- પાકિસ્તાનની જનતાને આતંકવાદ, વીજકાપ, મોંઘવારી સહન કરવાની નોબત આવી
- IMFને બેલઆઉટ પેકજ આપવા પાકિસ્તાનને કરગરવું પડયું
- પાકિસ્તાન આવેલી IMFની ટીમે પીએમ શાહબાઝ શરીફની વિનંતી ન સાંભળી
આતંકવાદ, મોંઘવારી, વીજકાપ અને કાળઝાળ ગરમી વેઠી રહેલા પાડોશી દેશ પાકિસ્તાનની મુશ્કેલીઓ હજી વધવાની છે. વડાપ્રધાન શાહબાઝ શરીફે જે આંતરરાષ્ટ્રીય નાણાંકોષ સામે ઝોળી ફેલાવી હતી તેને પૈસા આપવાની ના પાડી દીધી છે. પાકિસ્તાન સતત મદદ માગતું રહ્યું અને આઈએમએફની ટીમ ત્યાંથી પલાયન થઈ ગઈ. આઈએમએફે બેલઆઉટ પેકેજ માટે પાકિસ્તાન સામે કેટલીક શરતો રાખી છે. જેને પૂરી નહીં કરી શકાય. આર્થિક સુધારાની તપાસ કર્યા પછી આઈએમએફની ટીમ પરત વોશિંગ્ટન જતી રહી. ટીમ પરત જતા પહેલા પાકિસ્તાનમાં અમેરિકાના રાજદૂત ડોનાલ્ડ બ્લોમ સાથે પણ મુલાકાત કરી હતી.
IMFની ટીમ 10 મેના રોજ પાકિસ્તાન પહોંચી હતી. નવા બેલઆઉટ પેકેજને લઈને બંને પક્ષો વચ્ચે સ્ટાફ લેવલના કરાર પર હસ્તાક્ષર થવાના હતા, પરંતુ નબળી આર્થિક સ્થિતિ અને શરતો પૂરી ન થવાને કારણે આ થઈ શક્યું નહીં. IMF ટીમે જણાવ્યું હતું કે નાણાકીય સહાય મેળવવા માટે નિર્ધારિત શરતોની પ્રગતિની સમીક્ષા કર્યા પછી જ નવા બેલઆઉટ પેકેજની ચર્ચા અને વિચારણા કરવામાં આવશે. IMFએ કહ્યું કે શરતોને પૂર્ણ કરવા માટે લેવામાં આવેલા પગલાઓની સમીક્ષા કર્યા પછી જ આ ડીલ પર હસ્તાક્ષર કરવામાં આવશે. IMF એ એવા સમયે પાકિસ્તાનને આંચકો આપ્યો છે જ્યારે મોંઘવારી ઉંચી ચાલી રહી છે. લોટ, ચોખાથી લઈને રાંધણગૅસ સુધીની વસ્તુઓ સામાન્ય લોકોની પહોંચની બહાર થઈ ગઈ છે. આટલું ઓછું હોય તેમ પાકિસ્તાને પચાવી પાડેલા પીઓકે તેમજ દેશના અન્ય ભાગોમાં લોકો મોંઘવારી અને સરકારની બિનઅસરકારકતા સામે હિંસક વિરોધ કરી રહ્યા છે.
પાકિસ્તાનના વડાપ્રધાન વિનંતી કરતા રહ્યા
પાકિસ્તાનના વડાપ્રધાન શાહબાઝ શરીફ આઈએમએફની ટીમ સામે કરગરતા રહ્યા કે તેની સરકાર તરફથી તમામ શરતો પૂર્ણ કરી લેવાશે. પરંતુ આઈએમએફની ટીમે તેમની એક વાત ન સાંભળી. પાકિસ્તાનની આશા હતી કે આઈએમએફની ટીમ આ વખતે સ્ટાફ લેવલ કરાર પર સહી કરશે. સહમતી બાદ બેલઆઉટ પેકેજ આપવામાં આવશે. જો કે એવું ન થયું અને એક-એક પૈસાની ભીખ માગતા પાકિસ્તાને ફરી મોં વકાસીને રહી જવું પડયું. આઈએમએફે કહ્યું કે પાકિસ્તાન સંસદ દ્વારા બજેટને મંજૂરી મળ્યા પછી તે નક્કી કરશે કે ઈસ્લામાબાદને નવું બેલઆઉટ પેકેજ આપવું કે નહિ. મળતી માહિતી અનુસાર આઈએમએફની ટીમ પાકિસ્તાનમાં બજેટની તૈયારીઓ અને આર્થિક સુધારામાં થયેલી પ્રગતિની તપાસ માટે ગઈ હતી.
પાકિસ્તાન સામે આઈએમએફે કડક શરતો મૂકી
ગંભીર આર્થિક સંકટ અને ગેરવહીવટનો સામનો કરી રહેલા પાકિસ્તાનને તાત્કાલિક આર્થિક મદદની જરૂર છે. વિદેશી હૂંડિયામણ પણ સતત ઘટી રહ્યું છે, જેના કારણે નવા પ્રકારના સંકટનો સામનો કરવો પડી શકે છે. IMFએ ઊર્જા તેમજ નાણાકીય અને ટેક્સ સંબંધિત નીતિઓમાં વ્યાપક સુધારા કરવા જણાવ્યું છે. આ સિવાય સરકારી કંપનીઓના મેનેજમેન્ટ અને ખાનગીકરણને પ્રોત્સાહન આપવા માટે વધુ નિર્ણાયક પગલાં ભરવા માટે પણ કહેવામાં આવ્યું છે.
