- રણપ્રદેશ એવા યુએઈમાં ફરી વરસાદનું આગમન થયું
- દુબઈ એરપોર્ટ પર ફલાઈટ્સ રદ્દ કરવામાં આવી
- એકલા દુબઈમાં બે મહિનામાં પડે એટલો માત્ર 12 કલાકમાં વરસાદ ખાબક્યો
વિશ્વના સુક્કાભઠ્ઠ એવા રણપ્રદેશ સંયુક્ત અરબ અમીરાતમાં ફરીથી વરસાદ શરૂ થઈ ગયો છે. જેના લીધે દુબઈમાં આવેલા વિશ્વાના બીજા નંબરના સૌથી વ્યસ્ત આંતરરાષ્ટ્રીય એરપોર્ટ પરની અનેક ફલાઈટ્સ રદ્દ કરવી પડી છે. આ ઉપરાંત ઘણી ફલાઈટ મોડી ઉપડશે તેવી સ્થિતિ સર્જાઈ છે. દુબઈ વહીવટી તંત્રએ વિદ્યાર્થીઓ અને કામ પર જતા લોકોને ઘર પર રહેવાની સૂચના આપી છે. બે અઠવાડિયા અગાઉ યુએઈ અને આસપાસના વિસ્તારોમાં વિક્રમજનક વરસાદ પડયો હતો. જેના લીધે યુએઈ અને પાડોશી દેશ ઓમાનમાં પૂર આવ્યું હતું. આ દરમિયાન દુબઈ એરપોર્ટ સહિત શહેરના પોશ વિસ્તારોમાં જળમગ્ન થયા હતા. વરસાદ અને પૂરને લીધે યુએઈમાં ચાર લોકોનાં મોત થયા હતા. જ્યારે પાડોશી ઓમાં 19 લોકોનાં મોત થઈ ગયા હતા. હવે ફરીથી વરસાદ અને વાવોઝોડું પરત આવતા લોકોને ડરાવી દીધા છે.
બે મહિના જેટલો વરસાદ માત્ર 12 કલાકમાં પડયો
સોશિયલ મીડિયા પર વરસાદના ઘણા વીડિયો સામે આવ્યા છે. જેમાં ભારે પવન સાથે રસ્તાઓ પર ભારે વરસાદ જોવા મળી રહ્યો છે. આ સમય દરમિયાન, વીજળી પણ ચમકતી હોય છે. બે અઠવાડિયા પહેલા જેટલો વરસાદ ન હોવા છતાં, દુબઈમાં 12 કલાકની અંદર 20 મીમી વરસાદ થયો છે. જે સામાન્ય રીતે એપ્રિલ અને મે મહિનામાં પડેલા વરસાદ કરતાં બમણો છે. અબુ ધાબી, અન્ય અમીરાતમાં 24 કલાકમાં 34 મીમી વરસાદ નોંધાયો છે, જે એપ્રિલ અને મેના સરેરાશ વરસાદ કરતાં ચાર ગણો વધુ છે.
દુબઈએ પૂરમાંથી પાઠ શીખ્યો
દુબઈએ અગાઉના વરસાદના કારણે આવેલા પૂરમાંથી પાઠ શીખ્યો છે અને આ વખતે તેની તૈયારીઓ સ્પષ્ટ દેખાઈ રહી છે. વરસાદના એક દિવસ પહેલા કામદારોએ રસ્તાઓ પરની ગટર ખોલી નાખી હતી. શહેરમાં મોબાઈલ ફોન પર વ્યાપકપણે ઈમરજન્સી એલર્ટ મોકલવામાં આવ્યા હતા અને લોકોને ઘરમાં જ રહેવા ચેતવણી આપવામાં આવી હતી. પૂરગ્રસ્ત ખીણ વિસ્તારોમાં રસ્તાઓ બંધ કરી દેવામાં આવ્યા હતા, જ્યારે લોકોને પર્વતીય, રણ અને દરિયાઈ વિસ્તારોમાંથી દૂર રહેવા માટે કહેવામાં આવ્યું હતું.
યુએઈ માટે આબોહવા પરિવર્તન જવાબદાર
UAEના રણ વિસ્તારોમાં ભારે વરસાદ સામાન્ય નથી. વૈજ્ઞાનિકોએ બે અઠવાડિયા પહેલા થયેલા રેકોર્ડ વરસાદને ક્લાઈમેટ ચેન્જ સાથે જોડી દીધો છે. વર્લ્ડ વેધર એટ્રિબ્યુશન પહેલ હેઠળ 21 વૈજ્ઞાનિકો અને સંશોધકોની ટીમે શોધી કાઢ્યું છે કે બંને દેશોમાં ભારે વરસાદ માટે ક્લાઈમેટ ચેન્જ જવાબદાર છે. અભ્યાસમાં જાણવા મળ્યું છે કે ગ્લોબલ વોર્મિંગની અસર વિના વરસાદ 10થી 40 ટકાથી વધુ વધી શકે નહીં.
