- ખાનગી વાહનની નંબર પ્લેટ સાથે કેબ સર્વિસમાં ચાલતા વાહનો સામે વિરોધ
- સફેદ નંબર પ્લેટના કોમર્શિયલ વાહનો માટે સપ્તાહમાં ચાર વખત ડ્રાઇવ થશેઃ RTO
- હડતાલના પગલે પેસેન્જરોને અગવડ નહીં પડતાં તંત્રએ રાહતનો દમ લીધો
શહેરમાં રિક્ષા-કારની સાથેસાથે હવે ટુ વ્હિલરનો પણ કેબ સર્વિસમાં યુઝ કરવાનો ટ્રેન્ડ વધી ગયો છે, પરંતુ આ સર્વિસમાં કેટલાક લોકો ખાનગી નંબર પ્લેટ લગાવીને સર્વિસ પૂરી પાડે છે. જેની સામે રિક્ષાચાલકોના એક સંગઠને હડતાળ પર ઉતરવાનો નિર્ણય લીધો હતો.
જોકે ત્વરિત લેવાયેલા આ નિર્ણયમાં અનેક સંગઠનો જોડાયા ન હતી. આમ આ હડતાળને મિશ્ર પ્રતિસાદ મળ્યો હતો. હડતાલના પગલે પેસેન્જરોને અગવડ નહીં પડતાં તંત્રએ રાહતનો દમ લીધો હતો. રિક્ષા ચાલકોની રજૂઆતના પગલે હવે સફેદ નંબર પ્લેટના કોમર્શીયલ વાહનો માટે સપ્તાહમાં ચાર વખત ડ્રાઇવ કરવાની આરટીઓએ ખાતરી આપી છે.
રિક્ષા ચાલકોની હડતાલમાં મોટાભાગના સંગઠનો જોડાયા ન હતાં, જેના કારણે હડતાલને મિશ્ર પ્રતિસાદ મળ્યો હતો. જોકે રિક્ષાચાલકોએ આરટીઓ સમક્ષ રજૂઆત કરીને ઉકેલ લાવવા માગ કરી હતી. એસોસિએશનની માગના પગલે સુભાષબ્રિજ આરટીઓ જે.જે. પટેલે સફેદ નંબર પ્લેટ ધરાવીને કોમર્શિયલ બિઝનેસ કરનાર વાહનો પર સપ્તાહમાં બેના બદલે ચાર દિવસ ડ્રાઇવ કરવાની ખાતરી આપી છે. જ્યારે ઓનલાઇન એપ્લીકેશનથી વાહન ચલાવતાં ઓપરેટરોને લઇને ચાલતાં વિવાદ અંગે RTO કચેરીએ ઓપરેટરો પાસેથી મળેલા લેખિત જવાબની કોપી આપી હતી. આરટીઓ કહ્યું કે, બંને વચ્ચેના કરાર કાયદાકીય બાબત છે. જેમાં RTO નો કોઇ રોલ નથી.
અન્ય એસોસીએશને કહ્યું કે, અમે હડતાલમાં જોડાયા ન હતાં. સરકારમાં અમારી રજૂઆતો પેન્ડિંગ છે. જેમાં વિવિધ સંગઠનો દ્વારા રાજ્યના 14 લાખ રીક્ષા ચાલકો માટે ગુજરાત ઓટોરિક્ષાચાલક કલ્યાણ બોર્ડ, ગેરકાયદે પેસેન્જર ભરીને વ્યવસાય કરતી કંપની અને વાહનો પર પ્રતિબંધ મૂકવા અને રેટ કમિટીમાં રીક્ષાના યુનિયનના અગ્રણીઓને સમાવવા સરકારમાં રજૂઆત કરી છે.
