ચેમ્પિયન્સ ટ્રોફીમાં ભારતે પાકિસ્તાનને 6 વિકેટે હરાવ્યું છે. ટીમ ઈન્ડિયાએ સેમિફાઈનલમાં પોતાનું સ્થાન લગભગ નિશ્ચિત કરી લીધું છે. જ્યારે પાકિસ્તાન સતત બીજી મેચ હારીને ટુર્નામેન્ટમાંથી લગભગ બહાર થઈ ગયું છે.
ભારતની જીતમાં સૌથી મોટો ફાળો વિરાટ કોહલીનો હતો, જેને અણનમ 100 રનની સદીની ઈનિંગ રમી. આ પહેલા ભારત તરફથી કુલદીપ યાદવે 3 વિકેટ લીધી.
પાકિસ્તાન સામે 6 વિકેટથી ભારતની જીત
ભારતે 2017 ચેમ્પિયન્સ ટ્રોફીની ફાઈનલમાં પાકિસ્તાન સામેની હારનો બદલો લઈ લીધો છે. દુબઈ ઈન્ટરનેશનલ ક્રિકેટ સ્ટેડિયમમાં રમાયેલી આ મેચમાં પાકિસ્તાને પ્રથમ બેટિંગ કરતા 241 રન બનાવ્યા હતા. 242 રનના લક્ષ્યાંકનો પીછો કરતી ભારતીય ટીમે 45 બોલ બાકી રહેતા આ લક્ષ્યાંક હાંસલ કરી લીધો. વિરાટે માત્ર ચોગ્ગો ફટકારીને પોતાની સદી પૂર્ણ કરી નહીં પરંતુ ભારતનો 6 વિકેટથી વિજય પણ સુનિશ્ચિત કર્યો.
વિરાટ કોહલીની 82મી સદી
વિરાટ કોહલીએ વનડે ક્રિકેટમાં પોતાની 51મી સદી ફટકારી છે. વનડે મેચોમાં સૌથી વધુ સદી ફટકારવાના મામલે વિરાટ પહેલાથી જ આગળ છે. આંતરરાષ્ટ્રીય ક્રિકેટમાં આ તેની 82મી સદી છે. પાકિસ્તાન સામેની મેચમાં વિરાટે 111 બોલમાં 100 રનની અણનમ ઈનિંગ રમી. વિરાટે કેટલી ધીરજથી રમ્યો તેનો અંદાજ એ વાત પરથી લગાવી શકાય છે કે તેને પોતાની ઈનિંગ્સમાં ફક્ત 7 ચોગ્ગા ફટકાર્યા હતા. આ મેચમાં વિરાટે પોતાના વનડે કરિયરમાં 14,000 રન પણ પૂરા કર્યા. કોહલી પાકિસ્તાન સામે ODI વર્લ્ડકપ અને ચેમ્પિયન્સ ટ્રોફી બંનેમાં સદી ફટકારનાર પ્રથમ ભારતીય ખેલાડી પણ બન્યો.
ચેમ્પિયન્સ ટ્રોફીમાં ભારત અને પાકિસ્તાનનો રેકોર્ડ બરાબર
ચેમ્પિયન્સ ટ્રોફીમાં ભારત અને પાકિસ્તાન વચ્ચે આ છઠ્ઠો મુકાબલો હતો. આ પહેલા બંને ટીમો કુલ પાંચ વખત આમને-સામને થઈ હતી, જેમાંથી પાકિસ્તાન 3 વખત અને ટીમ ઈન્ડિયા ફક્ત 2 વખત જ જીતી શકી હતી. હવે ચેમ્પિયન્સ ટ્રોફીની હરીફાઈમાં, ભારત અને પાકિસ્તાન 3-3 થી બરાબર છે.
કુલદીપ યાદવે લીધી 3 વિકેટ
ભારત તરફથી કુલદીપ યાદવે સૌથી વધુ 3 વિકેટ લીધી. તેમના સિવાય હાર્દિક પંડ્યાએ 2 વિકેટ લીધી, જેમાં બાબર આઝમની વિકેટનો પણ સમાવેશ થાય છે.
