- 24 કલાકમાં સાર્વત્રિક વરસાદની આગાહી
- કેશોદમાં 6 ઇંચ, માણાવદરમાં 6 ઇંચ વરસાદ
- માળીયા હાટીના અને વિસાવદરમાં 4-4 ઇંચ મેઘમહેર
જુનાગઢ જિલ્લામાં ધોધમાર વરસાદ પડ્યો છે. જેમાં વહેલી સવારથી જ ધોધમાર વરસાદ શરૂ થયો છે. છેલ્લા 24 કલાકમાં સાર્વત્રિક વરસાદની આગાહી કરવામાં આવી છે. જેમાં કેશોદમાં 6 ઇંચ, માણાવદરમાં 6 ઇંચ વરસાદ તથા માળીયા હાટીના અને વિસાવદરમાં 4-4 ઇંચ વરસાદ આવ્યો છે. તેમજ જૂનાગઢ તાલુકામાં 3 ઇંચ, માળીયામાં 2.5 ઇંચ વરસાદ આવતા નીચાણવાળા વિસ્તારમાં પાણી ભરાયા છે.
જિલ્લામાં વરસાદી માહોલ જામતો જોવા મળી રહ્યો છે
ફરી એક વખત જૂનાગઢ શહેર અને જિલ્લામાં વરસાદી માહોલ જામતો જોવા મળી રહ્યો છે. પંદર દિવસ બાદ ફરી એક વખત જૂનાગઢ શહેરમાં ધોધમાર વરસાદનું આગમન થયું હતું. જેને લઈને જૂનાગઢ શહેરના મોટાભાગના માર્ગો પર વરસાદી પાણી વહેતા થયા હતા. વહેલી સવારે શરૂ થયેલા ધોધમાર વરસાદને કારણે વરસાદના પાણી જૂનાગઢ શહેરના માર્ગો પરથી વહેતા થયા હતા. પંદર દિવસ બાદ પડેલા વરસાદને કારણે જૂનાગઢ શહેરના વાતાવરણમાં ઠંડક પ્રસરી જવા પામી હતી.
સોમનાથ જિલ્લાના ગીર ગઢડામાં 30 એમએમ વરસાદ નોંધાયો
શરીરને દઝાડે તેવા તાપની વચ્ચે આજે ધોધમાર વરસાદ જૂનાગઢવાસીઓ માટે રાહતના સમાચાર લઈને આવ્યો હતો. વરસાદ પડવાથી મોટાભાગના વિસ્તારમાં વરસાદનું પાણી વહેતું થયું જોવા મળ્યું હતું. જેને કારણે સમગ્ર જૂનાગઢ શહેરમાં ઠંડકનું એક મોજું પણ પ્રસરી ગયું છે. હવામાન વિભાગે પણ આગામી દિવસોમાં જૂનાગઢમાં અતિભારે વરસાદ પડવાની આગાહી વ્યક્ત કરી છે. પાછલા 24 કલાકથી જૂનાગઢની સાથે સોમનાથ જિલ્લાના વાતાવરણમાં પણ પલટો જોવા મળી રહ્યો છે. આજે જૂનાગઢના વંથલીમાં 63 એમએમ વરસાદ નોંધાયો હતો. તો બીજી તરફ સોમનાથ જિલ્લાના ગીર ગઢડામાં 30 એમએમ વરસાદ નોંધાયો છે.
ચોમાસાનો સરેરાશ વરસાદ 17 ઇંચની આસપાસ નોંધાયો છે
જૂનાગઢ જિલ્લામાં વર્તમાન ચોમાસાનો સરેરાશ વરસાદ 25 ઇંચની આસપાસ નોંધાઈ ચૂક્યા છે. તેવી જ રીતે સોમનાથ જિલ્લામાં પણ વર્તમાન ચોમાસાનો સરેરાશ વરસાદ 17 ઇંચની આસપાસ નોંધાયો છે. હજુ પણ હવામાન વિભાગ દ્વારા અતિભારે વરસાદનું એલર્ટ આપવામાં આવ્યું છે. જેને લઈને પણ આગામી દિવસોમાં જૂનાગઢ અને સોમનાથ જિલ્લામાં ભારે વરસાદ આવે તેવી શક્યતા વ્યક્ત થઈ રહી છે.
