- એક્સએ બ્રાઝિલમાં કાયદાનો એક પ્રતિનિધિ નીમવો પડશે : બ્રાઝિલની સુપ્રીમ કોર્ટ
- એલન મસ્કે સુપ્રીમ કોર્ટના જજ મોરેસને અત્યાચારી, આપખુદ અને નકલી જજ કહ્યા હતા,
- બ્રાઝિલના યૂઝર્સ થ્રેડ્સ અને બ્લૂસ્કાયનો ઉપયોગ કરવા માંડયા
બ્રાઝિલમાં સોશિયલ મીડિયા પ્લેટફોર્મ એક્સને બ્લોક કરવાથી યૂઝર્સને ઘણી મુશ્કેલીઓનો સામનો કરવો પડે છે. બ્રાઝિલના લોકો કહે છે કે, એવું લાગે છે કે જાણે દુનિયામાં શું થઈ રહ્યું છે તેના વિશે અમને ખબર જ નથી. હકીકતમાં, આ એલન મસ્ક અને બ્રાઝિલની સુપ્રીમ કોર્ટના એક જજ વચ્ચે થયેલા વિવાદનું સૌથી તાજું પ્રકરણ છે.
જજનું કહેવું હતું કે એક્સએ બ્રાઝિલમાં કાયદાનો એક પ્રતિનિધિ નીમવો પડશે. પણ એક્સના માલિક એલન મસ્કે એવું કરવાનો ઇનકાર કરી દીધો. બ્રાઝિલના લોકોને એક્સની એવેજીમાં અન્ય સોશિયલ મીડિયા પ્લેટફોર્મ પર નેવિગેટ કરવામાં મુશ્કેલી થઈ. બ્રાઝિલ એક્સ માટે સૌથી મોટાં બજારોમાંનું એક રહ્યું છે. અહીં એક્સના યૂઝર્સની સંખ્યા કરોડોમાં છે. બ્રાઝિલના ઘણા લોકોનું કહેવું છે કે એક્સ વગરના પહેલા દિવસે પોતે દુનિયાથી છૂટા પડી ગયા હોય તેવું લાગતું હતું. બ્રાઝિલના જાણીતા એન્ટરટેઇન્મેટ રાઇટર ચિકો બ્રાર્નીએ ઇન્સ્ટાગ્રામ દ્વારા વિકસાવાયેલી ટેક્સ્ટ આધારિત એપ થ્રેડ્સમાં લખ્યું, મને એવું લાગી રહ્યું છે કે મને ખબર નથી કે દુનિયામાં અત્યારે શું થઈ રહ્યું છે. વિચિત્ર વાત છે. થ્રેડ્સ અલ્ગોરિધમ એક ઓલ-યૂ-કેન-ઇટ રેસ્ટોરાં જેવું છે. અહીં વેઇટર એવી વસ્તુઓ પીરસતા રહે છે જે હું ક્યારેય ઓર્ડર નહીં કરું. આવું એક બીજું પ્લેટફોર્મ બ્લૂસ્કાય છે, એક્સના સસ્પેન્શન પછી બ્રાઝિલના મોટી સંખ્યાના લોકો તેનો ઉપયોગ કરે છે. બ્લૂસ્કાયમાં છેલ્લા ત્રણ દિવસમાં લગભગ બે લાખ નવા યૂઝર્સ જોડાયા છે.
બ્રાઝિલની સુપ્રીમ કોર્ટનો ચુકાદો
બ્રાઝિલની સુપ્રીમ કોર્ટમાં એક્સના કેસ પર 30મી ઓગસ્ટે સુનાવણી થઈ. જસ્ટિસ મોરેસે એલન મસ્કને આદેશ આપ્યો કે તેઓ 24 કલાકમાં બ્રાઝિલમાં એક્સ માટે કાયદાનો એક પ્રતિનિધિ નિયુક્ત કરે. નહીંતર, દેશમાં સોશિયલ મીડિયા સાઇટને સસ્પેન્ડ કરી દેવામાં આવશે. પરંતુ એલન મસ્ક માન્યા નહીં. આ કેસ પર જ 31 ઓગસ્ટે થયેલી સુનાવણીમાં સુપ્રીમ કોર્ટે એક્સને તાત્કાલિક અસરથી સંપૂર્ણ રીતે પ્રતિબંધિત કરવાનો આદેશ આપ્યો હતો. મોરેસે એપલ અને ગૂગલને પાંચ દિવસમાં પોતાના એપ સ્ટોર પરથી એક્સ હટાવવાના નિર્દેશ આપ્યા હતા.
