- મુશીર ખાને રણજી ટ્રોફીમાં ફટકારી બેવડી સદી
- મુશીરની બેવડી સદીએ મુંબઈને વાપસી કરાવી
- મુશીર ખાને અંડર-19 વર્લ્ડકપમાં કર્યો હતો કમાલ
મુશીર ખાને રણજી ટ્રોફીમાં મુંબઈ તરફથી રમતા બેવડી સદી ફટકારી હતી. સરફરાઝ ખાનના નાના ભાઈએ બરોડા સામે રમાઈ રહેલી રણજી ટ્રોફીની ક્વાર્ટર ફાઇનલમાં શાનદાર ઈનિંગ રમીને મુંબઈને મેચમાં વાપસી કરાવી હતી. મુશીરે 18 ફોર ફટકારીને તેની બેવડી સદી પૂરી કરી હતી. એક તરફ મોટો ભાઈ સરફરાઝ ઈંગ્લેન્ડ સામે ભારત માટે ચમકી રહ્યો છે તો બીજી તરફ નાના ભાઈએ ફર્સ્ટ ક્લાસમાં કમાલ કર્યો છે.
મુશીર ખાનની બેવડી સદી
મુશીરે શાનદાર ઇનિંગ રમીને મુંબઈને મુશ્કેલ પરિસ્થિતિમાંથી બહાર કાઢ્યું હતું. મુંબઈએ 90 રનના સ્કોર પર ચોથી વિકેટ અને 142 રનના સ્કોર પર પાંચમી વિકેટ ગુમાવી હતી. પરંતુ તે દરમિયાન મુશીર ખાને એક છેડે ઈનિંગને સંભાળીને ટીમને શાનદાર સ્કોર સુધી પહોંચાડવામાં મદદ કરી હતી. મુશીરની આ ઈનિંગ મુંબઈને જીત તરફ લઈ જઈ રહી હોય તેવું લાગી રહ્યું છે. એક સમયે ખરાબ હાલતમાં રહેલું મુંબઈ હવે મુશીરની બેવડી સદી બાદ જીતના પ્રબળ દાવેદાર જેવું લાગે છે.
બરોડા સામેની ક્વાર્ટર ફાઈનલને બાદ કરતાં, મુશીરે માત્ર ત્રણ ફર્સ્ટ ક્લાસ મેચ રમી છે. મુશીરે ડિસેમ્બર 2022માં ફર્સ્ટ ક્લાસ ક્રિકેટમાં ડેબ્યૂ કર્યું હતું. બેવડી સદીની મેચ પહેલા, મુશીરે 3 મેચની 5 ઇનિંગ્સમાં બેટિંગ કરતા 19.20ની એવરેજથી માત્ર 96 રન બનાવ્યા હતા. પરંતુ હવે તેની કારકિર્દીની ચોથી ફર્સ્ટ ક્લાસ મેચમાં મુશીરે ઐતિહાસિક ઇનિંગ રમી હતી.
અંડર-19 વર્લ્ડકપમાં કર્યો હતો કમાલ
ઉલ્લેખનીય છે કે તાજેતરમાં રમાયેલા અંડર-19 વર્લ્ડકપ 2024માં મુશીરે શાનદાર બેટિંગ કરી હતી. મુશીર ટૂર્નામેન્ટમાં બીજા સૌથી વધુ રન બનાવનાર ખેલાડી હતો. તેણે 7 મેચની 7 ઇનિંગ્સમાં 60.00ની એવરેજથી 360 રન બનાવ્યા. આ દરમિયાન તેણે પોતાના બેટથી 2 સદી ફટકારી હતી. મુશીર અંડર-19 વર્લ્ડકપમાં સૌથી વધુ સદી ફટકારનાર બેટ્સમેન હતો. આ સિવાય તેણે 1 ફિફ્ટી પણ ફટકારી હતી.
