- પૂર્વ રાષ્ટ્રપતિ ડોનાલ્ડ ટ્રમ્પ એક્સના માલિક એલન મસ્ક સાથે લાઇવ ઇન્ટરવ્યૂમાં બેઠા
- ટ્રમ્પ-મસ્કના ઇન્ટરવ્યૂ દરમિયાન એક્સ પર સંખ્યાબંધ સાઇબર એટેક નોંધાયા
- એલન મસ્ક સાથેની વાતચીતમાં ડોનાલ્ડ ટ્રમ્પને ઘણાં સવાલ પૂછાયા હતા
અમેરિકાના રાષ્ટ્રપતિ ડોનાલ્ડ ટ્રમ્પ સોમવારે મોડી રાત્રે સોશિયલ મીડિયા પ્લેટફોર્મ એક્સના માલિક એલન મસ્ક સાથે લાઇવ ઇન્ટરવ્યૂમાં બેઠા હતા. એક્સ પર સાઇબર હુમલાઓ વચ્ચે આ લાઇવ ઇન્ટરવ્યૂને જોનારા યૂઝર્સની ક્ષમતા ઘટાડી દેવામાં આવી હતી.
જોકે, તેના કારણે ટ્રમ્પ અને એલન મસ્કના આ ઇન્ટરવ્યૂમાં થયેલી વાતોને જાણનારા લોકોની સંખ્યામાં કમી નહોતી આવી. આ ઇન્ટરવ્યૂ અંગે સતત સોશિયલ મીડિયા પ્લેટફોર્મ પર ચર્ચાનું જોર રહ્યું હતું. એલન મસ્ક સાથેની વાતચીતમાં ડોનાલ્ડ ટ્રમ્પને ઘણાં સવાલ પૂછાયા હતા. તેમાં ટ્રમ્પની હત્યાના પ્રયાસથી માંડીને રાષ્ટ્રપતિપદના જંગમાં કમલા હેરિસની ટક્કર સુધીના સવાલો સામેલ રહ્યા હતા. ટ્રમ્પે પણ મસ્કના દરેક સવાલનો ક્યારેક સીધો તો ક્યારેક ગોળ-ગોળ જવાબ આપ્યો હતો.
હત્યાના પ્રયાસ વિશેના સવાલમાં શું કહ્યું
એલન મસ્કે જ્યારે રાષ્ટ્રપતિપદના ઉમેદવારને પેન્સિલ્વેનિયામાં તેમની પર ગત 13 જુલાઈના રોજ થયેલા જીવલેણ હુમલા વિશે સવાલ કર્યો હતો ત્યારે ટ્રમ્પે તે સમયને યાદ કર્યો હતો જ્યારે હુમલાખોરે તેમને નિશાન બનાવવાનો પ્રયાસ કર્યો હતો અને સિક્રેટ સર્વિસ દ્વારા તેને ઠાર મારવામાં આવ્યો હતો. ટ્રમ્પે કહ્યું હતું કે તે ઘટનાએ ઈશ્વર પરનો તેમનો વિશ્વાસ વધારે વધારી દીધો છે. ટ્રમ્પે વધુમાં કહ્યું હતું કે આ જોરદાર વાત હતી કે ગોળીબાર દરમિયાન હું એકદમ સાચા એંગલ પર હતો. ઉલ્લેખનીય છે કે ટ્રમ્પ પર કરાયેલા ફાયરિંગ દરમિયાન ગોળી તેમના કાનને અડીને નીકળી ગઈ હતી. નિષ્ણાતોના અનુસાર ટ્રમ્પે જો તે વખતે એકદમ યોગ્ય સમયે જ પોતાનું માથું વાળી ન લીધું હોત તો આ ગોળી સીધી તેમના માથામાં વાગત.
બાઇડેનની પીછેહટને તખતાપલટ ગણાવ્યો
એલન મસ્ક દ્વારા રાષ્ટ્રપતિ ચૂંટણી વિશે સવાલ કરાવા પર ટ્રમ્પે દાવો કર્યો હતો કે જો બાઇડેને તખતાપલટ થવાને કારણે અમેરિકન રાષ્ટ્રપતિપદની ચૂંટણીની રેસમાંથી બહાર થવું પડયું હતું. તેમણે કહ્યું હતું કે મેં ડિબેટેમાં બાઇડેનને એટલી ખરાબ રીતે હરાવ્યા હતા કે તેમણે દોડમાંથી જ બહાર કરી દેવાયા હતા. આ હજુ સુધીની સૌથી શાનદાર ડિબેટ હતી. બાઇડેનનું બહાર થવું એ એક તખતાપલટો હતો.