યૂઝર એક્સ વાપરવાનો પ્રયાસ કરશે તો દંડને પાત્ર
મોરેસે કહ્યું કે જે કોઈ યૂઝર વીપીએન દ્વારા એક્સનો ઉપયોગ કરવાની કોશિશ કરશે તેને 50 હજાર રીસિસ (લગભગ 7.47 લાખ રૂપિયા) સુધીનો દંડ ભરવો પડશે. કોર્ટે એમ પણ કહ્યું કે આ સસ્પેન્શન ત્યાં સુધી ચાલુ રહેશે, જ્યાં સુધી નિયમ માનવામાં નહીં આવે. આ નિયમમાં 18.5 મિલિયન રીસિસ (લગભગ 27.66 કરોડ રૂપિયા)નો દંડ ભરવો અને બ્રાઝિલમાં કાયદાના એક પ્રતિનિધિની નિમણૂક કરવાનું સામેલ છે. સાથે જ, બ્રાઝિલમાં સેટેલાઇટ ઇન્ટરનેટ પ્રોવાઇડર સ્ટારલિંકનાં બેંક ખાતાં પણ ફ્રીઝ કરી દેવાયાં છે.
પ્રતિબંધ પાછળની ઘટના
બ્રાઝિલની સુપ્રીમ કોર્ટના જસ્ટિસ એલેક્ઝાંડર ડી મોરેસ અને મસ્ક વચ્ચે મહિનાઓથી સાર્વજનિક વિવાદ ચાલી રહ્યો છે. 2024ની શરૂઆતમાં જ મોરેસે એક્સનાં કેટલાંક એકાઉન્ટ્સને બ્લોક કરવાનો આદેશ આપ્યો હતો. એ એકાઉન્ટ્સ પર ખોટા સમાચારો અને નફરત ફેલાવવાનો આરોપ હતો, પરંતુ એક્સએ જજના આદેશનું પાલન ન કર્યું. એલન મસ્કના પ્લેટફોર્મે કહ્યું કે જજ તેમની એપ પર સેન્સરશિપ લગાડવાની કોશિશ કરે છે. એક્સે બ્રાઝિલમાંની પોતાની બધી ઓફિસો પણ બંધ કરી દીધી. જોકે, પ્લેટફોર્મની સેવા દેશમાંના યૂઝર્સ માટે ચાલુ રહી. એક્સે ત્યારે દાવો કર્યો હતો કે જસ્ટિસ મોરેસે જો કંપની ન માને તો બ્રાઝિલમાં કાયદાના પ્રતિનિધિઓમાંના એકની ધરપકડ કરવાની ધમકી આપી હતી. મસ્કે ત્યારે જજના ચુકાદાનો વિરોધ કરતાં તેમને અત્યાચારી અને આપખુદ કહ્યા અને સસ્પેન્ડ કરાયેલાં કેટલાંક એકાઉન્ટ્સ ફરી સક્રિય કરવાની ધમકી આપી. મસ્કે મોરેસને નકલી જજ પણ કહ્યા હતા.
બ્રાઝિલનો નિયમ
હકીકતમાં બ્રાઝિલના કાયદા અનુસાર બધી ઇન્ટરેન્ટ કંપનીઓ માટે દેશમાં કાયદાનો એક પ્રતિનિધિ રાખવો અનિવાર્ય છે. તેનાથી એવું સુનિશ્ચિત થાય છે કે કોઈ વ્યક્તિને કાયદા બાબતના નિર્ણયો જણાવી શકે, જે કંપની સાથે સંકળાયેલા નિર્ણયો લઈ શકે. તે એવી વ્યક્તિ હોય છે જે કોઈ પણ અપેક્ષિત કાર્યવાહી કરવા માટે યોગ્ય હોય.
