- નવીદ એન્થોની રોમન કેથોલિક છે, આજે લેશે શપથ
- સૈયદ મુરાદ અલી શાહ મુખ્યમંત્રી પદ માટે ચૂંટાયા
- સૈયદ અવૈસ શાહ સ્પીકર પદ માટે પસંદગી પામ્યા
પાકિસ્તાનમાં 8 ફેબ્રુઆરીના રોજ ચૂંટણી યોજાઈ હતી, ત્યારબાદ ચૂંટણીમાં ધાંધલધમાલના આરોપો લાગ્યા હતા અને રાજકીય ડ્રામા જોવા મળ્યો હતો. આખરે સરકાર રચવાના સમાચાર સામે આવ્યા છે. સ્થાનિક મીડિયાના અહેવાલો અનુસાર પાકિસ્તાનમાં આવતા મહિનાના શરૂઆતના અઠવાડિયામાં એટલે કે માર્ચમાં ગઠબંધન સરકારની રચના કરવામાં આવશે. આ ગઠબંધન પાકિસ્તાન મુસ્લિમ લીગ-નવાઝ (PML-N) અને પાકિસ્તાન પીપલ્સ પાર્ટી વચ્ચે થશે. આ દરમિયાન પાકિસ્તાન પીપલ્સ પાર્ટીના અધ્યક્ષ બિલાવલ ભુટ્ટો ઝરદારીએ નવી ચૂંટાયેલી સરકારની રચનાની પ્રક્રિયા શરૂ કરવાની જાહેરાત કરી છે.
નવા ડેપ્યુટી સ્પીકર નવીદ એન્થોની
પાકિસ્તાનના ઈતિહાસમાં પ્રથમ વખત આ પ્રકારનું સિલેક્શન થવા જઈ રહ્યું છે, જે પહેલા ક્યારેય બન્યું નથી. પાકિસ્તાન પીપલ્સ પાર્ટીના અધ્યક્ષ બિલાવલ ભુટ્ટો ઝરદારીએ 23 ફેબ્રુઆરીના રોજ સત્તાવાર જાહેરાત કરી હતી, જેમાં તેમણે પ્રથમ વખત સિંધ વિધાનસભામાં બિન-મુસ્લિમને ડેપ્યુટી સ્પીકર તરીકે ચૂંટ્યા છે. નવા ડેપ્યુટી સ્પીકર નવીદ એન્થોની હશે.
24મી ફેબ્રુઆરીએ શપથ લેશે
વિભાજન પહેલા 1946 માં સિંધમાં પ્રથમ બિન-મુસ્લિમ ડેપ્યુટી સ્પીકર તરીકે ચૂંટાયા હતા. બિલાવલ ભુટ્ટોએ કહ્યું કે સિંધ વિધાનસભાના સભ્યો 24 ફેબ્રુઆરીએ શપથ લેશે. ડેપ્યુટી સ્પીકર ઉપરાંત સૈયદ મુરાદ અલી શાહ મુખ્યમંત્રી પદ માટે અને સૈયદ અવૈસ શાહ સ્પીકર પદ માટે ચૂંટાયા છે. પક્ષ પ્રમુખે તમામ ચૂંટાયેલા સભ્યોને તેમના પાછલા કાર્યકાળ કરતાં અનેકગણું સારું પ્રદર્શન કરવાની અપીલ કરી હતી અને એમ પણ કહ્યું હતું કે રાજ્યમાં ભ્રષ્ટાચારને રોકવા માટે તેઓએ કડક પગલાં લેવા જોઈએ.
નવીદ એન્થોની રોમન કેથોલિક
નવીદ એન્થોની રોમન કેથોલિક છે અને 2018 માં પાકિસ્તાની સામાન્ય ચૂંટણીમાં લઘુમતીઓ માટે અનામત બેઠક પર સિંધની પ્રાંતીય એસેમ્બલી માટે ચૂંટાયા હતા, ત્યારબાદ તેમણે 13 ઓગસ્ટ 2018 થી 11 ઓગસ્ટ 2023 સુધી સિંધની પ્રાંતીય એસેમ્બલીના સભ્ય તરીકે સેવા આપી હતી. નવીદની પસંદગી પાકિસ્તાનના કાયદા હેઠળ ધાર્મિક લઘુમતીઓને સીટો ફાળવવા માટે કરવામાં આવી હતી. બિલાવલ હાઉસ ખાતે પીપીપી સિંધ સંસદીય દળની બેઠક દરમિયાન બિલાવલ ભુટ્ટો ઝરદારીએ આ નિર્ણય લીધો હતો. તેમણે બેઠક દરમિયાન ઘણા મહત્વપૂર્ણ મુદ્દાઓ પર પણ વાત કરી. તેમણે પ્રાંતીય સરકારને આ વખતે વધુ સારું પ્રદર્શન કરવા માટે પ્રોત્સાહિત કર્યા, અને વર્ષ 2022 માં પૂર દરમિયાન નાશ પામેલી શાળાઓનું પુનઃનિર્માણ કરવા પર પણ ભાર મૂક્યો.
