- ભારે પવન અને કરા સાથે વરસાદની શક્યતા, નવેમ્બરમાં પણ વાદળવાયું રહે
- હિમાચલથી ગુજરાતના ભાગોમાં કમોસમી વરસાદની શક્યતા
- ચક્રવાતો બંગાળના ઉપસાગરમાં ડિસેમ્બર માસમાં પણ રહી શકે
ચોમાસાની પીછેહઠ દેશના ઘણા ભાગોમાંથી થવામાં છે. ગુજરાતના ભાગોમાંથી પણ ચોમાસાની પીછેહઠ થવામાં છે. તા.9 સુધીમાં આવેલા વેસ્ટર્ન ડિસ્ટર્બન્સના કારણે દેશના ઉત્તરીય પર્વતીય પ્રદેશોમાં સિઝનની પહેલી હળવી હિમવર્ષા થવાની શક્યતા રહેશે. અન્ય ઉત્તરીય પર્વતીય પ્રદેશોમાં કમોસમી વરસાદ થવાની શક્યતા રહેશે તેમ અંબાલાલ દા.પટેલે જણાવ્યું છે.
તા.13 થી 14માં પરંતુ બીજું એક પશ્ચિમી વિક્ષેપ આવતા તેની અસર તળે દેશના ઉત્તરીય પર્વતીય પ્રદેશોમાં પંજાબ, જમ્મુ કાશ્મીર, પંજાબ, હરિયાણા, રાજસ્થાનના ભાગોમાં કમોસમી વરસાદ થવાની શક્યતા રહેશે. તા.17 થી 19માં એક મજબૂત પશ્ચિમી વિક્ષેપ આવશે. જેના લીધે દેશના ઉત્તરીય પર્વતીય પ્રદેશો, છેક હિમાચલથી માંડીને ગુજરાતના ભાગો સુધીમાં કમોસમી વરસાદ થવાની શક્યતા રહેશે. આ સિસ્ટમના કારણે ભારે પવન અને કરાં સાથે વરસાદ થવાની શક્યતા રહે. તા.17 ઓક્ટોબરે દરિયા કિનારે પવન ફૂંકાવાની પણ શક્યતા રહે અને દરિયામાં હલચલ જોવા મળે. તા.18-19મીથી બંગાળના ઉપસાગર અને અરબ સાગરમાં પણ ચક્રવાત સર્જાવાની શક્યતા રહેશે. પૂર્વીય દેશોના ભારે સ્ટોર્મની ગતિવિધિના અવશેષો બંગાળના ઉપસાગરમાં આવતા તા.22 થી 24માં સાયક્લોન સર્જાવાની શક્યતા રહે અને માસના અંત સુધીમાં આ સાયકલોનની અસર દેશના પૂર્વીય રાજ્યો, આંધ્ર અને ઓરિસ્સાના ભાગો તરફ રહેવાની શક્યતા રહે.
અરબ સાગર અને બંગાળના ઉપસાગરમાં બંને ચક્રવાતો સાથે થતા હોવાથી અરબ સાગરનો ભેજ બંગાળના ઉપસાગર તરફ જતા કદાચ અરબ સાગરનું ચક્રવાત દક્ષિણ ભારતમાં વરસાદ કરી શકે. પરંતુ તેની ગતિવિધિ તા.20 પછી જ ખ્યાલ આવે. હાલમાં અરબ સાગરમાં સંભવિત ચક્રવાતની હલચલ દૂર છે જે લક્ષ્યદ્વીપના ભાગો તરફ આવ્યા પછી તેની ગતિવિધિનો ખ્યાલ આવી શકે. સમુદ્રનું તાપમાન અન્ય ઉદ્દભવતા પરિબળોની અસર શું થાય છે તેના પર આ સંભવિત ચક્રવાતની અસર રહે. કારણકે ચોમાસું ઓટાય છે એટલે તેના પવન દક્ષિણ તરફ હડસેલાય છે. આ ગતિવિધિના કારણે આ બાબતની અસર પણ થઈ શકે. બંગાળના ઉપસાગરમાં આંધ્ર, ઓરિસ્સા થઈને મધ્ય પ્રદેશ તરફ ચક્રવાત આવે તે નીચલા સ્તરના પવનના કારણે પાછું ઠેલાઈ શકે. તા.7 નવેમ્બરે પણ બંગાળના ઉપસાગર પર ચક્રવાતની અસર જોવા મળશે અને તા.16 થી 20 નવેમ્બરમાં બંગાળના ઉપસાગર ઉપર મજબૂત ચક્રવાત બનવાની શક્યતા રહેશે અને આ અરસામાં દરિયા કિનારે ભારે પવન પણ ફૂંકાવાની શક્યતા રહે. જેની અસર તળે ગુજરાતમાં વાદળવાયું આવી શકે. ચક્રવાતો બંગાળના ઉપસાગરમાં ડિસેમ્બર માસમાં પણ રહી શકે.
અલ નિનોની અસર થાય તો શિયાળો હૂંફાળો રહી શકે
આ વખતે શિયાળા અંગે જોતા અલ નિનોની અસર જો થાય તો શરૂઆતનો શિયાળો હુંફાળો રહી શકે. પરંતુ 22 ડિસેમ્બર બાદ દેશના ઉત્તરીય પર્વતીય પ્રદેશોમાં ભારે હિમવર્ષા થતા ઠંડી પડી શકે અને જાન્યુઆરી માસ પણ ઠંડો રહી શકે. 5મી ફેબ્રુઆરીથી ઠંડીનું જોર વધવાની શક્યતા રહેશે અને આ ઠંડી લંબાય પણ શકે. 12 ફેબ્રુઆરી અને તે પછી પણ ઠંડી રહી શકે. ફેબ્રુઆરી માસમાં લઘુત્તમ ઉષ્ણતામાન ઉત્તર ગુજરાતના ભાગોમાં કેટલાક ભાગોમાં 8 ડિગ્રીથી નીચું જવાની શક્યતા રહે. ભુજ-નલિયામાં 7 ડિગ્રી થવાની શક્યતા રહે. આબુમાં ઠંડી વધુ અનુભવાય. દેશના ઉત્તરીય પર્વતીય પ્રદેશોમાં ભારે હિમવર્ષા થવાની શક્યતા રહે.
