- કોન્ટ્રાક્ટર એન્વાયરો કન્ટ્રોલને રોજના રૂ. 60. 80 લાખ 15 વર્ષ સુધી ચૂકવવાની જોગવાઈ હતી
- 240 MLDનો પ્લાન્ટ બનાવવા માટે નવેસરથી દરખાસ્ત સ્ટેન્ડિંગમાં લાવવા સૂચના
- 21 દિવસ પહેલાં ટર્શરી પ્લાન્ટ નાખવાનું કામ રોકી રાખવામાં આવ્યું હતું
AMC દ્વારા પીરાણામાં રૂ. 829 કરોડના ખર્ચે 240 MLDનો STP અને 160 MLDનો ટર્શરી પ્લાન્ટ બનાવીને તેમાંથી ટ્રીટ કરાયેલ પાણી AMC દ્વારા કિ.લિ. દીઠ રૂ. 40ના ભાવે ખરીદવા તેમજ AMC દ્વારા કોન્ટ્રાક્ટરને રોજના રૂ. 60 લાખ, 80 હજાર લેખે 15 વર્ષ સુધી ચૂકવવા માટેની વિવાદાસ્પદ દરખાસ્ત સ્ટેન્ડિંગ કમિટીમાં ફગાવી દઈને AMC કમિશનરને પરત કરી દેવામાં આવી છે. પીરાણા ખાતે 106 MLD સુએજ ટ્રીટમેન્ટ પ્લાન્ટની જગ્યાએ 240 MLD ટ્રીટમેન્ટ પ્લાન્ટ બનાવવા માટે નવેસરથી દરખાસ્ત લાવવા જણાવાયું છે. AMC કમિશનર દ્વારા નારોલ, બહેરામપુરા અને દાણીલીમડા વિસ્તારમાં આવેલી ફેક્ટરીઓને પાણી પૂરું પાડવા માટે AMCને કરોડોનું નુકસાન ભોગવવા અંગે ટર્શરી ટ્રીટમેન્ટ પ્લાન્ટની વિવાદાસ્પદ દરખાસ્ત 21 દિવસ બાદ ફરીથી સ્ટેન્ડિંગ કમિટી બેઠકમાં રજૂ કરાઈ હતી.
સ્ટેન્ડિંગ કમિટીના ચેરમેન દેવાંગ દાણીએ જણાવ્યું હતું કે, પીરાણા ખાતે આવેલા 106 MLD સુએજ ટ્રીટમેન્ટ પ્લાન્ટની જગ્યાએ 240 MLD ટ્રીટમેન્ટ પ્લાન્ટ બનાવવા તેમજ 160 MLD ટર્શરી ટ્રીટમેન્ટ પ્લાન્ટ નાખી નારોલ બહેરામપુરા દાણીલીમડા સહિતના વિસ્તારોની આવેલી ફેક્ટરીઓને પાણી પૂરું પાડવા માટેની દરખાસ્ત પરત મોકલવામાં આવી છે. માત્ર 240 MLD ટ્રીટમેન્ટ પ્લાન્ટને બનાવવા માટે નવી દરખાસ્ત લાવવા માટેની સૂચના કમિશનરને આપી છે.
21 દિવસ પહેલાં કામ રોકી રાખવામાં આવ્યું હતું
ટર્શરી પ્લાન્ટ નાખવા માટેની શરતોમાં 365 દિવસ AMC દ્વારા રોજના રૂ. 60 લાખ,80 હજાર 15 વર્ષ સુધી ચુકવણીનો ઉલ્લેખ કરાયો છે. પરંતુ રજાના દિવસનો ઉલ્લેખ કરવામાં આવ્યો નથી. જો ફેક્ટરીઓ ઘટી જાય કે બંધ થઈ જાય તો તેના માટે મ્યુનિ.નુકસાન ભોગવશે ? સહિત અન્ય બાબતોના પ્રશ્નો ઉપસ્થિત થતા હોવાના પગલે 21 દિવસ પહેલા સ્ટેન્ડિંગ કમિટીએ આ કામને રોકી રાખ્યું હતું.
કોન્ટ્રાક્ટરને 15 વર્ષમાં અંદાજે રૂ. 3,283 કરોડથી વધુ લાભ ખટાવવાનો કારસો
સ્ટેન્ડિંગ કમિટીમાં પુનઃ રજૂ થયેલી મૂળ દરખાસ્તમાં AMC દ્વારા કોન્ટ્રાક્ટર એન્વાયરો કન્ટ્રોલ પ્રા. લિ.ને રોજના રૂ. 60 લાખ 15 વર્ષ સુધી ચૂકવવાના હતા. આમ, જો આ દરખાસ્ત મંજૂર કરાઈ હોત તો AMC દ્વારા કોન્ટ્રાક્ટરને મહિને અંદાજે રૂ. 18 કરોડ, 24 લાખ, વર્ષે દહાડે અંદાજે રૂ. 218 કરોડ, 88 લાખ અને 15 વર્ષે અંદાજે રૂ. 3,283 કરોડ, 20 લાખ જેટલી માતબર રકમ ચૂકવવી પડી હોત. આમ, મ્યુનિ. તિજોરી પર જંગી રકમનો ખર્ચ બોજ પાડીને મળતિયા કોન્ટ્રાક્ટરને લાભ ખટાવવાનો કારસો રચાયો હોવાનું માનવામાં આવે છે.
કોના ઈશારે પરામર્શ વિના દરખાસ્ત રજૂ કરાઈ ?
AMC દ્વારા કોન્ટ્રાક્ટરને લાભ ખટાવવાનો કારસો રચાયો હતો ? તેમજ મ્યુનિ. સ્ટેન્ડિંગ કમિટીમાં રૂ. 829 કરોડના ખર્ચે STP અને ટર્શરી પ્લાન્ટ નાંખવા માટેની વિવાદાસ્પદ દરખાસ્ત કોના ઈશારે રજૂ કરવામાં આવી હતી ? જેવા પ્રશ્નો મ્યુનિ. વર્તુળોમાં ચર્ચાઈ રહ્યો છે. ટ્રીટ કરેલ પાણી ખરીદ, વેચાણમાં ખોટનો ધંધો AMC દ્વારા શુદ્ધ કરેલું પાણી કિ.લિ. દીઠ રૂ. 40 લેખે ખરીદીને તે પાણી ખાનગી એકમોને લિ. દીઠ રૂ. 30ના ભાવે વેચવાનો કારસો રચાયો હતો. ટ્રીટ કરાયેલ શુદ્ધ પાણીને નારોલ, દાણીલીમડા વિસ્તારમાં આવેલા હેન્ડ સ્ક્રીન-પ્રેન્ટિંગ એસોસિએશન, કર્ણાવતી ટેક્સટાઈલ એસોસિએશન અને નારોલ ટેક્સટાઈલ ઇન્ફ્રાસ્ટ્રક્ચર એન્ડ એન્વાયરો મેનેજમેન્ટ ટેક્સટાઈલ ઈન્ડસ્ટ્રીઝને જરૂર અમાણે ટ્રીટેડ પાણી આપવાનું ઠરાવવામાં આવ્યું હતું.
