- મોંઢે કપડુ બાંધી SBI એટીએમ કેબિનમાં ઘુસી ચોરી કરી
- CCTV કેમેરા પર સ્પે મારીને ચોરીને અંજામ આપ્યો
- પોલીસની તપાસમાં ગેસ કટર, પ્લેટ સહિતનો સામાન મળ્યો
લીંબડી હાઇવેથી બસસ્ટેન્ડ તરફ રોડ ઉપરના કોમ્પલેક્ષના એ.ટી.એમ.માં મોડી રાત્રે ઇકો કારમાં આવી એક શખ્સ મોઢે કપડુ બાંધીને એ.ટી.એમ.ની કેબિનમાં ઘુસતાની સાથે જ કલરનો સ્પ્રે સીસીટીવી કેમેરા ઉપર છાંટી બીજા શખ્સોએ એ.ટી.એમ.નું રૂપીયા ભરેલુ ખાનુ ગેસ કટરથી કાપી અંદર રાખેલા 25 .40 લાખની રોકડ રકમ લઇને નાસી છુટયા હતા. આ લોકો બગોદરા પાસે હાઇવે નજીક સીમમાં ગેસ કટર સહિતનો એ.ટી.એમ.નો સામાન ફેંકીને નાસી છુટતા પોલીસે અલગ-અલગ ટીમ બનાવી એ તરફ આરોપીઓની શોધખોળ હાથ ધરી છે.
બનાવની વધુમાં પ્રાપ્ત વિગતો અનુસાર મોટાભાગે એ.ટી.એમ. તોડવુ ખુબ મુશ્કેલ બનતુ હોય છે થોડા વર્ષો અગાઉ માલવણ પાસેની કેનાલમાંથી આખુ એ.ટી.એમ. મશીન મળી આવ્યુ હતુ. એવામાં લીંબડી હાઇવે ચોકડીથી બસ સ્ટેન્ડ તરફ જતા રસ્તામાં આવતા યોગી કોમ્પલેક્ષમાં સ્ટેટ બેંક ઓફ ઇન્ડીયાનું એ.ટી.એમ. આવેલુ છે. જ્યાં મોડી રાત્રે ત્રણેક વાગ્યાના સુમારે નંબર પ્લેટ વગરની ઇકો કારમાં ચારેક શખ્સો એ.ટી.એમ. પાસે આવ્યા હતા. એક શખ્સે મોઢે કપડુ બાંધીને હાથમાં કલર સ્પ્રે લઇને સીધો સીસીટીવી કેમેરા ઉપર છંટકાવ કર્યો હતો. જે કરતૂત પણ કેમેરામાં કેદ થઇ ગઇ છે. ત્યારબાદ આ લોકોએ ગેસ કટરની મદદથી એ.ટી.એમ.ની રૂપીયા ભરેલી પ્લેટનો ભાગ કાપી આખી પ્લેટ ઉઠાવી ગયા હતા.આ ઘટના સમયે એ.ટી.એમ.ની સીકયુરીટી સેન્ટર મુંબઇ ખાતેથી તાત્કાલીક લીંબડી પોલીસ સ્ટેશને જાણ કરાઇ હતી. ઘટનાની જાણ થતા લીંબડી પોલીસ ઘટના સ્થળે પહોચતા આ શખ્સો કારમાં નાસી છુટયા હતા. ઘટનાની ગંભીરતા જોઇ સુરેન્દ્રનગર એસ.પી.ગીરીશ પંડયા, એલ.સી.બી., એસ.ઓ.જી. સહિતનો પોલીસ કાફલો સુરેન્દ્રનગરથી લીંબડી પહોચી ગયો હતો. જિલ્લા પોલીસે હાઇવે ઉપરના સીસીટીવી કેમેરા તપાસતા કાર બગોદરા તરફ જતી હોવાનું દેખાયુ હતુ. જેથી પોલીસે અલગ-અલગ ચાર ટીમ બનાવી આ નંબર વગરની કાર અને ચાર શખ્સોની શોધખોળ આદરી છે. આમ ગેસ કટરથી મેઇન રોડ ઉપરના એટીએમમાંથી રૂ. 25 .40 લાખની રોકડ ઉઠાવી નાસી છુટતાં આજુબાજુના વેપારીઓમાં ફફળાટ વ્યાપી ગયો હતો.
