ભાવનગર રોડની આંગડિયા પેઢીમાં રૂ.19 લાખની લૂંટનો ગણતરીના દિવસોમાં ભેદ ઉકેલાયો
વેસ્ટ બંગાળ અને મથુરાથી બે આરોપીને ઝડપી લેતી ક્રાઇમબ્રાંચ ; ઉત્તર પ્રદેશ-રાજસ્થાનના બે સાગરીતો હજુ ફરાર; ઝડપાયેલા આરોપીઓ પાસેથી વધુ ગુનાઓની કડીઓ મળવાની શક્યતા
અગ્ર ગુજરાત, રાજકોટ
રાજકોટ શહેરના ભાવનગર રોડ પર આવેલી પ્રાઇમ એન્ટરપ્રાઇઝ નામની આંગડિયા પેઢીમાં ગત તા.30 જુલાઈના રોજ બંદૂક બતાવી રૂ.19 લાખની રોકડ ભરેલો થેલો લૂંટી ફરાર થયેલા લૂંટારુઓના ગુનાનો રાજકોટ શહેર ક્રાઇમ બ્રાન્ચે ગણતરીના દિવસોમાં ભેદ ઉકેલી નાખ્યો છે. ક્રાઇમ બ્રાન્ચે સમગ્ર રાજ્યની બહાર તપાસનો દોર લંબાવી વેસ્ટ બંગાળમાંથી રમઝાનઅલી ઉર્ફે રાજુ તથા ઉત્તર પ્રદેશના મથુરામાંથી પ્રવીણ નામના બે આરોપીઓને ઝડપી રાજકોટ લાવી કાર્યવાહી હાથ ધરી છે. જ્યારે લૂંટમાં સંડોવાયેલા અન્ય બે આરોપીઓની શોધખોળ હજુ ચાલુ છે.
પ્રાપ્ત વિગતો મુજબ, તા.30 જુલાઈના બપોરના સમયે ભાવનગર રોડ પર આવેલી પ્રાઇમ એન્ટરપ્રાઇઝ આંગડિયા પેઢીમાં બે અજાણ્યા શખ્સો ઘૂસી આવ્યા હતા. બંનેએ બંદૂક બતાવી પેઢીના હિસાબનો થેલો ઝૂંટવી લીધો હતો. થેલામાં રોકડ રૂ.19 લાખ હોવાનું જાણવા મળ્યું હતું. લૂંટ બાદ બંને શખ્સો સ્થળ પરથી ફરાર થઈ ગયા હતા. આ અંગે આંગડિયા પેઢીમાં નોકરી કરતા અલ્કેશભાઈ ગીરીશભાઈ દવેએ બી-ડિવિઝન પોલીસ સ્ટેશનમાં ફરિયાદ નોંધાવતા પોલીસે લૂંટનો ગુનો દાખલ કર્યો હતો.
પોલીસે ભારતીય ન્યાય સંહિતા-2023ની કલમ 309(4), 311, 3(5), આર્મ્સ એક્ટની કલમ 25(1-બી) તેમજ જી.પી. એક્ટની કલમ 135 હેઠળ ગુનો નોંધ્યો હતો. દિવસ દરમિયાન ધોળા દિવસે આંગડિયા પેઢીમાં બંદૂકની અણીએ લાખોની લૂંટ થતા પોલીસ તંત્રમાં પણ ચકચાર મચી હતી.
લૂંટનો બનાવ ગંભીર હોવાને પગલે રાજકોટ શહેર પોલીસ કમિશનર બ્રજેશકુમાર ઝા, અધિક પોલીસ કમિશનર ચૈતન્ય મંડલીક, નાયબ પોલીસ કમિશનર (ક્રાઇમ) જગદીશ બાંગરવા તથા મદદનીશ પોલીસ કમિશનર (ક્રાઇમ) ભરત બી. બસીયાએ ગુનાનો તાત્કાલિક ભેદ ઉકેલી આરોપીઓને ઝડપી લેવા સૂચના આપી હતી. આ સૂચનાના પગલે ક્રાઇમ બ્રાન્ચના પોલીસ ઇન્સ્પેક્ટર એ.એસ. ચાવડા, એમ.એલ. ડામોર અને સી.એચ. જાદવના માર્ગદર્શન હેઠળ તપાસ હાથ ધરવામાં આવી હતી. ડી.સી.બી. પોલીસ સ્ટેશનના પીએસઆઈ એ.એન. પરમાર સહિતની ટીમો તેમજ ડી.પી. ઝાલા, વી.ડી. ડોડીયા, એસ.એમ. રાણા અને વી.ડી. રાવલીયાની ટીમોએ અલગ-અલગ દિશામાં તપાસ શરૂ કરી હતી. પોલીસે ઘટનાસ્થળેથી મળેલી વિગતો ઉપરાંત ટેકનિકલ સર્વેલન્સ અને હ્યુમન સોર્સની મદદથી આરોપીઓ સુધી પહોંચવા કવાયત હાથ ધરી હતી. તપાસ દરમિયાન લૂંટના તાર ગુજરાત બહાર સુધી પહોંચતા પોલીસની ટીમોએ વેસ્ટ બંગાળ અને ઉત્તર પ્રદેશ સુધી તપાસ લંબાવી હતી.
