- પાકિસ્તાનના પૂર્વ પીએમ ઈમરાન ખાનનો મોટો આરોપ
- પત્ની બુશરા બીબીના શરીરમાં ઝેરના નિશાન જેવા મળ્યાં : ઈમરાન ખાન
- ઈમરાન ખાનના આક્ષેપને લઈ પાકિસ્તાનમાં ચકચાર
પાકિસ્તાનના પૂર્વ વડાપ્રધાન ઈમરાન ખાને જેલમાં રહીને મોટો દાવો કર્યો છે. તેણે કહ્યું છે કે તેની પત્ની બુશરા બીબીને જેલવાસ દરમિયાન ઝેરથી ભરેલું ભોજન આપવામાં આવ્યું હતું. ઈમરાન ખાને કહ્યું છે કે જો બુશરા બીબીને કોઈ નુકસાન થાય છે તો તેના માટે પાકિસ્તાનના આર્મી ચીફ જવાબદાર હોવા જોઈએ. ઈમરાનની પત્ની બુશરા બીબી તેના ખાનગી નિવાસસ્થાને બનેલી સબ-જેલમાં કેદ છે. ઈમરાન ખાને કોર્ટને આ મામલે તપાસ કરવાની વિનંતી કરી છે.
શરીરમાં ઝેરના નિશાન જોવા મળ્યા: ઈમરાન ખાન
પાકિસ્તાન તહરીક-એ-ઈન્સાફ પાર્ટીના વડા ઈમરાન ખાને તોશાખાના ભ્રષ્ટાચાર કેસની સુનાવણી દરમિયાન જજને માહિતી આપી હતી કે તેમની પત્નીને ઝેર આપવાનો પ્રયાસ કરવામાં આવ્યો હતો. ઇમરાને કહ્યું કે ઝેરની ખરાબ અસરને કારણે બુશરાની ત્વચા અને જીભ પર નિશાન જોવા મળી શકે છે. ઈમરાન ખાને કહ્યું કે જો બુશરાને કોઈ નુકસાન થાય તો પાકિસ્તાનના આર્મી ચીફ જનરલ અસીમ મુનીરને જવાબદાર ગણવા જોઈએ. કારણ કે એક ગુપ્તચર એજન્સીના સભ્યો દરેક વસ્તુને નિયંત્રિત કરી રહ્યા છે.
અગાઉના ડૉક્ટર ઉપર વિશ્વાસ ન કરવા ઈમરાને જણાવ્યું
ઈમરાન ખાને કોર્ટને વિનંતી કરી છે કે બુશરાની શૌકત ખાનુમ હોસ્પિટલના ડૉક્ટર અસીમ દ્વારા મેડિકલ તપાસ કરવાનો આદેશ આપવામાં આવે. ઈમરાન ખાને કહ્યું છે કે તેમને અને તેમની પાર્ટીને બુશરાની પ્રથમ તપાસ કરનાર ડૉક્ટર પર વિશ્વાસ નથી. ઈમરાને બુશરાને કથિત રીતે ઝેરી પદાર્થ આપવાના કેસની તપાસ કરવાની પણ કોર્ટને વિનંતી કરી છે. તેના પર કોર્ટે આ કેસમાં વિગતવાર અરજી દાખલ કરવાનો નિર્દેશ આપ્યો છે.
બુશરા બીબીએ પણ નિવેદન આપ્યું
આ સમગ્ર મુદ્દે બુશરાએ કહ્યું છે કે ભોજનમાં ‘ટોઇલેટ ક્લીનર’ના ત્રણ ટીપાં ભેળવવામાં આવ્યા હતા. બુશરાએ દાવો કર્યો હતો કે એક મહિના સુધી તેનું સેવન કર્યા પછી વ્યક્તિની તબિયત બગડે છે. તેણે કહ્યું કે તેની આંખો સૂજી ગઈ હતી અને તેને છાતી અને પેટમાં દુખાવો અને અસ્વસ્થતા હતી. બુશરાએ કહ્યું છે કે પહેલા તેના મધમાં કોઈ શંકાસ્પદ પદાર્થ ભેળવવામાં આવ્યો હતો અને હવે તેના ભોજનમાં ટોયલેટ ક્લીનર ભેળવવામાં આવ્યું છે. બુશરાએ કહ્યું છે કે જેલમાં તેને કોઈએ કહ્યું હતું કે તેના ખોરાકમાં શું ભેળવવામાં આવે છે. પરંતુ તેણી તેનું નામ જાહેર કરશે નહીં.
