- પોરબંદરમાં જળતાંડવથી લોકો અને પશુપાલનને ભારે એવું નુકસાન
- ગ્રામ્ય વિસ્તારમાં ઉપરવાસનું પાણી આપવાથી સ્થિતિ ગંભીર બની
- ગ્રામ્ય વિસ્તારમાં રહેતા લોકોને પશુપાલનની મોટી ચિંતા
પોરબંદર જિલ્લામાં ભારે વરસાદથી જળબંબાકારની સ્થિતિ છે. પોરબંદરમાં જળતાંડવથી લોકો અને પશુપાલનને મોટુ નુકસાન થયુ છે. ઘેડ પંથકમાં તો જ્યાં જૂઓ ત્યાં માત્ર પાણી જ પાણી છે. ખેતરો, રસ્તાઓ પર વરસાદી પાણી ફરી વળ્યા છે. આ સાથે જ અનેક જગ્યાએ વરસાદી પાણી રેલવે ટ્રેક પર પણ ફરી વળ્યા છે, જેના કારણે પાટાનું ધોવાણ થતા દિલ્હી-પોરબંદર ટ્રેનને ભાણવડ ખાતે અટકાવી દેવાની ફરજ પડી હતી.
પોરબંદર જિલ્લામાં જળતાંડવના કારણે 11 પશુઓના મોત
ત્યારે પોરબંદર જિલ્લામાં જળતાંડવના કારણે 11 પશુઓના મોત થયા છે. ગ્રામ્ય વિસ્તારમાં ઉપરવાસનું પાણી આપવાથી સ્થિતિ ગંભીર બની છે અને પોરબંદર જિલ્લાના બરડા અને ઘેડ પંથકના અનેક ગામો પાણી પાણી થયા છે. ગ્રામ્ય વિસ્તારમાં રહેતા લોકોને પશુપાલનની મોટી ચિંતા સતાવી રહી છે. ઘેડ પંથક ઉપર ફરી એક વખત આફતના મંડાણ સર્જાઈ રહ્યા છે. ભારે વરસાદને પગલે સાંબલી નદીમાં રેકોર્ડબ્રેક પાણીની આવક થઈ છે, મેંદરડા પંથકમાં 1 કલાકમાં 4 ઈંચ વરસાદ ખાબક્યો છે. ત્યારે સાંબલી નદીમાં પાણીની આવક થતાં સાંબલી ડેમના 9 દરવાજા ખોલવામાં આવ્યા છે. સાંબલી ડેમના 9 દરવાજા 4 ફૂટ સુધી ખોલવામાં આવ્યા છે. ત્યારે ફરી ઘેડ પંથકમાં તારાજી સર્જાવાની આશંકા વ્યક્ત કરવામાં આવી રહી છે.
ઉપરવાસમાં ભારે વરસાદને પગલે ડેમમાં પાણીની આવક
ઉલ્લેખનીય છે કે ભારે વરસાદને પગલે સૌરાષ્ટ્રના અનેક ડેમમાં નવા નીરની આવક થઈ છે અને ઘણા ડેમના દરવાજા ઉપરવાસમાં થયેલા ભારે વરસાદને કારણે ખોલવા પડ્યા છે અને આસપાસના ગામડાઓને એલર્ટ કરવામાં આવ્યા છે. ત્યારે ઘણા વિસ્તારમાં વરસાદી પાણી ખેતરોમાં ઘુસી જતા ખેડૂતોને મોટુ નુકસાન વેઠવાનો વારો આવ્યો છે અને અનેક ગામડામાં વરસાદી પાણી ભરાતા જનજીવન અસ્તવ્યસ્ત થઈ ગયુ છે અને લોકોને લાઈટ વગર પણ રહેવા માટે મજબૂર બનવુ પડ્યુ છે.
રાજ્યના 85 તાલુકામાં વરસાદ
આજે રાજ્યમાં સાંજે 6 વાગ્યા સુધી 85 તાલુકામાં વરસાદ વરસ્યો છે. જેમાં સૌથી વધુ ઉમરગામમાં પોણા છ ઈંચ વરસાદ ખાબક્યો છે. ત્યારે વેરાવળ-જામજોધપુરમાં પોણા ચાર ઈંચ વરસાદ, અન્ય 3 તાલુકામાં ત્રણ ઈંચ કરતા વધુ વરસાદ નોંધાયો છે. ત્યારે જામનગરમાં 3 ઈંચ જેટલો વરસાદ વરસ્યો છે. 8 તાલુકામાં બે ઈંચ કરતા વધુ વરસાદ, 17 તાલુકામાં એક ઈંચ કરતા વધુ વરસાદ અને 55 તાલુકામાં સામાન્યથી એક ઈંચ સુધીનો વરસાદ નોંધાયો છે.
