IPL 2025 ની મેગા ઓક્શનમાં સનરાઈઝર્સ હૈદરાબાદ દ્વારા માત્ર 30 લાખમાં ખરીદાયેલો આ યુવા ખેલાડી આ સિઝનમાં ટીમ માટે વરદાન સાબિત થઈ રહ્યો છે. લખનૌ સામે 13 બોલમાં 36 રનની ઈનિંગ્સ રમીને ધૂમ મચાવનાર આ બેટ્સમેને દિલ્હી કેપિટલ્સના બોલરોને પણ હેરાન કર્યા.
23 વર્ષીય બેટ્સમેને 41 બોલની પોતાની ઈનિંગમાં 5 ચોગ્ગા અને 6 છગ્ગા ફટકાર્યા. આ બેટ્સમેને 37 રનના સ્કોર પર 4 વિકેટ ગુમાવ્યા બાદ મુશ્કેલીમાં મુકાયેલી હૈદરાબાદની ઈનિંગને બચાવી જ નહીં, પણ તેને સન્માનજનક સ્કોરના ઉંબરે પણ પહોંચાડી દીધી. વિશાખાપટ્ટનમમાં પોતાની વિસ્ફોટક બેટિંગથી સૌનું ધ્યાન ખેંચનાર આ યુવા બેટ્સમેન અનિકેત વર્મા છે.
23 વર્ષના બેટ્સમેને મચાવી ધૂમ
ટોસ જીત્યા બાદ સનરાઈઝર્સ હૈદરાબાદે પહેલા બેટિંગ કરવાનો નિર્ણય લીધો, પરંતુ આ નિર્ણય ટીમની વિરુદ્ધ ગયો. અભિષેક શર્મા માત્ર 1 રન બનાવીને રન આઉટ થયો હતો, જ્યારે ઈશાન કિશન અને નીતિશ રેડ્ડી મિચેલ સ્ટાર્ક દ્વારા સસ્તામાં આઉટ થયા હતા. ટ્રેવિસ હેડ પણ 12 બોલમાં 22 રન બનાવીને આઉટ થયો. 37 રનના સ્કોર પર 4 વિકેટ ગુમાવ્યા બાદ હૈદરાબાદ મુશ્કેલીમાં મુકાઈ ગયું હતું, પરંતુ અનિકેત વર્માએ હેનરિક ક્લાસેન સાથે મળીને ઈનિંગને ખૂબ સારી રીતે સંભાળી હતી. બંનેએ પાંચમી વિકેટ માટે 67 રન ઉમેર્યા અને ટીમનો સ્કોર 100 થી વધુ લઈ ગયા.
ક્લાસેન 32 રને આઉટ થયા બાદ, અનિકેતે જવાબદારી સંભાળી અને દિલ્હીના બોલરોને કઠિન સમય આપ્યો. વિસ્ફોટક સ્ટાઈલમાં બેટિંગ કરતા, અનિકેતે 41 બોલમાં 74 રનની ધમાકેદાર ઈનિંગ્સ રમી અને આ લીગમાં તેની પહેલી અડધી સદી પણ ફટકારી. પોતાની ઈનિંગ દરમિયાન, 23 વર્ષીય યુવા બેટ્સમેને 5 ચોગ્ગા અને 6 છગ્ગા ફટકાર્યા. અનિકેતની ઈનિંગને કારણે, હૈદરાબાદ કુલ 163 રન સુધી પહોંચવામાં સફળ રહ્યું.
લખનૌ સામે પણ મચાવી ધૂમ
લખનૌ સુપર જાયન્ટ્સ સામે અનિકેત વર્માનું બેટ પણ જોરથી બોલ્યું. અનિકેતે માત્ર 13 બોલનો સામનો કરીને 36 રનની ઝડપી ઈનિંગ રમી. 276 ના સ્ટ્રાઈક રેટથી રમતા, આ યુવા બેટ્સમેને એક પછી એક પાંચ શક્તિશાળી છગ્ગા ફટકાર્યા. અનિકેતને મેગા ઓક્શનમાં સનરાઈઝર્સ હૈદરાબાદે 30 લાખ રૂપિયામાં ખરીદ્યો હતો.
