- 114 રોડ પ્રોજેક્ટ્સનું ઉદ્ઘાટન અને શિલાન્યાસ કર્યું
- ગુરુગ્રામ વચ્ચે ટ્રાફિકને સરળ બનાવવામાં અને ભીડ ઘટાડવામાં મદદ કરશે
- મુસાફરોને આ એક્સપ્રેસવે ખોલવાથી ખૂબ જ જરૂરી રાહત મળવાની અપેક્ષા છે
વડાપ્રધાન નરેન્દ્ર મોદીએ આજે ગુરુગ્રામમાં આયોજિત એક કાર્યક્રમમાં દ્વારકા એક્સપ્રેસ વેના હરિયાણા ભાગનું ઉદ્ઘાટન કર્યું. આ એક એલિવેટેડ એક્સપ્રેસ વે છે. આ એક્સપ્રેસ વે નેશનલ હાઈવે-48 પર દિલ્હી અને ગુરુગ્રામ વચ્ચે ટ્રાફિકને સરળ બનાવવામાં અને ભીડ ઘટાડવામાં મદદ કરશે.
એક્સપ્રેસ વે ગુરુગ્રામમાં 18.9 કિલોમીટર અને દિલ્હીમાં 10.1 કિલોમીટર સુધી વિસ્તરેલો છે
એક્સપ્રેસ વે ગુરુગ્રામમાં 18.9 કિલોમીટર અને દિલ્હીમાં 10.1 કિલોમીટર સુધી વિસ્તરેલો છે, ગુરુગ્રામમાં ખેડકી દૌલા ટોલ પ્લાઝા નજીકથી લઈને દિલ્હીના મહિપાલપુરમાં શિવમૂર્તિ સુધી. 9,000 કરોડના ખર્ચે બનેલા આ પ્રોજેક્ટથી દિલ્હી-ગુરુગ્રામ એક્સપ્રેસવે અને અન્ય મુખ્ય માર્ગો પર ટ્રાફિકની સ્થિતિ હળવી થવાની અપેક્ષા છે. દિલ્હી-ગુડગાંવ એક્સપ્રેસવે અને અન્ય મુખ્ય માર્ગો પર ટ્રાફિકની ભીડનો સામનો કરી રહેલા મુસાફરોને આ એક્સપ્રેસવે ખોલવાથી ખૂબ જ જરૂરી રાહત મળવાની અપેક્ષા છે.
વડા પ્રધાન નરેન્દ્ર મોદીએ ગુરુગ્રામ, હરિયાણામાં આશરે રૂ. એક લાખ કરોડની કિંમતની 114 રોડ પ્રોજેક્ટ્સનું ઉદ્ઘાટન અને શિલાન્યાસ કર્યો. આજે અહીં, 1 લાખ કરોડ રૂપિયાથી વધુની 100થી વધુ યોજનાઓનું ઉદ્ઘાટન થઈ રહ્યું છે અથવા સમગ્ર દેશ માટે શિલાન્યાસ થઈ રહ્યો છે… હું તમામ રાજ્યોના કરોડો નાગરિકોને આટલા બધા વિકાસ પ્રોજેક્ટ્સ માટે અભિનંદન આપું છું: PM મોદી
શિલાન્યાસ અને ઉદ્ઘાટન માટે સમય અને દિવસો ઓછા પડી રહ્યા છે.
આ દરમિયાન પીએમ મોદીએ પોતાના સંબોધનમાં કહ્યું કે ‘પહેલાની સરકારો કોઈ નાની યોજના બનાવતી, કોઈ નાના કાર્યક્રમનું આયોજન કરતી અને પાંચ વર્ષ સુધી તેના માટે રાહ જોવડાવતી રહેતી. ત્યારે ભાજપ સરકાર જે ઝડપે કામ કરી રહી છે તે સાથે શિલાન્યાસ અને ઉદ્ઘાટન માટે સમય અને દિવસો ઓછા પડી રહ્યા છે. આજથી દિલ્હી અને હરિયાણા વચ્ચેના ટ્રાફિકનો અનુભવ હંમેશા માટે બદલાઈ જશે. આ આધુનિક એક્સપ્રેસ વે માત્ર વાહનોમાં જ નહીં પરંતુ દિલ્હી NCRના લોકોના જીવનમાં પણ ગિયર બદલવાનું કામ કરશે
મોટી કંપનીઓ અહીં આવીને પોતાના પ્રોજેક્ટ લગાવી રહી છે
તેમણે વધુમાં કહ્યું કે ‘હજી 2024ના ત્રણ મહિના પણ પૂરા થયા નથી અને આટલા ઓછા સમયમાં 10 લાખ કરોડ રૂપિયાના પ્રોજેક્ટનો શિલાન્યાસ અને ઉદ્ઘાટન કરવામાં આવ્યું છે. આ ફક્ત એવા પ્રોજેક્ટ્સ છે જેમાં હું પોતે સામેલ છું. આ સિવાય મારા મુખ્યમંત્રીઓ અને મંત્રીઓએ પણ વિકાસની યોજનાઓનો શિલાન્યાસ અને ઉદ્ઘાટન કર્યું છે. જ્યાં આજે દ્વારકા એક્સપ્રેસ વે બનાવવામાં આવ્યો છે, એક સમય હતો જ્યારે લોકો સાંજ પછી અહીં આવવાનું ટાળતા હતા. ટેક્સી ચાલકો પણ ના પાડતા હતા કે તેઓ અહીં ન આવે. આ આખો વિસ્તાર અસુરક્ષિત માનવામાં આવતો હતો. પરંતુ આજે ઘણી મોટી કંપનીઓ અહીં આવીને પોતાના પ્રોજેક્ટ લગાવી રહી છે. આ વિસ્તાર એનસીઆરના સૌથી ઝડપી વિકાસશીલ વિસ્તારોમાંનો એક બની રહ્યો છે.