તપાસ દરમિયાન મળેલી ચોક્કસ માહિતીના આધારે પોલીસે આરોપી રમઝાનઅલી ઉર્ફે રાજુ રાહુલ કુરબાનઅલી શેખ, ઉંમર 32 વર્ષ, રહે. નાગદા ચરાપોલે મસ્જિદપરા ગલી, કંપા, જિલ્લા નોર્થ 24 પરગણા, વેસ્ટ બંગાળને વેસ્ટ બંગાળમાંથી ઝડપી લીધો હતો.
બીજા આરોપી પ્રવીણ ખજીઓ, ઉંમર 28 વર્ષ, રહે. ઇન્દિરા વિકાસ કોલોની, નવાદા, મથુરા, ઉત્તર પ્રદેશને મથુરાથી ઝડપી રાજકોટ લાવવામાં આવ્યો હતો. બંને આરોપીઓની ધરપકડ સાથે રૂ.19 લાખની લૂંટનો અનડીટેક્ટ ગુનો ગણતરીના દિવસોમાં ડિટેક્ટ કરવામાં આવ્યો છે.
આ લૂંટમાં સંડોવાયેલા અન્ય બે આરોપીઓ હજુ પોલીસ પકડથી દૂર છે. પોલીસને આરોપી આસુ ઉર્ફે આસ મોહંમદ અયુબ, રહે. ભાર્ગવ ગલી, ચોકબજાર, કોતવાલી, ઉત્તર પ્રદેશ તથા અરુણ ઉર્ફે ઇલુ ખટીક બીશનસિંગ જગનસિંગ ખટીક, રહે. ભરતપુર, રાજસ્થાન, હાલ વૃંદાવનની શોધખોળ હાથ ધરી છે.
ખાસ બાબત એ છે કે ફરાર આરોપી આસુ ઉર્ફે આસ વિરુદ્ધ ઉત્તર પ્રદેશ અને મથુરા સહિતના વિવિધ પોલીસ સ્ટેશનોમાં લૂંટ, ધાડ, હત્યાના પ્રયાસ, ગેંગસ્ટર એક્ટ અને આર્મ્સ એક્ટ સહિતના અનેક ગંભીર ગુનાઓ નોંધાયેલા હોવાનું પોલીસ તપાસમાં સામે આવ્યું છે. તેની સામે મથુરા જીઆરપી, કિશનપુરા/ગંજ, નરહોલી, અચ્છનેરા, સિકંદરા, ગોવિંદનગર અને કોતવાલી પોલીસ સ્ટેશનોમાં વિવિધ ગુનાઓ નોંધાયેલા છે.
પોલીસના જણાવ્યા મુજબ ઝડપાયેલા આરોપી પ્રવીણ ખજીઓનો પણ ગુનાહિત ભૂતકાળ છે. રાજસ્થાનના દીદ પોલીસ સ્ટેશનમાં તેની સામે વર્ષ 2021માં આર્મ્સ એક્ટની કલમ 3/25 તેમજ આઈપીસીની કલમ 392 હેઠળ ગુના નોંધાયેલા હોવાનું બહાર આવ્યું છે. આથી પોલીસ હવે આરોપીઓએ રાજકોટની લૂંટ ઉપરાંત અન્ય કોઈ ગુનાને અંજામ આપ્યો છે કે કેમ, લૂંટનો માસ્ટરમાઇન્ડ કોણ છે અને લૂંટની રોકડ ક્યાં સગેવગે કરવામાં આવી છે તે સહિતની બાબતો અંગે વધુ તપાસ કરી રહી છે.
આ સમગ્ર કાર્યવાહી ક્રાઇમ બ્રાન્ચના અધિકારીઓ તથા સ્ટાફના માણસોમાં એ.એસ.આઈ. દિગ્પાલસિંહ જુવાનસિંહ, અમીતકુમાર પુરણદાસ, યશવંતભાઇ દિલુભાઇ, હિતેન્દ્રસિંહ પરબતસિંહ, સમીરભાઇ ઇકબાલભાઇ, અશોકકુમાર ભંવરલાલ, રણજીતસિંહ ગણેશભાઇ, સંજયભાઇ રામજીભાઇ, વિજયરાજસિંહ રણજીતસિંહ, ભાવેશકુમાર ગોવીંદસિંહ તથા પો.હેડકોન્સ. સુભાષભાઇ સોંડાભાઇ, સંજયકુમાર બાબુભાઇ, પ્રદિપસિંહ ગુલાબસિંહ, રાજેશભાઇ દ્વારા સંયુક્ત રીતે કરવામાં આવી હતી. પોલીસની ઝડપી કાર્યવાહીથી રાજકોટમાં બનેલી રૂ.19 લાખની આંગડિયા લૂંટનો ભેદ ગણતરીના દિવસોમાં ઉકેલાતા પોલીસ તંત્રને મોટી સફળતા મળી છે.
