- બલૂચિસ્તાનના કવેટામાં ચાર આતંકીઓએ પોલીસ વાહન પર ગોળીબાર કર્યો
- પાકિસ્તાન પોલીસે વળતી કાર્યવાહીમાં ચાર આતંકીઓને ઠાર કર્યા
- ઈમારતમાં સંતાયેલા ત્રણ આતંકીઓનું એન્કાઉન્ટર કરાયું
પાડોશી દેશ પાકિસ્તાનના સૌથી વધુ અશાંત એવા બલૂચિસ્તાન પ્રાંતના ક્વેટામાં એક પોલીસ વાહન પર ગોળીબાર કર્યા બાદ સુરક્ષાદળોએ ચાર આતંકવાદીઓને ત્યાં જ ઠાર કરી દીધા હતા. બલૂચિસ્તાનના આતંકવાદ વિરોધી વિભાગ એટલે કે સીટીડીની ટીમના જણાવ્યા પ્રમાણે પોલીસ વાહન પર ફાયરિંગ કર્યા પછી ચાર આતંકવાદીઓને શોધી લેવામાં આવ્યા હતા જે બાદ તમામને અથડામણમાં ઠાર કર્યા હતા.
સીટીડી એટલે કે આતંકવાદ વિરોધી વિભાગના સિનિયર અધિકારીએ જણાવ્યું કે, મોડીરાત્રે બે મોટર વ્હીકલ પર સવાર ચાર આતંકવાદીએ ક્વેટા રોડ પર પોલીસ માર્ચ કરતા એક પોલીસ વાહન પર હુમલો કરી દીધો હતો. પરંતુ સૈનિકો બખ્તરબંધ ગાડીઓમાં હોવાથી તમામનો જીવ બચી ગયો હતો.
ઈમારતમાં સર્ચ ઓપરેશન હાથ ધરાયું
તેમને આગળ જણાવ્યું કે આતંકવાદીઓના હુમલા પછી પોલીસે વળતી કાર્યવાહી શરૂ કરી હતી. જેમાં એક આતંકવાદી ઘટનાસ્થળે ઠાર થયો હતો. અન્ય આતંકી નજીક રહેલી બિલ્ડિંગમાં પલાયન થઈ ગયો હતો. પોલીસે આ ઈમારતની ઘેરાબંધી કરી વધારાના સુરક્ષા જવાનોને તૈનાત કરી દીધા હતા. જે બાદ સીટીડી ટીમે આતંકવાદીને બહાર કાઢવા સર્ચ ઓપરેશન હાથ ધર્યું હતું. સીટીડી પ્રવક્તાએ જણાવ્યું કે આતંકવાદીઓને સરન્ડર કરવા કહેવામાં આવ્યું પરંતુ તેઓએ પોલીસની ટીમ પર ભારે ગોળીબાર શરૂ કરી દીધો હતો. ત્યારબાદ સીટીડી ટીમે ઈમારતમાં એન્ટ્રી કરીને ત્રણેય આતંકવાદીઓને અથડામણમાં ઠાર કરી દઈને આગળની કાર્યવાહી હાથ ધરી હતી.
