ICC ચેમ્પિયન્સ ટ્રોફી 2025 19 ફેબ્રુઆરીથી શરૂ થવા જઈ રહી છે. આ વખતે ચેમ્પિયન્સ ટ્રોફીનું આયોજન પાકિસ્તાનના હાથમાં છે. ટુર્નામેન્ટની પહેલી મેચ યજમાન પાકિસ્તાન અને ન્યુઝીલેન્ડ વચ્ચે રમાશે. હવે આ ટુર્નામેન્ટની ઓપનિંગ સેરેમનીનું સંપૂર્ણ શેડ્યુલ પણ જાહેર કરવામાં આવ્યું છે. પાકિસ્તાનના પીએમ શાહબાઝ શરીફ ઓપનિંગ સેરેમનીમાં હાજરી આપશે.
3 અલગ અલગ દિવસે યોજાશે ઓપનિંગ સેરેમની
પાકિસ્તાન ક્રિકેટ બોર્ડ (PCB) એ ચેમ્પિયન્સ ટ્રોફીની ઓપનિંગ સેરેમનીના સંપૂર્ણ કાર્યક્રમને અંતિમ સ્વરૂપ આપી દીધું છે. આ ઓપનિંગ સેરેમની 7 ફેબ્રુઆરીએ ગદ્દાફી સ્ટેડિયમ ખાતે યોજાશે, જેમાં પાકિસ્તાનના પીએમ શાહબાઝ શરીફ મુખ્ય મહેમાન હશે.
આ પછી ઓપનિંગ સેરેમની 11 ફેબ્રુઆરીએ કરાચીના નેશનલ સ્ટેડિયમ ખાતે યોજાશે, જેમાં રાષ્ટ્રપતિ આસિફ ઝરદારી ભાગ લેશે. ઓપનિંગ સેરેમની 16 ફેબ્રુઆરીએ લાહોરમાં યોજાશે, જેમાં ભૂતપૂર્વ ક્રિકેટરો અને ICC અધિકારીઓ ભાગ લેશે. પીસીબીના ચેરમેન મોહસીન નકવીએ ઓપનિંગ સેરેમની અંગે પીએમ શાહબાઝ શરીફને પણ મળ્યા છે.
પાકિસ્તાનમાં તૈયાર નથી સ્ટેડિયમ
ચેમ્પિયન્સ ટ્રોફી શરૂ થવામાં 3 અઠવાડિયાથી પણ ઓછો સમય બાકી છે, પરંતુ પાકિસ્તાનમાં સ્ટેડિયમ હજુ સુધી સંપૂર્ણ રીતે બન્યા નથી. જે પછી મોટો સવાલ એ રહે છે કે શું આ ટુર્નામેન્ટ પાકિસ્તાનમાં યોજાઈ શકશે. મીડિયાના એક રિપોર્ટ મુજબ એવો દાવો કરવામાં આવ્યો છે કે PCB માટે સમયસર કામ પૂર્ણ કરવું અશક્ય છે.
રોહિત શર્માની ઓપનિંગ સેરેમનીમાં જવાની નથી થઈ પુષ્ટિ
ટુર્નામેન્ટ શરૂ થાય તે પહેલાં તમામ ટીમના કેપ્ટન ફોટોશૂટ અને પ્રેસ કોન્ફરન્સ કરે છે, જે યજમાન ટીમના દેશમાં યોજાય છે. પરંતુ ટીમ ઈન્ડિયાના કેપ્ટન રોહિત શર્મા પાકિસ્તાન જશે કે નહીં તે નિશ્ચિત માનવામાં આવતું નથી. બીસીસીઆઈ તરફથી પણ રોહિતના જવા અંગે હજુ સુધી કંઈ સ્પષ્ટ કરવામાં આવ્યું નથી.a
