યુક્રેનના રાષ્ટ્રપતિ વોલોડીમિર ઝેલેન્સકી શુક્રવારે વ્હાઇટ હાઉસની મુલાકાત લેશે. યુએસ પ્રમુખ ડોનાલ્ડ ટ્રમ્પે જણાવ્યું હતું કે રશિયાના આક્રમણ સામે રક્ષણ આપવા માટે યુએસની સૈન્ય સહાય માટે ચૂકવણી કરવા દુર્લભ ખનિજો પરના સોદા પર હસ્તાક્ષર કરવા વોલોડીમીર ઝેલેન્સકી શુક્રવારે વ્હાઇટ હાઉસની મુલાકાત લેશે. અત્રે ઉલ્લેખનીય છે કે ટ્રમ્પ દ્વારા સહાયના નાણાં પરત કરવા અથવા ખનિજોની ડીલ નક્કી કરવાના વિકલ્પ પર ઝેલેન્સકી પર દબાણ કરાઇ રહ્યું હતું.
યુક્રેનના રાષ્ટ્રપતિ ઝેલેન્સકી અમેરિકાની મુલાકાત લેશે
યુક્રેનના રાષ્ટ્રપતિ ઝેલેન્સકી શુક્રવારે વ્હાઇટ હાઉસની મુલાકાત લેશે. આ જાહેરાત યુએસ અને યુક્રેન વચ્ચેના લાંબાગાળાના દિવસોની તંગ વાટાઘાટો પછી આવી છે, જેમાં ઝેલેન્સકીએ આરોપ લગાવ્યો હતો કે યુએસ તેના પર $500 બિલિયનથી વધુના સોદા પર હસ્તાક્ષર કરવા માટે દબાણ કરી રહ્યું છે, જેને ચૂકવવા માટે યુક્રેનની “10 પેઢીઓ”ની જરૂર પડશે. ટ્રમ્પે ઓવલ ઓફિસમાં પત્રકારોને કહ્યું, “મેં સાંભળ્યું કે તેઓ શુક્રવારે આવી રહ્યા છે. અલબત્ત જો તે ઈચ્છે તો મને કોઈ વાંધો નથી અને તે મારી સાથે સાઈન કરવા ઈચ્છે છે અને મને લાગે છે કે તે બહુ મોટી વાત છે.
આ ડીલથી યુક્રેનને શું મળશે?
યુક્રેન માટે આા ડીલ વોશિંગ્ટન દ્વારા પ્રસ્તાવિત મૂળ ડીલ કરતાં વધુ અનુકૂળ હતું, પરંતુ લાંબા ગાળાની સુરક્ષા બાંયધરીનો સંદર્ભ શામેલ ન હતો જે કિવ સોદામાં મેળવવા માંગે છે. સોદાની કેટલીક વિગતો અસ્પષ્ટ રહી હતી, જેમાં નવા ફંડમાં યુએસની માલિકીનો હિસ્સો સામેલ છે. આ સોદામાં યુક્રેનને શું મળશે તે અંગે પૂછવામાં આવતા ટ્રમ્પે કહ્યું હતું કે, $350 બિલિયન, લશ્કરી સાધનો અને લડવાનો અધિકાર. ઉપરાંત ટ્રમ્પે કહ્યું કે, અમે ખનિજો અને અન્ય વસ્તુઓ પરના અમારા સોદા અંગે વાત કરી છે.આ સાથે યુક્રેન માટે સામાન્ય સુરક્ષાનો અન્ય વિકલ્પ શોધીશું. મને નથી લાગતું કે આ ડીલને લીધે કોઈ સમસ્યા હશે. મેં આ વિશે રશિયા સાથે વાત કરી હતી અને તેને આમાં કોઈ સમસ્યા દેખાઈ ન હતી. તેથી મને એવું લાગે છે કે તેઓ પીછેહઠ કરશે નહીં.
ટ્રમ્પે આ વાત ઝેલેન્સકી વિશે કહી હતી
પ્રાકૃતિક સંસાધનોના નિષ્કર્ષણમાંથી મેળવેલી આવક સાથે ફંડમાં 100% નાણાકીય રસનો સમાવેશ કરતી પ્રારંભિક યુએસ દરખાસ્તે યુક્રેન અને યુરોપના અન્ય સહયોગીઓમાં આક્રોશ ફેલાવ્યો હતો. ઝેલેન્સકીએ પ્રારંભિક દરખાસ્ત વિશે જણાવ્યું હતું કે, “હું એવું કંઈ કરી રહ્યો નથી કે જે માટે યુક્રેનિયનોની 10 પેઢીઓને ચૂકવણી કરવી પડશે.” વાટાઘાટોની સાથે જાહેરમાં શબ્દોનું યુદ્ધ હતું જેમાં ટ્રમ્પે ઝેલેન્સકીને “ચૂંટણી વિના સરમુખત્યાર” ગણાવ્યા હતા.
અમેરિકા કેમ આ ડીલ પર ભાર મૂકી રહ્યું છે?
યુક્રેનમાં યુએસ જે સંસાધનોની શોધ કરી રહ્યું છે તેમાં બેટરી, ટાઇટેનિયમ ઉત્પાદન અને દુર્લભ ધાતુઓનો સમાવેશ થાય છે જેનો ઉપયોગ ઇલેક્ટ્રોનિક્સ, વિન્ડ ટર્બાઇન, શસ્ત્રો અને અન્ય આધુનિક ઉત્પાદનોમાં થાય છે. જેના માટે ટ્રમ્પના સામ, દામ, દંડ, ભેદની નીતિ અપનાવી આ ડીલ કોઈ પણ રીતે કરવા માંગે છે. ત્યારે યુક્રેનના અધિકારીઓએ આ ડીલ અંગે કહ્યું હતું કે આ સોદો પૂર્ણ થવાને આરે છે.
