- બે ભારતીય વિદ્યાર્થીઓ મિત્રો સાથે ટ્રેકિંગ પર ગયા હતા
- ટ્રેકિંગ દરમિયાન વિદ્યાર્થીઓએ બેલેન્સ ગુમાવતા બંને નદીના ઊંડા પાણીમાં ગરકાવ થતા મોતને ભેટયા
- બંને વિદ્યાર્થીઓના મોત અંગેની જાણકારી ભારતીય દૂતાવાસને કરવામાં આવી
અમેરિકા, કેનેડા બાદ વધુ એક દેશમાં ભારતીય વિદ્યાર્થીઓના મોતની ઘટના સામે આવી છે. આ કરૂણ ઘટના છે સ્કોટલેન્ડ દેશની. સ્કોટલેન્ડમાં બે ભારતીય વિદ્યાર્થીઓના મોત થયા છે. ડૂબી જવાથી બંનેએ જીવ ગુમાવ્યો હતો. ચાર મિત્રો લિન ઓફ ટુમેલ ટૂરિસ્ટ સ્પોટ, જે તેના ધોધ માટે પ્રખ્યાત છે, ટ્રેકિંગ માટે ગયા હતા. એક મૃતક 22 વર્ષનો અને બીજો 27 વર્ષનો હતો. ટ્રેકિંગ દરમિયાન બંનેએ અચાનક બેલેન્સ ગુમાવ્યું અને પાણીમાં પડી ગયા. બંનેના મૃતદેહ મળી આવ્યા છે. આ અકસ્માત બુધવારે રાત્રે થયો હતો. તુમેલનું લિન પિટલોક્રી, પર્થશાયરના ઉત્તર-પશ્ચિમમાં તુમેલ અને ગેરી નદીઓના સંગમ પર સ્થિત છે. આ વિસ્તાર ખડકો અને ધોધ માટે પ્રખ્યાત છે.
ચારેય લોકો ડંડી યુનિવર્સિટીના વિદ્યાર્થીઓ હતા. બે લોકો પાણીમાં પડતાં જ બંને મિત્રોએ પોલીસને જાણ કરી હતી. જે બાદ પોલીસ, ફાયર બ્રિગેડ અને એમ્બ્યુલન્સ ઘટનાસ્થળે પહોંચી હતી. બંને મૃતકો આંધ્રપ્રદેશના રહેવાસી હતા. લંડન સ્થિત ભારતીય દૂતાવાસે પણ આ ઘટનાની પુષ્ટિ કરી છે. તેમના મૃતદેહ મળી આવ્યા છે. દૂતાવાસ વિદ્યાર્થીઓના પરિવારના સંપર્કમાં છે. સાથે જ ડંડી યુનિવર્સિટીએ પણ શક્ય તમામ મદદની ખાતરી આપી છે.
શુક્રવારે બંનેનું પોસ્ટમોર્ટમ કરવામાં આવશે
એક મૃતકના સંબંધીઓ યુકેમાં રહે છે. દૂતાવાસના અધિકારીઓ પણ તેમને મળ્યા છે. જણાવવામાં આવી રહ્યું છે કે વિદ્યાર્થીઓનું પોસ્ટમોર્ટમ આજે જ કરવામાં આવશે. જે બાદ મૃતદેહોને ભારત લાવવામાં આવશે. પોલીસ સ્કોટલેન્ડના પ્રવક્તાએ જણાવ્યું હતું કે તેઓને બુધવારે સાંજે 7 વાગ્યે બ્લેર એથોલ નજીક લિન તુમેલ ધોધ ખાતે અકસ્માત અંગે ચેતવણી આપવામાં આવી હતી. જે બાદ તમામ ટીમ ઘટનાસ્થળે ગઈ હતી. ત્યાંથી બે લોકોના મૃતદેહ મળી આવ્યા છે. મૃતકના મિત્રોની પૂછપરછ ચાલી રહી છે. આ કેસમાં હજુ સુધી કોઈ શંકાસ્પદ પાસું મળ્યું નથી. તેનો રિપોર્ટ પણ ટૂંક સમયમાં પ્રશાસનને સોંપવામાં આવશે.
