કાળીપાટ પાસે ટ્રકની અડફેટે બાઈકસવાર યુવાનનું મોત
રાજકોટ-ભાવનગર હાઇવે પર હિટ એન્ડ રનની ઘટના; અકસ્માત બાદ ટ્રકચાલક વાહન સાથે ફરાર
અગ્ર ગુજરાત, રાજકોટ
રાજકોટ-ભાવનગર હાઇવે પર કાળીપાટ ગામ નજીક ગત રાત્રે હિટ એન્ડ રનની ઘટનામાં બાઈકસવાર 21 વર્ષીય યુવાનનું મોત નીપજ્યું હતું. પૂરપાટ ઝડપે પસાર થઈ રહેલા ટ્રકે બાઈકને અડફેટે લીધા બાદ સ્થળ પરથી ફરાર થઈ જતાં પોલીસે અકસ્માત સર્જનાર ટ્રકચાલકની શોધખોળ શરૂ કરી છે.
મળતી વિગતો મુજબ રાજકોટ તાલુકાના લોઠડા ગામે રહેતો રાકેશ ઉર્ફે રાહુલ વિઠલભાઈ સરીયા (ઉ.વ.21) ગત રાત્રે આશરે નવ વાગ્યાના અરસામાં બાઈક લઈને રાજકોટ-ભાવનગર હાઇવે પરથી પસાર થઈ રહ્યો હતો. દરમિયાન કાળીપાટ ગામ નજીક પાછળથી પૂરપાટ ઝડપે આવેલા ટ્રકે બાઈકને જોરદાર ટક્કર મારી હતી. ટક્કર એટલી ગંભીર હતી કે રાકેશ બાઈક સાથે રસ્તા પર પટકાયો હતો અને તેને માથા સહિત શરીરના ભાગે ગંભીર ઈજાઓ પહોંચી હતી.
અકસ્મતનો અવાજ થતાં આસપાસના લોકો તાત્કાલિક ઘટનાસ્થળે દોડી આવ્યા હતા. ગંભીર રીતે ઘવાયેલા રાકેશને 108 એમ્બ્યુલન્સ મારફતે રાજકોટ સિવિલ હોસ્પિટલમાં ખસેડવામાં આવ્યો હતો. જોકે હોસ્પિટલમાં ટૂંકી સારવાર દરમિયાન જ તબીબોએ તેને મૃત જાહેર કર્યો હતો. બીજી તરફ અકસ્માત સર્જનાર ટ્રકચાલક ટ્રક સાથે ઘટનાસ્થળેથી નાસી છૂટ્યો હતો.
બનાવની જાણ થતાં આજીડેમ પોલીસની ટીમ ઘટનાસ્થળે તેમજ સિવિલ હોસ્પિટલ ખાતે પહોંચી હતી અને અકસ્માત અંગેની કાર્યવાહી હાથ ધરી હતી. પોલીસે ફરાર ટ્રકચાલકની ઓળખ મેળવવા તેમજ તેને ઝડપી પાડવા માટે તપાસ શરૂ કરી છે.
રાકેશ બે ભાઈ અને એક બહેનમાં સૌથી નાનો હતો અને બફના કારખાનામાં કામ કરીને પરિવારને આર્થિક રીતે મદદરૂપ થતો હતો. તેના પિતાનું અગાઉ જ અવસાન થઈ ચૂક્યું છે. પરિવારે યુવાન પુત્ર ગુમાવતા શોકનો માહોલ છવાઈ ગયો હતો.
