ર, અન્ય મહિલાઓ સાથે ઇન્ટરવ્યૂ, શરીર, આલિંગન, રોમેન્ટિક સપનાઓ, ઘરેલું સ્થિતિઓ અને મારા સાથીના દૈનિક જીવન અંગેના રેખાચિત્રોનો સમાવેશ થાય છે. હું એ જાણવા માંગું છું કે હોલોગ્રામને દૈનિક જીવન સાથે કેવી રીતે એકીકૃત કરી શકાય. એલિસિયા કહે છે કે રોબોટ અને હોલોગ્રામ સાથે પ્રેમ અને સેક્સ એક અનિવાર્ય વાસ્તવિકતા છે. તે મહાન સાથી છે અને સહાનુભૂતિ વ્યક્ત કરવામાં સક્ષમ છે. જે રીતે ફોને આપણને એકલતાથી બચાવ્યા છે અને આપણા જીવનના શૂન્યાવકાશને ભરી દીધું છે, તે રીતે ઘરોમાં ઇન્ટરેક્ટિવ ઉપસ્થિતિના રૂપમાં હોલોગ્રામ તેને વધુ આગળ લઇ જઇ શકે તેમ છે.
