છેલ્લા કેટલાક વર્ષોમાં શ્રીલંકાના ક્રિકેટરોને અલગ અલગ હરકતોના કારણે ઘણા પ્રકારની કાયદેસરની કાર્યવાહીનો સામનો કરવો પડ્યો છે. તેના કારણે કેટલાક ખેલાડીઓ જેલમાં પણ જઈ આવ્યા છે. હવે આ યાદીમાં શ્રીલંકાના એક યુવા ખેલાડીનું નામ ઉમેરાયું છે. આ ખેલાડી 26 વર્ષનો એશેન બંદારા છે, જેને શ્રીલંકન પોલીસે તેના પાડોશી પર હુમલો કરવાના આરોપસર ધરપકડ કરી લીધી છે. અહેવાલો અનુસાર શ્રીલંકન ટીમમાંથી બહાર રહેલા બંદારાએ પાર્કિંગના વિવાદને કારણે તેના પાડોશીને માર માર્યો હતો, ત્યારબાદ પોલીસે તેની ધરપકડ કરી હતી.
પોલીસે રાત્રે ક્રિકેટરની કરી ધરપકડ
રિપોર્ટ મુજબ શ્રીલંકન પોલીસે 8 માર્ચ, શનિવારે રાત્રે આ ક્રિકેટરની ધરપકડ કરી છે. પોલીસે જણાવ્યું કે શનિવારે સાંજે પોલીસને પિલિયાંડલાના કોલામન્ના વિસ્તારમાં ઝઘડો અને હુમલો થયો હોવાની જાણકારી મળી હતી. પોલીસે જણાવ્યું હતું કે તેમને એક પાડોશી તરફથી ફરિયાદ મળી હતી કે બંદારા કોઈના ઘરમાં ઘૂસી ગયો હતો અને તેમને ખલેલ પહોંચાડી રહ્યો હતો. આ મુજબ, બંદારાનો તેના પાડોશી સાથે ઉગ્ર દલીલ થઈ હતી જે ટૂંક સમયમાં ઝઘડામાં ફેરવાઈ ગઈ. આ સમય દરમિયાન બંદારાએ પાડોશી પર હુમલો કર્યો.
જ્યારે પોલીસને આ અંગે ફરિયાદ મળી, ત્યારે તેમણે તે જ રાત્રે શ્રીલંકન ક્રિકેટરની ધરપકડ કરી. જોકે તેમને તાત્કાલિક જામીન મળી ગયા, પરંતુ બંદારાને 12 માર્ચે કોર્ટમાં હાજર રહેવાનો આદેશ આપવામાં આવ્યો છે. યોગાનુયોગ, બંદારાએ ઘરેલુ ક્રિકેટમાં શ્રીલંકા પોલીસનું પ્રતિનિધિત્વ પણ કર્યું છે અને ટીમને ટુર્નામેન્ટ જીતવામાં ફાળો આપ્યો છે. હવે એ જ પોલીસે તેની ધરપકડ પણ કરી છે.
ક્રિકેટ બોર્ડે શું કહ્યું?
બંદારાએ 2021માં શ્રીલંકા માટે ODI અને T20 ફોર્મેટમાં ડેબ્યૂ કર્યું હતું અને આ સમયગાળા દરમિયાન તેણે બંને ફોર્મેટમાં 6-6 મેચ રમી હતી. તેણે ODIમાં 141 રન અને T20માં 97 રન બનાવ્યા છે. જોકે, તે 2023થી ટીમની બહાર છે. રિપોર્ટમાં શ્રીલંકા ક્રિકેટના સીઈઓને ટાંકીને કહેવામાં આવ્યું છે કે આ ખેલાડીઓ બોર્ડ સાથે કરારબદ્ધ નથી. જોકે, સીઈઓ એશ્લે ડી સિલ્વાએ ચોક્કસપણે કહ્યું છે કે જો તપાસમાં જાણવા મળશે કે બંદારાએ રમત અને બોર્ડને શરમજનક સ્થિતિમાં મૂક્યા છે તો તેમની સામે કાર્યવાહી કરવામાં આવશે.
