અમરેલી-રાજુલના જાહેર માર્ગો પરના દબાણોમાં મંદિરો નહીં તોડવા હિન્દુ સંગઠનોની માંગ

VHP અને હિન્દુ સંગઠનોએ પ્રાંત કચેરી સુધી રેલી યોજી ઘેરાવો કર્યો

ભારત દેશમાં વિવિધ ભાષા, ધર્મ, પહેરવેશ સહિતની વિવિધતા વ્યાપેલી છે. આજે ધર્મને સંબંધીત કોઇ પણ સમુદાયની માનહાની સભર ટીપ્પણી સામે તરત લોકો એકત્ર થઇ તેનો વિરોધ નોધાવે છે. ધર્મને બાબતે અત્રે અમરેલી રાજુલ શહેરમાં જાહેર નડતરરૂપ દબાણો દૂર કરવાની કામગીરી તંત્રએ હાથ ધરી છે. આ દબાણોમાં મંદિરો પણ આવતા હોય મંદિરોને નહીં તોડવા તથા આ બાબતે લોકોની ધાર્મિક લાગણી દુભાતી હોય આ મંદિરો નહીં તોડવા માટે તંત્રને હિન્દુ સંગઠનોએ માંગ કરી છે.
વિશ્વ હિન્દુ પરિષદ અને વિવિધ હિન્દુ સંગઠનો મોટી સંખ્યામાં એકત્રીત થઇ રેલી સ્વરૂપે પ્રાંત કચેરીને ઘેરાવો કરી મંદિરો નહીં તોડવા માંગ કરી હતી. દબાણ દૂર કરવા માટે મંદિરોનો ભોગ લેવાતા લોકોમાં તંત્ર સામે રોષની લાગણી ફેલાઇ છે. વિશ્વ હિન્દુ પરિષદ અને વિવિધ હિન્દુ સંગઠનોએ ડિમોલિશનની કામગીરી અટકાવવામાં નહીં આવે તો આગામી સમયમાં અચોક્કસ મુદ્દત સુધી શહેર બંધ, ઉપવાસની ચીમકી ઉચ્ચારી છે. રાજુલા પોલીસે પ્રાંત કચેરી ખાતે બંદોબસ્ત ગોઠવી દીધો છે.