રોહિત શર્માના ટેસ્ટ ક્રિકેટમાંથી નિવૃત્તિ બાદ, BCCI અને પસંદગીકારોએ યુવા બેટ્સમેન શુભમન ગિલને પોતાનો કેપ્ટન બનાવ્યો છે. ઇંગ્લેન્ડ સામેની 5 મેચની ટેસ્ટ શ્રેણી માટે ટીમની જાહેરાત કરવામાં આવી છે. જ્યાં ભારતીય ટીમના મુખ્ય પસંદગીકાર અજિત અગરકરે ગિલને ટેસ્ટ કેપ્ટન જાહેર કર્યો. આ જાહેરાત પછી, શુભમન ગિલની પ્રતિક્રિયા પહેલીવાર સામે આવી છે. જેમાં તેમણે દિલ જીતી લે તેવી વાતો કહી છે.
કેપ્ટન શુભમન ગિલની પહેલી પ્રતિક્રિયા આવી
શુભમન ગિલને ઇંગ્લેન્ડ પ્રવાસ માટે ભારતીય ટેસ્ટ ટીમનો કેપ્ટન બનાવવામાં આવ્યો છે. મેનેજમેન્ટને વિશ્વાસ છે કે ગિલ આગામી વર્ષોમાં ટેસ્ટ ટીમને ઘણી આગળ લઈ જશે. જેના વિશે અજિત અગરકરે પણ પોતાની પ્રેસ કોન્ફરન્સમાં કહ્યું હતું. કેપ્ટન બન્યા બાદ શુભમન ગિલની પહેલી પ્રતિક્રિયા પણ સામે આવી છે.
બીસીસીઆઈ સાથે વાત કરતા ગિલે કહ્યું, ‘બાળપણમાં, જ્યારે તમે પહેલીવાર ક્રિકેટ રમો છો, ત્યારે ભારત માટે રમવાનું તમારું સ્વપ્ન હોય છે. ફક્ત ભારત માટે રમવું જ નહીં પરંતુ ટીમ ઈન્ડિયા માટે ટેસ્ટ ક્રિકેટ રમવું એ સૌથી મોટું સ્વપ્ન છે.તે પછી, કેપ્ટનશીપની તક મળવી એ એક મોટું સન્માન છે. આ સાથે, તે એક મોટી જવાબદારી પણ છે.
ગિલ હાલમાં IPLમાં કેપ્ટનશીપ કરી રહ્યો છે.
હાલમાં, શુભમન ગિલ IPL ફ્રેન્ચાઇઝી ગુજરાત ટાઇટન્સની કેપ્ટનશીપ કરી રહ્યો છે. ગિલની કેપ્ટનશીપ હેઠળ, ફ્રેન્ચાઇઝીએ IPL 2025 ના પ્લેઓફમાં પણ જગ્યા બનાવી છે. હવે તે કેપ્ટન તરીકે પોતાની પહેલી IPL ટ્રોફી ઉપાડવાની તૈયારી કરી રહ્યો છે. ગિલ આઈપીએલ દરમિયાન ટેસ્ટ ક્રિકેટની તૈયારી પણ કરી રહ્યો છે. ગિલ સીઝન 18 ના અંત પછી તરત જ ઈંગ્લેન્ડ જવા રવાના થશે. જ્યાં તે ઈંગ્લેન્ડ લાયન્સ સામે ઈન્ડિયા એ માટે બીજી ટેસ્ટ મેચ રમશે. ગિલ મુખ્ય શ્રેણી પહેલા ઇંગ્લેન્ડમાં પ્રેક્ટિસ કરવા માંગે છે.