ટ્રમ્પે જળવાયુ પરિવર્તનની મજાક ઉડાવી
ટ્રમ્પે ઇન્ટરવ્યૂ દરમિયાન જળવાયુ પરિવર્તનની જોરદાર મજાક ઉડાવી હતી. રિપબ્લિકન પાર્ટીના રાષ્ટ્રપતિપદના ઉમેદવારે તેને નકારતા કહ્યું હતું કે ગ્લોબલ વોર્મિગ (વૈશ્વિક તાપમાનમાં વધારો) સૌથી મોટો ખતરો નથી. કારણ કે આગામી 400 વર્ષમાં તેની અસર ધરાવતા સ્થળોએ જળસ્તરમાં માત્ર એક ઇંચના આઠમા ભાગ જેટલો જ વધારો થશે. તેનાથી માત્ર મહાસાગર સામે આવેલી સંપત્તિઓ વધશે. ટ્રમ્પે કહ્યું હતું કે માનવજાતિ માટે સૌથી મોટું સંકટ ન્યુક્લિયર વોર્મિંગ છે. તેમણે કહ્યું હતું કે પાંચ દેશ પાસે હવે ખૂબ વધારે પરમાણુ શક્તિ છે અને આપણે આ સુનિશ્ચિત કરવાનું છે કે બાઇડેન જેવા બેવકૂફ લોકો સાથે કંઈ ન થાય.
પુતિન-કિમ જોંગ પર પણ બોલ્યા
ડોનાલ્ડ ટ્રમ્પે ઇન્ટરવ્યૂ દરમિયાન રશિયા, ચીન અને ઉત્તર કોરિયાની પણ પ્રશંસા કરી હતી. તેમણે કહ્યું હતું કે આ ત્રણ દેશો પોતાના કામને સારી રીતે કરી રહ્યા છે અને અમેરિકાએ તેમનો સામનો કરવા માટે એક મજબૂત રાષ્ટ્રપતિની જરૂર છે. ટ્રમ્પે કહ્યું હતું કે વ્લાદિમીર પુતિન, શી જિનપિંગ અને કિમ જોંગ-ઉન જેમને ઘણીવાર સરમુખત્યાર કહેવામાં આવે છે, તેઓ પોતાના દેશને પ્રેમ કરે છે, પરંતુ આ બીજા પ્રકારનો પ્રેમ છે. આ મુદ્દે જ વાતચીત કરતી વખતે ટ્રમ્પે બાઇડેનને સ્લીપી જો (સૂતા જો) કહ્યા હતા તેમજ જણાવ્યું હતું કે તેમના કારણે જ રશિયાએ યૂક્રેન પર હુમલો કર્યો હતો. ડોનાલ્ડ ટ્રમ્પે કહ્યું હતું કે મારા પુતિન સાથે સારા સંબંધ હતા અને તેઓ મારું સન્માન કરતા હતા. અમે યૂક્રેનની વાત કરતા હતા. યૂક્રેન તેમની આંખનો તારો હતું પરંતુ મેં તેમને કહ્યું હતું કે તેના વિશે વિચાર પણ ન કરતા.
ટ્રમ્પના ઇન્ટરવ્યૂ બાદ મસ્કે કહ્યું- કમલા હેરિસની યજમાની કરવી પણ ગમશે
ટેક મુગલ એલન મસ્કે મંગળવારે સોશિયલ મીડિયા પ્લેટફોર્મ એક્સ પર પોસ્ટ કરીને જણાવ્યું હતું કે તેઓને ડેમોક્રેટિક પાર્ટીના રાષ્ટ્રપતિપદના ઉમેદવાર કમલા હેરિસની વાતચીત માટે એક્સ સ્પેસ પર યજમાની કરવામાં ખુશી થશે. આ પહેલાં એલન મસ્કે ડોનાલ્ડ ટ્રમ્પનો ઇન્ટરવ્યૂ લીધો હતો. જેમાં ટ્રમ્પે કમલા હેરિસ પર આકરા વાકપ્રહારો કર્યા હતા. એલન મસ્કે પણ હેરિસ વિશે ટ્રમ્પના નિવેદનને સમર્થન આપતા કહ્યું હતું કે કમલા હેરિસ કટ્ટર ડાબેરી છે.
