રાજકોટ બિમાર: જુલાઈમાં 8331 દર્દી નોંધાયા
RMC દ્વારા વન-ડે વન વોર્ડ ઝૂંબેશ શરૂ, ૧૬૦ ટીમ દ્વારા ઘર, શાળા, બાંધકામ સાઇટ, સરકારી કચેરીમાં ચકાસણીની કામગીરી કરશે
અગ્ર ગુજરાત, રાજકોટ
રાજકોટમાં ગત જુલાઈ માસ દરમિયાન શરદી, ઉધરસ, તાવ, ઝાડા-ઉલટી તેમજ ડેન્ગ્યુ અને મેલેરિયા જેવા મોસમી તથા વાહકજન્ય રોગચાળાના કેસોમાં વધારો નોંધાયો છે. ચોમાસાની વર્તમાન ઋતુમાં ઠેર-ઠેર પાણી ભરાવાના કારણે મચ્છરોના ઉત્પત્તિ સ્થાનો ઝડપથી વધી રહ્યા છે, જેને પગલે રોગચાળો વધુ ન વકરે તે માટે રાજકોટ મહાનગરપાલિકાની આરોગ્ય શાખા તાત્કાલિક એક્શન મોડમાં આવી છે. જેમાં વાહકજન્ય રોગોને અસરકારક રીતે નિયંત્રિત કરવા અને મચ્છર ઉત્પત્તિના સ્થાનોનો સ્થળ પર જ નાશ કરવાના હેતુથી RMC દ્વારા ખાસ ‘વન-ડે-વન-વોર્ડ’ ઝુંબેશ શરૂ કરવામાં આવી છે. જે અંતર્ગત ઓગસ્ટ માસ દરમિયાન 160થી વધુ ટીમો ઘરો, શાળા, બાંધકામ સાઇટ, હોટેલ-રેસ્ટોરન્ટ અને સરકારી કચેરીઓ સહિતના સ્થળે ભરાયેલા પાણીની ચકાસણી કરશે. જ્યાં મચ્છર ઉત્પત્તિ માલૂમ પડશે તો નોટિસ અને પેનલ્ટી સહિતની કડક કાર્યવાહી શરૂ કરવામાં આવી છે.
પ્રાપ્ત વિગત મુજબ રાજકોટમાં જુલાઈ માસ દરમિયાન મોસમી અને વાહકજન્ય રોગચાળાના કેસોમાં નોંધપાત્ર વધારો જોવા મળ્યો છે. જુલાઈ મહિનામાં શહેરમાં કુલ 8331 કેસ નોંધાયા હતા, જેમાં શરદી-ઉધરસના 3447 કેસ, સામાન્ય તાવના 3481 કેસ, ઝાડા-ઉલટીના 1364 કેસ, ટાઈફોઈડના 4 કેસ, કમળાના 3 કેસ, ડેન્ગ્યુના 1 અને મેલેરિયાના 1 કેસનો સમાવેશ થાય છે. જુલાઈના પ્રથમ સપ્તાહમાં કુલ 1741 કેસ (શરદી-ઉધરસ 719, તાવ 764, ઝાડા-ઉલટી 258) નોંધાયા હતા. બીજા સપ્તાહમાં કેસ વધીને 2133 (શરદી-ઉધરસ 932, તાવ 906, ઝાડા-ઉલટી 292, ટાઈફોઈડ 1, કમળા 2) થયા હતા. ત્રીજા સપ્તાહમાં 2058 કેસ (શરદી-ઉધરસ 878, તાવ 839, ઝાડા-ઉલટી 338, ટાઈફોઈડ 3) અને અંતિમ સપ્તાહમાં કેસનો આંકડો 2399 (શરદી-ઉધરસ 948, તાવ 972, ઝાડા-ઉલટી 476, કમળા 1, મેલેરિયા 1, ડેન્ગ્યુ 1) સુધી પહોંચી ગયો હતો.
ચોમાસાની ઋતુ દરમિયાન મચ્છરોના ઉત્પત્તિ સ્થાનો વધવાથી ડેન્ગ્યુ, મેલેરિયા અને ચિકનગુનિયા જેવા વાહકજન્ય રોગો ફેલાવાની સંભાવના વધી જાય છે. આ પરિસ્થિતિને ધ્યાનમાં રાખી રાજકોટ મહાપાલિકાની આરોગ્ય શાખા દ્વારા શહેરમાં મચ્છર ઉત્પત્તિ સ્થાનોનો નાશ કરી રોગચાળાને નિયંત્રણમાં રાખવા માટેની ખાસ ‘વન-ડે-વન-વોર્ડ’ ઝુંબેશનું આયોજન કરવામાં આવ્યું છે. વાહજન્ય રોગ નિયંત્રણ કાર્યક્રમ અન્વયે આ ઝુંબેશ અંતર્ગત શહેરના તમામ 18 વોર્ડની મુખ્ય ઓફિસ પરથી સઘન કામગીરી હાથ ધરવામાં આવશે. આ કાર્યક્રમ હેઠળ દરરોજ એક વોર્ડમાં આરોગ્ય વિભાગની તમામ ટીમો સંયુક્ત રીતે કામગીરી કરશે.
