ભારતના સ્ટાર બોલરમાં આજે જેની ગણના થાય છે તે સ્ટાર ક્રિકેટર મોહમ્મદ સિરાજ માટે આજનો દિવસ વધુ મહત્વનો છે. મોહમ્મદ સિરાજ આજે એટલે કે 13 માર્ચના રોજ પોતાના 27મા જન્મદિવસ (Happy Birth Day)ની ઉજવણી કરી રહ્યો છે. હૈદરાબાદમાં જન્મેલ મોહમ્દ સિરાજે કઠિન સંઘર્ષ કરી આજે ભારતના સ્ટાર ક્રિકેટર તરીકે સફળતા પ્રાપ્ત કરી છે.
બાળપણ ગરીબીમાં પસાર થયું
ભારતના સ્ટાર બોલર મોહમ્દ સિરાજના પરિવારની આર્થિક સ્થિતિ સારી નહોતી. સિરાજનું બાળપણ ગરીબીમાં પસાર થયું.પિતા ઓટોરીક્ષા ચલાવી પરીવારનું ગુજરાન કરતા હતા. એટલે ક્રિકેટર બનવા સિરાજે કોઈ એકેડમીમાં તાલીમ લીધી નહોતી. સિરાજ બાળપણમાં શેરીમાં મિત્રો સાથે ક્રિકેટ રમતો હતો અને આ શેરી ક્રિકેટ જ સિરાજ માટે એકેડમી બની. સાતમા ધોરણમાં ક્રિકેટ રમવાની શરૂઆત કરી હતી. અને 2015માં પ્રથમ વખત બોલ પકડયો અને બેટસમેનોને બોલ્ડ કરવાના તેના અંદાજે વધુ લોકપ્રિયતા અપાવી.
ટૂંકાગાળામાં પોતાનું સ્થાન મજબૂત કર્યું
મોહમ્મદ સિરાજે બહુ ટૂંકાગાળામાં ભારતીય ક્રિકેટમાં પોતાનું સ્થાન મજબૂત કર્યું છે. કોઈપણ એકેડમીમાં બોલિંગની તાલીમ વગર પણ સિરાજે ભારતીય ટીમમાં પ્રવેશ મેળવ્યો. સિરાજે 2017માં ટી20માં ડેબ્યુ કર્યું અને તેમાં શાનદાર પ્રદર્શન કરતાં ભારતીય ટીમમાં સ્થાન મેળવ્યું. ટી20એ સિરાજને નવી ઓળખ આપી. ટી-20માં હૈદરાબાદ તરફથી રમતા 9 મેચમાં 41 વિકેટ લઈને સૌથી વધુ વિકેટ લેનાર બોલર બન્યો હતો. ટી-20 બાદથી સિરાજે ઝડપી બોલર તરીકે ભારતીય ક્રિકેટમાં પોતાની કારર્કિદીના અધ્યાયનો આરંભ કર્યો. ટી-20માં શાનદાર પ્રદર્શન કરનાર સિરાજે તમામ દિગ્ગજોનું ધ્યાન ખેંચ્યું. અને IPLમાં સનરાઇઝર્સ હૈદરાબાદ ફ્રેન્ચાઈઝીએ તેને 2.6 કરોડમાં ખરીદ્યો. આઈપીએલમાં સિરાજે 6 મેચમાં 10 વિકેટ લીધી. અને ત્યારબાદની IPL સિઝનમાં સિરાજને વિરાટની આગેવાની હેઠળની રોયલ ચેલેન્જર્સે મોટી બોલી લગાવી ખરીદી કરી હતી. ત્યારપછીથી અત્યાર સુધી IPL ફોર્મેટમાં રોયલ ચેલેન્જર્સ સાથે સંકળાયેલો છે. ટી-20 અને આઈપીએલ બાદ 2017માં જ આંતરરાષ્ટ્રીય ક્રિકેટમાં ન્યૂઝીલેન્ડ સામે રમ્યો.
મોહમ્દ સિરાજ મજબૂત મનોબળ
તાજેતરમાં થયેલા ઓસ્ટ્રેલિયાના પ્રવાસે મોહમ્દ સિરાજના મજબૂત મનોબળની સાથે પોતાના જવાબદારી નિભાવનાર શ્રેષ્ઠ ક્રિકેટર હોવાનું સાબિત કર્યું. ઓસ્ટ્રેલિયા પ્રવાસ દરમિયાન સિરાજના પિતાનું અવસાન થયું હોવા છતાં તેણે નિર્ણય લીધો કે તે દેશમાં પાછો નહીં આવે અને ટીમમાં પોતાને મળેલ બોલરની જવાબદારી યોગ્ય રીતે પૂર્ણ કરશે. પોતાની પ્રથમ મેચમાં 500 રૂપિયા મેળવનાર સિરાજ આજે કરોડોની કમાણી કરી રહ્યો છે. એક ઇન્ટરવ્યુમાં સિરાજે કહ્યું હતું કે તેના મોટાભાઈના પ્રોત્સાહનના કારણે જ આજે તે ક્રિકેટ રમી રહ્યો છે. સ્ટાર ક્રિકેટર બન્યા બાદ સિરાજનું નામ અભિનેત્રી અને મોડેલ માહિરા સાથે સંકળાયું. મીડિયા સમાચારોમાં માહિરા અને સિરાજ ડેટ કરતા હોવાની અફવા ઉડી હતી. ક્રિકેટર અથવા મોડલ માહિરા તરફથી આ અફવાઓનું ખંડન ના કરાતા આગામી સમયમાં તેમના સંબંધોને નામ મળે તેવી શકયતા છે.
