કોંગો નદીમાં મુસાફરોથી ભરેલી બોટમાં આગની ઘટના બની છે. આ ઘટનાએ સમગ્ર વિશ્વને હચમચાવી દીધું છે. આ દુર્ઘટનામાં અત્યાર સુધીમાં 148 લોકોના મોત થયા હોવાની પુષ્ટિ કરવામાં આવી છે, જ્યારે કેટલાક મુસાફરો હજુ પણ ગુમ છે. તમને જણાવી દઈએ કે કોંગો નદી આફ્રિકન ખંડની બીજી સૌથી લાંબી નદી છે. આ નદી મધ્ય આફ્રિકામાંથી વહે છે અને તેનો મોટાભાગનો ભાગ ડેમોક્રેટિક રિપબ્લિક ઓફ કોંગોમાં આવેલો છે.
લોકો પોતાનો જીવ બચાવવા માટે નદીમાં કૂદી પડ્યા
ઉલ્લેખનીય છે કે મંગળવારે લાકડાની મોટરબોટ HB કોંગોલોમાં અચાનક આગ લાગી અને આગ લાગ્યાની થોડીવારમાં જ બોટ પાણીમાં પલટી ગઈ હતી. આ બોટ માટનકુમુ બંદરથી નીકળી હતી અને બોલોમ્બા વિસ્તાર તરફ જઈ રહી હતી. રિવર સેફ્ટી ડિપાર્ટમેન્ટના અધિકારીના જણાવ્યા મુજબ આ અકસ્માત ત્યારે થયો જ્યારે એક મહિલા બોટ પર રસોઈ બનાવી રહી હતી. તે સમયે, ચૂલામાંથી નીકળેલા આગના એક તણખાએ મોટી આગનું સ્વરૂપ ધારણ કરી લીધું, જે થોડીવારમાં આખા જહાજમાં ફેલાઈ ગઈ. આ ભયાનક અકસ્માતનો વીડિયો પણ સોશિયલ મીડિયા પર વાયરલ થઈ રહ્યો છે, બોટમાં લગભગ 500 લોકો સવાર હતા અને આગ ફેલાતાં જ ભારે અફરાતફરી મચી ગઈ અને ઘણા લોકો પોતાનો જીવ બચાવવા માટે નદીમાં કૂદી પડ્યા અને દુઃખની વાત એ છે કે તેમાંના ઘણાને તરવાનું આવડતું ન હતું, જેના કારણે મોટી સંખ્યામાં લોકો ડૂબી જવાથી મૃત્યુ પામ્યા છે.
મદદ મળવામાં લાગ્યો સમય
આ દુર્ઘટનામાં લગભગ 150 લોકો ગંભીર રીતે દાઝી ગયા છે, પરંતુ તેમને હજુ સુધી કોઈ તબીબી કે માનવતાવાદી સહાય મળી નથી. મ્બાન્ડાકાના સ્થાનિક ટાઉન હોલમાં સ્થાપિત એક કામચલાઉ શિબિરમાં લગભગ 100 લોકોને રાખવામાં આવ્યા છે. જોકે, અહીં સુવિધાઓ ખૂબ જ મર્યાદિત છે. ગંભીર રીતે ઘાયલ મુસાફરોને નજીકની હોસ્પિટલોમાં દાખલ કરવામાં આવ્યા છે, પરંતુ ત્યાં પણ સંસાધનોની ભારે અછત છે. ઉલ્લેખનીય છે કે કોંગો જેવા દેશોમાં જ્યાં જમીન પરિવહન નબળું છે, નદીમાં મુસાફરી વધુ સામાન્ય છે, પરંતુ બોટની ખરાબ સ્થિતિ અને વધારે લોકોને બેસાડવા અને સલામતીના નિયમોનું ઉલ્લંઘન કરવાના કારણે ઘણી વખત આ પ્રકારના અકસ્માતો બને છે.
